K Mahendranath Salethoor
ಕೆ ಮಹೇಂದ್ರನಾಥ್ ಸಾಲೆತ್ತೂರ್
ತುಳು ಸಾಹಿತ್ಯ ರತ್ನ, ಜೋಗಿ ಸಾಹಿತ್ಯ ಶ್ರೀ ಪ್ರಶಸ್ತಿ ಪುರಸ್ಕೃತೆರ್. ತುಳು - ಕನ್ನಡ ಕವಿ, ಸಾಹಿತಿ, ವಾಗ್ಮಿ, ವಿಮರ್ಶಕೆರ್.
Recent Posts:
- ಅಡ್ಡೂರ ದೇಬೆ, ಕುತ್ತಿಪುನ್ಕೆ ಉಳ್ಳೇರಗುತ್ತು - ಪಾರ್ದನ
- ತುಳುವೆರೆ ಮರಣಡು ಬೊಜ್ಜದ ಕ್ರಮ
- ದೀಪದೆಣ್ಣೆ
- ಬೈದ್ಯರು ಮತ್ತು ತುಳುನಾಡ ದೈವಗಳು
- ಕೋಟಿ ಚೆನ್ನಯರು ಮತ್ತು ಅವರ ಕುಟುಂಬ ದೈವಗಳ ವಿಷಯದಲ್ಲಿರುವ ಗೊಂದಲ
- ಎಣ್ಮೂರ ಕ್ರಮದಲ್ಲಿ ಆಗುತ್ತಿರುವ ಬೈದೇರುಗಳ ನೇಮ
ದೈವ ಚಾಕಿರಿದ ಗಡಿಯಾಪುನ ಕಿರಮ
ಪ್ರಕೃತಿ ಸಗ್ತಿದ ದೈವಾರಾಧನೆದ ನ್ಯಾಯಸ್ಥಾನದ ಒರುವಾದ್ ಗಡಿಪಟ್ಟ ಇತ್ತ್ ದ್ ಇನಿತ ಜವನೆರೆ ಕಲೊಟು,ದೈವೊಲೆ ಕಲೊಟು ಮಾನಡಿಗೆದ ಗಡಿಪತ್ತಿನಕುಲು ದೂರ ಉಂತುನ ಪರಿಸ್ಥಿತಿ ಬೈದುಂಡು. ದುಂಬು ಪಿರಾಕ್ ದ ಕಟ್ಟ್ ಕಟ್ಲೆಡ್ ದೈವ ದೇವೆರೆ ಚಾಕಿರಿ ನಡತೊಂದಿತ್ತ್ ದ್ ಪೊಸಸಂಸ್ಕೃತಿದ ಮರ್ಲ್ ಡ್ ನಮ ಅಪ್ಪೆ ಬೇರ್ ನ್ ಕಡಿತೊಂದುಲ್ಲ.ತುಳುನಾಡ ದೈವಾರಾಧನೆದ ಕಲೊಟು ಯಜಮಾನಿಕೆದ ಒರುವಾದ್,ಗಡಿಪಟ್ಟದ ಒರುವಾದ್ಗಡಿಬೂಳ್ಯಪತ್ತುನ,ಗಡಿಯಾಪುನ,ಗಡಿಪಟ್ಟಆಪುನ ಒಂಜಿ ಪೊರ್ಲುದ ಕಿರಿಮೊ ಇತ್ತುಂಡ್. ಗಡಿಪತ್ತುನವು ಒಂಜಿ ಜಾತಿ, ಧರ್ಮೊಗು ಸೀಮಿತ ಆದಿಪ್ಪಂದೆ ಕುಟುಮದ,ಭೂಮಿದ ಯಜಮಾನಿಕೆದ ಅಧಿನಿರದ ಒರುವಾದಿತುಂಡು.ಮೂಲು ಕುಟುಮ ಸಂಸಾರ ಭೂಮಿದ ದೈವದ ನಡುತ ಚಾಕಿರಿದ,ಯಜಮಾನಿಕೆದ ಒಂಜಿ ಸಾಮಾಜಿಕ ನ್ಯಾಯದ ವ್ಯವಸ್ಥೆ ನೆಗತ್ ತೋಜುಂಡು.ಒಂಜಿ ಕಾಲೊಡು ದಂಡ್ ದ ದಳವಾಯಿ ಗಡಿಪತ್ತ್ ನಾಯೆ ಆದಿತ್ತೆ.ನಿಜವಾದ್ ನೇಮೊಡು ವಾಮದ ಗಡಿಪತ್ತುನ ಕಿರಾಮ ಪ್ರಧಾನ ಆದಿತ್ತುಂಡ್. ಒಂಜಿ ಗಿರಮೊಗು ಸಮ್ಮಂದ ಪಟ್ಟಿನ ಗದಿಪತ್ಯೆರುಂಡ ಅರೆಗ್ ಆ ಗುತ್ತುದ ಧರ್ಮ ನೇಮಾಡೋರ ಗಡಿ ಕೊರೊಂದಿತ್ತೆರ್. ಬೊಕ್ಕ ಕುಡೊರ ಆ ಗ್ರಾಮೊಗು ಸಮ್ಮಂದ ಪಟ್ಟಿನ ದೈವ ಸಾನೋಡ್ಲಾ ಗಡಿ ಕೊರೊಂತೆರ್ ಅಡೆಮುಟ್ಟ ಗುತ್ತುದ ಗಡಿಯಾದಿತುಂಡ ಆ ಗ್ರಾಮೋದ ಸಾನದ ಗುಂಡದುಲಯಿ ಅರೆಗ್ ಪೊಗ್ಯೆರೆ ಅವಕಾಶ ಇಜ್ಜಂಡ್.ಗಡಿಯಾಪುನೆಟ್ಟ್ ರಡ್ಡ್ ಕಿರಾಮೋ ಉಂಡು.ಒಂಜಿ ಕಟ್ಟ್ ಕಟ್ಲೆಡ್ ಹಿರಿಯಾಕ್ಲೆರ್ದ್ ಬರ್ಪುನ ಗಡಿ. ಕುಡೊಂಜಿ ದೈವೊಲೆಗ್ ಧರ್ಮ ನೇಮ ಕೊರ್ದು ಆಪುನ ಗಡಿ.ಕುಡೊಂಜಿ ಪೊಸತಾದ್ ಬತ್ತಿನ ವ್ಯವಸ್ಥೆದ ಮಾನೆಚ್ಚಿಲಾದ್ ಆಪುನ ಗಡಿ.ಅರಸು ಕುರಿಯಾಡಿದಾರೆಗ್ ಬೇತೆಕ್ಲು ಗಡಿಪತ್ತುಂಡ ಧರ್ಮನೇಮ ಕೊರೊಡುಂದಿಜ್ಜಿ.ಆಂಡ ಬಾವದಕ್ಲ್ ಗಡಿಯಾಪುಂಡ ಧರ್ಮ ನೇಮ ಕೋರುದೇ ಗಡಿಯಾವೊಂತೆರ್. ದೈವದ ಚಾಕಿರಿಗುಂದು ಗಡಿಪತ್ತುನಕ್ಲ್ ಗ್ ಧರ್ಮ ನೇಮದ ಅಗತ್ಯ ಖಂಡಿತ ಇಜ್ಜಿ.ಬೋಡ್ಚಿತ್ಂಡಲ ಆಡಂಬರೊಗು ಬೋಡಾದ್ ಕೆಲವೆರ್ ಧರ್ಮ ನೇಮ ಕೆನ್ದು ಗಡಿಯಾಪುನಲಾ ಉಂಡು.ಗಡಿಪತ್ತ್ ನೆರ್ದ್ ಬೊಕ್ಕ ಗಡಿಪತ್ತ್ ನಾರ್ ದೈವದ ಚಾಕಿರಿಗ್ ಸೀಮಿತಂದ್ ಲೆಕ್ಕ.
ಇರ್ಕಟ್ಟಾಯಿನ ಕುಟುಮೊನು ಒತ್ತೊಟ್ಟು ಮಲ್ತ್ ದ್, ಕುಟುಮ ಸಮ್ಮಂದ,ಜಾಗೆದಕ್ಲು ಅಡೆಗ್ ಸಮ್ಮಂದ ಪಟ್ನ ದೇಲ್ಯದಕ್ಲಿತ್ತ್ ದ್ ಅರೆನ್ ಮಾತೆರ್ ಓತ್ತೊಂದು ಕೈಯಾಚ್ಚಿದ್ ದೈವದ ಕಲೊಟು ದೈವ ಗಡಿ ಬೂಲ್ಯ ಕೊರ್ನಗ ಧರ್ಮನೇ ಮಕೋರ್ದೆ ಗಡಿಬೂಳ್ಯ ಪತ್ತೋಡಂದಿಜ್ಜಿ. ಚಾಕಿರಿಗ್ಂದ್ ಗಡಿಯಾನಗ ಆ ಅಗತ್ಯಲಾ ಬೂರುಜಿ. ಕುಟುಮ ಬಾರಿ ಮಲ್ಲೆ ಇತ್ತ್ಂಡಧರ್ಮ ನೇಮಕೊರೊಂದಿತ್ತೆರ್.ಅಕ್ಲೆಗ್ ಗಡಿಪತ್ತನಗ ಗೌಜಿ ಮಲ್ಪೆರೆ ತಾಕತ್ತಿತ್ತ್ಂಡ್.ಪಾಪದ ಕುಟುಮ ಸಂಸಾರೊಗು ಅವು ತೀರ್ ಜಿ. ಅಂಚ ಕೆಲವು ಗಡಿಬಾಕಿಯಾತ್ ನಲ ಉಂಡು.ನಿಜವಾದ್ ಗಡಿ ಪಂಡ ದೈವದ ಚಾಕಿರಿ ಗುಪ್ಪುನ ಗಡಿ. ರಾಜಾಸ್ಥಾನೊಡು ನ್ಯಾಯದಪ್ಪಣೆ ಕೊರ್ಪುನ ದೈವಾಂಡ ಜನೊಕ್ಲೆನ ಕಷ್ಟ ಕೊರೊದೊಲೆನ್ ದೂರ ಮಲ್ಪೆರೆ ಅಧಿಕಾರ ಉಪ್ಪುನಿ ಗಡಿಪತ್ತ್ ನಾರೆಗ್. ದುಂಬು ತುಳುನಾಡ್ ಡ್ ನ್ಯಾಯಾಲಯದ ಕಟ್ಟಳೆ ಇಜ್ಜಾಂಡ್. ಅಪಗ ದೈವದ ಅರಸಾನದ್ ಕಲೋನೆ ನ್ಯಾಯ ತೀರ್ಮಾನದ ಸ್ಥಾನ ಆದಿತ್ತ್ಂಡ್. ಅವೆರ್ದ್ ಬೊಕ್ಕ ದೈವೊನು ದುಂಬು ದೀದ್ ಗುತ್ತು ಚಾವಡಿಲೆಡ್ ನ್ಯಾಯ ತೀರ್ಮಾನ ಮಲ್ಪುನ ಕಿರಾಮೊ ಬತ್ತ್ಂಡ್.ಜನಸಾಮಾನ್ಯೆರ್ ಸೀದಾ ಪೋದು ದೈವಡ ಅರಕೆ ಮಲ್ಪುನ ಕಿರಮೋ ಇಜ್ಜಾಂಡ್.ಅಕುಲು ಗುತ್ತಿನ ಗಡಿಪತ್ತ್ ನಾರೆಡ ಪಂಡ್ ದ್ ಗಡಿಪತ್ತ್ ನಾರ್ ದೈವೊಲೆಗ್ ತೆರಿಪಾದ್ ದೈವ ಕೊರ್ಪುನ ತೀರ್ಪುನು ನಮ ಪಾಲಿತೊಂತ. ದೈವದ ನುಡಿ ನಂಕ್ ಅರ್ಥ ಅತುಜಿಂಡ ಗಡಿಪತ್ತ್ ನಾರ್ ಅವೆನ್ ಇವೋರದ್ ತೆರಿಪಾವೊಂತೆರ್.ದುಂಬು ರಡ್ಡ್ ಮೂಜಿ ವರ್ಸೊಗೊಂಜಾಂಡಲ ಧರ್ಮ ನೇಮ ತೂವರೆ ತಿಕ್ಕೊಂದಿಜ್ಜಾಂಡ್ ಇನಿ ವರ್ಸೊಡು 365 ದಿನಾಲ ಧರ್ಮ ನೇಮೊಲು,ದೈವ ಸಾನೊಡು ಬ್ರಹ್ಮ ಕಳಶೊಲು ತೂವರೆ ತಿಕ್ಕುವ.ಗಡಿ ಪ್ರಧಾನವಾದ್ ದೈವದ ಚಾಕಿರಿಗ್ಂದಾಂಡಲಾ ಗಡಿಪತ್ತ್ ನಾರೆಗ್ ಒಂಜಿ ಸಾಮಾಜಿಕ ಕುಟುಮ ವ್ಯವಸ್ಥೆದ ಯಜಮಾನಿಕೆದ ಪಟ್ಟಗಡಿಪಟ್ಟಆದುಂಡು.ಎಚ್ಚಾದ್ ಗಡಿ ನ್ ಪಟ್ಟಂದೇ ಲೇತ್ತೊಂತೆರ್.ಇರಂದಾಳ ಪಟ್ಟ,ಮುರಂದಳ ಪಟ್ಟ,ಐಂದಾಳ ಪಟ್ಟ,ಒಂಜಿ ಕುಂದು ಎಲ್ಪ ಮಂದಿಲೆ ಪಟ್ಟ,ನೂರ್ದಳ ಪಟ್ಟ,ಐಂದ್ರಾಳ ಪಟ್ಟ,ಸಾರಾಳ ಪಟ್ಟ,ಮುಸ್ರಳಾ ಪಟ್ಟ,ಐಸ್ರಳಾ ಪಟ್ಟ,ಲೆಚ್ಚಾಪಾವೊಲಿ ಪಟ್ಟ, ಇಂಚ ಗಡಿ ಪಟ್ಟೊಲೆಡ್ ಸೈನಿಕೆರೆ ಸಂಖ್ಯೆದ ಒರುಟು, ಸೇನಾಧಿಪತಿನ ಪಟ್ಟದ ಬಿಲೆ ಇತ್ತ್ಂಡ್. ದುಂಬು ದಂಡ್ ದ ದಳಾಯಿತೆ ಗಡಿಪತ್ತು ನಾಯೆ ಆದಿತ್ತೆ ಪನ್ಪುನೆಕ್ ಈ ಪಟ್ಟೊಲೆನ ಕಲ್ಪನೆ ಸಾಕ್ಷಿಯಾಪುಂಡು.
ದುಂಬು ಗಡಿ ಪತ್ತ್ ನಾಯೆ ಕುಟುಮೊಗು ಯಜಮಾನಿಯಾದಿತ್ತೇ.ಪದ್ ರ್ದ್ ಪೋಯಿನ ಕುಟುಮೊನು ಒತ್ತಟಾಡ್ ಉಂತಾವುನ ತಾಕತ್ತ್ ಆಯಗಿತ್ತ್ಂಡ್.ಆಯನ ಪಾತೆರೊಗು ಕುಟುಮದಕ್ಲು ಆತ್ ಬಿಲೆಕೊರೊಂದಿತ್ತೆರ್.ಇನಿಗಡಿ ಪತ್ತ್ ನಾಯೆ ಇಲ್ಲದ ಯಜಮಾನಿಯಾದ್ ಪೋತೆ ವಿನಃ ಕುಟುಮದ ಯಜಮಾನಿಕೆಡ್ ತೋಜೊಂದಿಜ್ಜಿ.ಇನಿಪೂರ ದೈವದ ಚಾಕಿರಿಲಾ ಜವನೆರೆ ಮುತಾಲಿಕೆಡ್ ನಡತೊಂದಿತ್ತ್ ದ್ ಗುತ್ತುಮಡ ಸ್ತಾನ ಕರ್ತುಲೆಗ್ ಜವನೇರಿನಿ ಬಿಲೆ ಕೊರೊಂದಿಜ್ಜೆರ್.ಕುಟುಮ ದುಲಯಿ ಕೆಲವು ಜವನೆರ್ ಅರೆನ ಪಾತೆರೊನು ಕೇನುಜೆರ್.ಅಂಚಾಯೆರೆ ಕಾರಣ ಲಾ ಉಂಡು.ಜವನೆರೆಗ್ ಗಡಿಪಟ್ಟ ಕೋರ್ದು ಅಕ್ಲು ಬೋಡ್ಚಂದಿನ ಮಲ್ತೆರ್ಂಡ,ಎಂಕ್ ಗಡಿಯಾತ್ಂಡ್ ಎನನ್ ಕೇನುನಕ್ಲು ಏರ್ಲಾ ಇಜ್ಜಿಂದ್ ಸಮಾಜೊನು ತಿದ್ದೊಡಾಯಿನಕ್ಲು ತಪ್ಪು ಮಲ್ತ್ ನೆರ್ದಾದ್ ಕೆಲಮಲೆಕ್ ಡ್ ಗಡಿಯಾಯಿನಕ್ಲೆಗ್ ಕುಟುಮದಕ್ಲೆ ಬಿಲೆ ಕೊರೊಂದಿಜ್ಜೆರ್.ಮಣ್ಣ್ ಅವುಲು ಉಂಡು.ಮಣ್ಣ್ ಡ್ ಜನ ಇಜ್ಜಿ,ಕುಟುಮ ಇಜ್ಜಿ.ಇನಿಕಾನಗ ಆ ಮಣ್ಣ್ ಡ್ ಸಂತಾನ ಒರಿಂಡ್.ಕುಟುಮೊಡಿತ್ತ್ ನ ದೈವೊಲು ಸಂತಾನೊಗು ಅಗತ್ಯ ದಾಂತೆ ಪೋಂಡು.ಕುಟುಮ ದಾಂತೆ ಸಂತಾನ ಓರಿನೆರ್ದಾದ್ ದೈವದ ಕಟ್ಟಾನ್ ಕರಿಪೆರೆ ಜನ ಇಜ್ಜಾಂದಿಲೆಕಾಂಡ್. ಮಣ್ಣ್ ನ್ ಸಂತಾನದ ಜನ ಅನುಭವಿಸಯೆರ್ ವಿನಃ ಅಕ್ಲೆಗ್ ಕುಟುಮೊಡು ಇತ್ತಿನ ದೈವೊಲು ಅಗತ್ಯಂದ್ ತೋಜುಜಿ. ಕುಟುಮ ಪುಡದ್ ಓಲೋಲಾದ್ ಭೂಮಿ ಸಂತಾನೊಗು ಪೋಂಡು. ಅವ್ಲು ಒರಿಯ ಕೊರಿಯಡ ಮನಸ್ತಾಪ ಬತ್ತ್ಂಡ್.ಮಣ್ಣ್ ಡಿತ್ತಿ ಸಾಂತಾನಿಗೆರ್ಎಂಕುಲು ದಾಯೆ ದೈವೊಗು ಕರಿಪೊಡು, ದಾಯೆ ದೈವದಡೆ ಪೋವೊಡು, ದಾಯೆ ದೈವದ ಚಾಕಿರಿ ಪಾತ್ತೊಡು, ಎಂಕ್ಲೆಗ್ ದಾಲ ಕುಟುಮದಕ್ಲು ಬುರ್ದು ಕೊರ್ವೆರಾಇಂಚಿನ ಮಾತ ಪ್ರಶ್ನೆಲು ಬರೆರೆ ಸುರಾಂಡ್. ಅಂಚ ಚಾಕಿರಿ ಕಟ್ಲೆಲು ಓಲೋಲಾದ್ ಪೋಂಡು.ಕೆಲವೆರ್ ಅನಿವಾರ್ಯ ವಾದ್ ಗಡಿ ಪತ್ತಿನೆರ್ದಾವರ ಅಕ್ಲೆಗ್ ಸುಖ ದಾಂತೆ ಪೋಂಡು. ದೈವದ ಕೇನುನ ತರೆ ಅಕುಲಾಯೆರ್.ಅಕ್ಲೆಗ್ ಕೆಲವೊರ ಕುಟುಮದಕುಲು ಚಾಕಿರಿಗ್ ವ್ಯವಸ್ಥೆ ಮಲ್ತ್ ಕೊರ್ಯೆರ್ಂಡಲ ಕುಟುಮದ ಬೂಮಿ,ಮಣ್ಣ್ ದಾಂತೆ ಸಂತಾನದ ಬೂಮಿ,ಮಣ್ಣ್ ಮಾತ್ರ ಒರಿದ್ ಕುಟುಮದ ಬೂಮಿ ಸಂತಾನೊಗು ಪೋಯಿನೆರ್ದಾದ್ ಗಡಿತ ಸಮಸ್ಯೆಲು ಸುರಾಯ.ದೈವಾರಾಧನೆದ ಮೂಲ ಕಟ್ಲೆ ತುಳುನಾಡ್ ಡ್ ದಿಕ್ಕ ಪಾಲಯೆರ್ ಕಾರಣ ಲ ಉಂದುವೇ.ಅಂಚಾದ್ ಇನಿತ ಪೊಸ ಪೊಸ ಚಿಂತಕೆರ್ ದೈವೊಲೆನ್,ದೈವಾರಾಧನೆನ್ ದೇವೆರೆ ಒಟ್ಟುಗು ಪೌರಾಣಿಕವಾದ್ ತೂಯೆರೆ ಸುರು ಮಲ್ತೆರ್.ದೈವದ 16 ಕಟ್ಲೆನ್ ಷೋಡ ಷೋಪ ಚಾರಂದ್ ಪಂಡೆರ್.ದೇವೆರೆ ಆರಾಧನೆ ಬರ್ಪುನ ದುಂಬೇ ತುಳುನಾಡ್ ದ ದೈವಾರಾಧನೆ ದ ಕಟ್ಲೆಲ್ಲಿತ್ತ್ ದ್ ಅವ್ಲು ದಾದ ದಾದ ಉಂಡ ಅವೆನ್ ದೇವೆರೆ ಆರಾಧನೆಡ್ ಇನಿ ತೂಯೆರೆ ಸಾಧ್ಯ. ಕೊರ್ಪುನ ಗೆತೊನುನ ರಡ್ಡ್ ಕಡೆಟ್ಲಾ ನಡತ್ತೊಂದುಂಡು. ಅಂಚಾದ್ ದೈವೊನು ದೇವೆರ್ ಮಲ್ಪುನ ತಪ್ಪು. ಮಣಿಪುನ ಸತ್ಯೋಲೆದುರು ಮನಿಪಂದಿ ದೇವೆರ್ಲಾ ಉಲ್ಲೆರ್. ದೈವೊಲು ಮಾಯೆರ್ದ್ ಜೋಗೊಗು ಬರ್ಪುನಿ.ಪತಿಮಾನಿನ,ಕಟಿಮಾನಿನ ವಸಾಯ ಉಪ್ಪುನಗ ದೇವೆರೆಗ್ ವಸಾಯ ಉಪ್ಪುಜಿ. ದೇವೆರೆಗ್ ನೇಮ ನೆರಿತ ಕಟ್ಲೆನೇ ಇಜ್ಜಿ.ದೈವಾರಾಧನೆದ ಕಲೊಟು ವಿದ್ಯೆ ದಾಂತಿ ತುಳುವೆರೆಡ ಇಜ್ಜಾಂದಿ ಸಂಸ್ಕೃತ ಭಾಷ್ಯದ ಆಧ್ಯಾತ್ಮೋನು ದೈವಾರಾಧನೆದ ಒಟ್ಟು 16 ಕಟ್ಲೇಲೆನ ಒರುಟು ಪೌರಾಣಿಕವಾದ್ ವಿಶ್ಲೇಷಣೆ ಮಲ್ಪೆರೆ ಪೋದು ದೈವಾರಾಧನೆದ ಕೆಲವೊಂಜಿ ಕಟ್ಲೆಲು ಪೊಲಿಯೊಂದುಂಡು.ಅವ್ಲು ಗುತ್ತುದಕ್ಲೆಗ್ಲಾ ಮಾನದಿಗೆ ಕಡಮೆಯಾದ್ ದೈವದ ಕಲೊಕು ವೈದಿಕ ಆಚರಣೆ ಸೇರೊಂಡ್.ಓಲು ಗುತ್ತುದಾಕ್ಲೆಗ್ ಮಾನದಿಗೆ ಕೋರ್ಪುನ ಕಡಮೆಯಾವೊಂದು ಪೋಂಡ ಆನಿಗ್ ದೈವಾರಾಧನೆದ ಕಟ್ಲೆಲು ಪೊಲಿಯೆರೆ ಸುರಾಯ,ಕೇನುನಕ್ಲು ಇಜ್ಜಂದಿಲೆಕಾಂಡ್.ಕೆಲವೊರ ಸಮಾಜೊನು ತಿದ್ದೋಡಾಯಿನ,ಬುದ್ದಿ ಪನ್ಪುನ ಗುತ್ತಿನಕ್ಲು ಅಂಕಾರೊಡು ಅಮೆ ಸೂತಕೊನ್ಲ ಗೆನ್ಪಂದೆ ದೈವದ ನಡೆಟುಂತುದು ದೈವೊಗು ಮದಿಪು ಪನ್ನಾಗಲ (ಕೆಲವೊರ ಪಾಗಾರದ ಪಿದಾಯುಂತುದು) ದೈವಾರಾಧನೆದ ಶುದ್ಧತೆಗ್ ಚುತಿ ಬತ್ತ್ಂಡ್.
ಕಾನೂನು ಕಟ್ಲೆಲು ಬೇತೆನೆ,ನ್ಯಾಯಸ್ಥಾನದ ದೈವೊಲೆ ಕಟ್ಲೆಲು ಬೇತೆನೆ.ದುಂಬುದ ಕಾಲೊಡು ಕುಟುಮ ಒತ್ತಟ್ಟ್ ಡಿತ್ತ್ ದ್ ಒಂಜೀತ್ ಬೂಮಿಂದ್ ಗಡಿಪತ್ತ್ ನಕ್ಲೆಗ್ ಕೊರೊಂತೆರ್.ಆ ಕೆರೆಮ ಅಂಚನೇ ನಡತೊಂದು ಪೋಂಡು ವಿನಃ ಅವೆನ್ ದಾಖಲೆ ಮಲ್ಪಂದಿನೆರ್ದಾತ್ರ ದುಂಬುಗು ಬತ್ತ್ ನ ಗಡಿಪತ್ತುನಕ್ಲೆಗ್ ಬೂಮಿ ತಿಕ್ಕಂದೆ ಪೋಂಡು.ಅಕ್ಲೆಗ್ಂದ್ ಬುಡ್ನ ಬೂಮಿಡ್ ಬೇತೆ ಏರೆಗ್ಲಾ ಹಕ್ಕಿಜ್ಜಿಂದ್ ಕಾನೂನು ಕಟ್ಲೆ ಮಲ್ತುದುವೆರ್ಡ ದುಂಬುಗು ಬರ್ಪುನ ಗಡಿಪತ್ತುನಕ್ಲೆಗ್ ಸಕಾಯಾತು. ಅಕ್ಲೆಗ್ ಕೊರ್ನ ಬೂಮಿಗ್ ದಾಖಲೆ ಮಲ್ತುದುವೆರ್ನ್ಡ್ ಅಕ್ಲೆಗಿನಿ ಬದುಕೆರೆ ಬೂಮಿ ಇತ್ತುಂಡು.ಇಂಚಿನ ದೈವೊಗು ಇಂಚಿನ ಇಲ್ಲದಕುಲು ಗಡಿಪತ್ತುಂಡ ಇಂಚಿನ ನೇಮದೌಲು ಗಡಿ ಅವೊಡುಂದು ಉಂಡು.ನೇಮೊಗು ಏಪ ದಿನ ದೀಪುಂಡಲ ಭಾವಶುದ್ಧ/ಸುದ್ಧ ಇಪ್ಪುನ ದಿನೊನೆ ದೀಪುನಿ.ದೈವದ ಎದುರೇದೈವದ ಕಲೋಟೆಗಡಿ ಪತ್ತುನಿ. ದೈವ ಆವಾರ ಗೆತೊನುನ ದುಂಬು ಗಡಿಯಾವೊಡು.ಪುತ್ತೂರುದ ಅಂಚಿದ ಕಲಲ್ದಾಯ ಮಾಕಲ್ದಿ ದೈವೊಗು ಗಡಿಯಾಪುನ ಇಚಾರೊನು ಅರೆನ ಅಜ್ಜೆರ್ ನಾರ್ಣಪ್ಪ ಶೆಟ್ರೆಗ್ ಗಡಿಯಾಯಿನೆನ್ ಗಂಗಾಧರ ಶೆಟ್ರು ನಮ್ಮ ಟಿ.ವಿ.ದ ದಯಾನಂದ ಕತ್ತಲ್ ಸಾರ್ ಮೇರ್ ನಡಪಾದ್ ಕೊರ್ಪುನ ದೈವದ ಕಲತ ನೇರ ಕಾರ್ಯಕ್ರಮೊಡು ತೆರಿಪಾದ್ ಕೊರ್ಯೆರ್. (ಕೃಪೆ - ದೈವದ ಕಲ - ನಮ್ಮ ಟಿ.ವಿ. - 17 ಜುಲೈ 2020). ಆರ್ ಪಂಡಿ ಪ್ರಕಾರ, ಗಡಿ ಪತ್ತುನಾರೆನ್ ದೇಲ್ಯೊಡು ಕಲಶ ಮೀಪಾದ್ ಬಿರ್ದುಡ್ ಅರೆನ್ ಲೆತೊಂದು ಬತ್ತುದ್ ದೈವೊಗು ಧರ್ಮ ನೇಮ ಕೊರ್ನಗ ದೈವದ ಮುಗ ಏರ್ದುಪ್ಪುನಗ ಗಡಿ ಪತ್ತುನಾರೆನ್ ಮುಂಡೈದ ಪಜೆಟ್ ಜೆಪುಡ್ದು ಕುಟುಮದಕ್ಲು ಮಾತೆರ್ಲ ಅರೆಗ್ ಬೊಲ್ದು ಕುಂಟು ಪೊದೆಪ್ವೆರ್ ಗೆ. ಅಂಚನೆ ದೈವ ಮೂಜಿ ಸರ್ತಿ ಪುರಪು ಲೆಪ್ಪುನಗ ಮೂಜನೆ ಸರ್ತಿ ಆರ್ ಲಕ್ಕುದ್ ಬತ್ತುದ್ ದೈವದ ಗಡಿಯಾಪುನಿಗೆ. ಬಾರೀ ಅಪ್ರೂಪದ ಗಡಿತ ಕಿರಮ. ಸಾವು ಪಾಲ್ ಕರ್ತುದೇ ದೈವ ಗಡಿ ಪತ್ತುನಾರೆನ್ ಗೆತೊನ್ಲೆಕಾಂಡ್. ಅಂಚನೆ ಪಿಲ್ಚಂಡಿಗ್ ಗಡಿಯಾನಗ ಪೊಸತೊಂಜಿ ಇಚಾರೊನು ಉಂದೇ ಕಜ್ಜೊಡು ಗಡಿ ಪತ್ತ್ ನಾರ್ ಕುಡಂಬೂರು ಗುತ್ತುದ ಜಯರಾಮ ಶೆಟ್ರು ತೆರಿಪಾಯೆರ್. ಕುಟುಮ ಸಂಸಾರದಕ್ಲು ಒತ್ತಟ್ಟ್ ಡ್ ಇತ್ತುದ್ ಗಡಿ ಪತ್ತುನಾರೆನ್ ಒಚ್ಚಿದ್ ಕೊರಿ ಬೊಕ್ಕ ಗಡಿಯಾಯಿನಕ್ಲು ಆ ಊರುದ ದೇಲ್ಯೊಗು ಪೋದು ರಂಗ ಪೂಜೆ ಕಟ್ಟುದ್, ಆ ಗ್ರಾಮದ ದೇವಾಲ್ಯೊಡೆ ಅಂಗಿ ದೆಪ್ಪುನ ಕಿರಮ ಇತ್ತುಂಡ್ ಗೆ. ಅಲ್ತ್ ಗಡಿ ಪತ್ತ್ ನಾರೆನ್ ಗುತ್ತುಗು ಲೆತೊಂದು ಬತ್ತುದ್ ಸುರುತ ನೇಮೊಡು ಅರಿಕೆ ಮಲ್ತುದ್, ರಡ್ಡನೆ ನೇಮೊಡು ಅನು ಗೆತೊಂದು ಕಡೆ ಕಂದಾಯ ನೇಮೊಡು ನಾಲನೆ ಜಾಮಂದ ಪೊರ್ತು/ಪುಲ್ಯಕಲ/ಪಕ್ಕಿ ಸೊರೊ ಕೇನ್ನಗ ದೈವ ಪಿಲ್ಚಂಡಿ ಗಡಿಕ್ಗಡಿ ಬೂಳ್ಯಕೊರ್ಪುನಿಗೆ. (ಕೃಪೆ - ದೈವದ ಕಲ - ನಮ್ಮ ಟಿ.ವಿ. - 17- ಜುಲೈ 2020)
ಗಡಿಟ್ ಪ್ರಧಾನವಾದ್ ಎಣ್ಣೆಯಾದ್ ಗಡಿಯಾಪುನ ಕಿರಮ ಉಂಡು, ಮಾನೆಚ್ಚಿಡ್ ಗಡಿಯಾಪುನ ಕಿರಮೊ ಉಂಡು, ಗಡಿ ಬೂಲ್ಯ ಆದ್ ಗಡಿಯಾಪುನ ಕಿರಮೊ ಉಂಡು. ಗಡಿ ಪಟ್ಟದ ಮಾನಾದಿಗೆ ಓಲು ಪೋಂಡಲಾ ಒಂಜೇ ಆದಿತ್ತುಂಡಲ ಗಡಿಯಾಪುನ ಕಿರಮೊಲು ಬೇತೆ ಬೇತೆ ಒರುಟು ಉಪ್ಪುಂಡು. ಗಡಿ ಪತ್ತ್ ನಾರೆನ್ ಚಾಕಿರಿಗ್ ಗೆತೊನುನಿ ಮಾತ್ರ. ಗಡಿ ಪತ್ತ್ ನೆರ್ದ್ ಬೊಕ್ಕ ದೈವ ಅರೆನ ಕೈಟ್ ಪತ್ತೊಂಡು. ಅವೆರ್ದ್ ಬೊಕ್ಕ ನಮ ಅರೆನ್ದೈವದ ಕೈ ಪತ್ತ್ ನಾರ್ಪಂದ್ ಪನ್ಪ. ಕೆಲವು ತಿಕ್ ಡ್ ಗಡಿಯಾಪುನರೆಗ್ ಬಳೆ ಇತ್ತುಂಡ ಗಡಿ ಬೂಲ್ಯನೇ ಗಡಿಯಾಪುನೆಟ್ ಎಚ್ಚ ತೂವೆರೆ ತಿಕ್ಕುನಿ. ಗಡಿ ಪತ್ತ್ ನಾಕ್ಲೆನ್ ದೈವ ಕೈ ಪತ್ತಿ ಬೊಕ್ಕ ಅಕ್ಲೆಗ್ ಸಂಸಾರ ಬಂಧನ ಕಡಿದ್ ದೈವದ ಚಾಕಿರಿ ಪ್ರಧಾನ ಆದ್ ಅಕ್ಲೆಗ್ಅಮೆಕರಉಪ್ಪುಜಿ (ಅಮೆಕರ = ಸೂತಿಕ). ತಾಳ್ಮೆ, ಅಲ್ಮೋಗೊಗಾದ್ ದುಂಬುದಕ್ಲು 65 ವರ್ಸೊರ್ದು ಮಿತ್ತುದಕ್ಲೆನ್ ಗಡಿ ಪತ್ತಾವೊಂತೆರ್. ಆಂಡ ದೇವು ಪೂಂಜನ ಪಾಡ್ದನ ತೂನಗ ಜವನಾತಿಗೆಡೇ ಆಯಗ್ ಗಡಿಯಾತ್ ನ ತೆರಿಯುಂಡು. ಅಪಗ ಗಡಿಯಾಪುನೆಕ್ ಪಿರಯ ಅಡ್ಡಿಯುತ್ತುಂದ್ ಲ ತೆರಿಯುಂಡು. ಪ್ರಾಯದ ಕಾಲೊಡು ಗಡಿಯಾಂಡ ಅಕ್ಲೆಗ್ ಬೇತೆ ದಾಲ ಕುಟುಮ ಸಂಸಾರದ ಬೇಲೆ ಉಪ್ಪುಜಿ. ಅಕ್ಲ್ ತನ್ಕ್ ತಿಕ್ನ ಅಧಿಕಾರೊನು ಪೊರ್ಲುಡೆ ಮಲ್ತೊಂದು ಪೋಪೆರ್. ಅಕ್ಲೆಗ್ ಪ್ರಾಯ ಆದಿತ್ತುಂಡ ಸಂಸಾರೊಡ್ಲಾ, ಸಮಾಜೊಡ್ಲಾ ಎಚ್ಚಾದ್ ಅಕ್ಲೆನ ಬೇಲೆ ಮುಗಿದಿಪ್ಪುಂಡು. ಅಂಚಾದ್ ಪ್ರಾಯದ ಕಾಲೊಡು ದುಂಬುದಕ್ಲು ಗಡಿ ಪತ್ತಾವೊಂತೆರ್. ಎಚ್ಚಿನ ಕಡೆಟ್ ದೈವ ಗಡಿ ಪತ್ತ್ ನಗ ಪತ್ತುನ ಗಡಿ ತಾರೆನ್ ದೈವ ಕೈ ಮುಟ್ಟುದೇ ಗಡಿ ಕೊರೊಂತ್ ನಿ. ದೈವೊನು ಗಡಿ ಪತ್ತ್ ನಾರ್ ಬುಡ್ದು ಬೇತೆ ಏರ್ಲಾ ಮುಟ್ಟುಲೆಕಿಜ್ಜಾಂಡ್. 16 ಕಟ್ಲೆಡ್ 16 ನಾಟ್ಯೊಡು ಒಂಜಿ ನಾಟ್ಯೊಡು ದೈವ ಗಡಿಪತ್ತುನಾರೆನ ಕೈನ್ ಪತ್ತುಂಡ ಪನ್ಪಿ ಇಚಾರೊನು ಜನಪದ ತಜ್ಞೆರಾಯಿನ ಕರ್ನಾಟಕ ತುಳುಸಾಹಿತ್ಯ ಅಕಾಡೆಮಿದ ಗುರ್ಕಾರ್ರಾಯಿನದಯಾನಂದ ಜಿ. ಕತ್ತಲ್ ಸಾರ್ತೆರಿಪಾದೆರ್(ಕೃಪೆ - ದೈವದ ಕಲ - ನಮ್ಮ ಟಿ.ವಿ. - 17 ಜುಲೈ 2020). ದೇಸೊಗೊಂಜಿ ರೀತಿ, ಊರುಗೊಂಜಿ ಕಟ್ಲೆಂದ್ ದೈವಾರಾಧನೆಡ್ ಬೇತೆ ಬೇತೆನೇ ಉಪ್ಪುಂಡು. ಉಗ್ರ ನಲಿಕೆಡ್ ದೈವ ಒರೊರ ಗಡಿ ಪತ್ತ್ ನಾರೆನ್ ಒಯ್ತೊಂದು ಪೋಪುನಲ ಕೆಲವೊಂಜಿ ಕೋಡಿಡ್ ತೂವೆರೆ ತಿಕ್ಕುಂಡು. ಅಂಚಾದ್ ಮಾತಾ ತಿಕ್ ಡ್ ಈ ಕಟ್ಲೆ ಉಪ್ಪುಜಿ. ದುಂಬು ಗಡಿ ಪತ್ತ್ ನಾರ್ನ ಎದುರು ದೈವೊನು ಎಣ್ಣೆ ಕೊರೊಂತೆರ್ಡ ಇನಿ ತಿಕ್ ನಕುಲು ಎಣ್ಣೆ ಬೂಲ್ಯ ಕೊರೊಂದುಲ್ಲೆರ್. ಕಿನ್ಯ ಪ್ರಾಯೊರ್ದು ಪರಬೆರ್ ಮುಟ್ಟ ದೈವದ ಕಲೊಕು ಮಧ್ಯಸ್ಥೆರ್ ನಕುಲು ಬತ್ತುದ್ ಗಡಿ ಪತ್ತ್ ನಾರ್ ದೂರೊಡು ಕುಲೊನ್ಲೆಕಾಂಡ್. ಮಧ್ಯಸ್ಥೆರೆ ಪನ್ಪುನವು ಕಾಸ್ ದ ಬೇರದಲೆಕ ಆದ್ ಕಟ್ಟುನಾಯೆ, ವಾದ್ಯದಕ್ಲು, ಮಧ್ಯಸ್ಥೆರೆ ನಡುಟು ಕೈ ಸನ್ನೆ, ಬಾಯಿ ಸನ್ನೆ ಕಣ್ಣ್ ಸನ್ನೆಲು ಬತ್ತುದ್ ಅವ್ಲು ಏರೆಗ್ಲಾ ಮನ ಭಕ್ತಿ ಇಜ್ಜಂದಿಲೆಕಾಂಡ್. ಗಡಿ ಪತ್ತುನೆಕ್ ದುಂಬು ನಮ್ಮ ಕುಟುಮೊರ್ದು ಇಂಚಿನಕ್ಲೆಗ್ ಗಡಿ ಪತ್ತವುನಿಂದ್ ಹಿರಿಯಾಕ್ಲು ಮಾತ ಸೇರ್ದ್ ತೀರ್ಮಾನ ಮಲ್ಪುವೆರ್. ಗಡಿಯಾಪುನಾರ್ ತರೆಕ್ ಮೈಕ್ ಮೀದ್ ಸುದ್ದಾಚಾರೊಡಿತ್ತುದ್, ಅಪ್ಪೆ, ಅಮ್ಮೆ, ಬುಡೆದಿ, ಜೋಕುಲು, ಕುಟುಮ ಸಂಸಾರ ಒತ್ತಟ್ಟ್ ಡಿತ್ತುದ್, ನೇಮದ ಕಲ ಒತ್ತಟ್ಟ್ ಡಿತ್ತುದ್, ನೇಮದ ಕಲೊಟು ಗಡಿ ಪತ್ತೆರೆ ಪೋನಗ ದುಂಬು ಗಡಿ ಪತ್ತೆರೆ ಪೋಪುನಾರ್ ಹಿರಿಯಾಕ್ಲೆ ಕಾರ್ ಪತ್ತುದ್, ದೈವದೆದುರುಂತುದು ಸೇರ್ದಿ ಸಭೆಕ್, ಕೂಡಿ ಕುಟುಮೊಗು ಕೈ ಮುಗಿದ್ಯಾನ್ ಇಂಚಿನ ದೈವೊಗು ಗಡಿ ಪತ್ವೆಪಂದ್ ಮೂಜಿ ಮೂಜಿ ಸರ್ತಿ ಪನ್ನಗ ಕೂಡಿನಕುಲುಒಪ್ಪಿಗೆಪಂದ್ ಪನೊಡು. ಅಪಗ ದೈವ ಗಡಿ ಪತ್ತುನಾರೆಗ್ ಮೂಜಿ ಮೂಜಿ ಸರ್ತಿ ಆಯುಧ ಮುಟ್ಟಾದ್ಗಡಿ ದೆತೊನ್ವೆಂದ್ಮೂಜಿ ಮೂಜಿ ಸರ್ತಿ ಪನ್ನಗಒಪ್ಪಿಗೆಪಂದ್ ಪನೊಡು. ಗಡಿ ಸ್ವೀಕಾರ ಆಯಿ ಬೊಕ್ಕ ಪಂಚೋಳಿ ಬಚ್ಚಿರೆಡ್ ಗಡಿತ ಬೂಳ್ಯ ಆಪುಂಡು. ಕೆಲವು ತಿಕ್ ಡ್ ಪರಂಪರಾಗತ ಗಡಿತ ಪುದರ್ ನೇ ಗಡಿ ಪತ್ತುನಾರೆ ಕೊರ್ಪುನಿ. ಕೆಲವು ಕೊಡಿಡ್ ಆಯನ ಪುದರ್ ನೇ ಗಡಿಕ್ ಗಡಿತ ಪುದರುಂದ್ ಕೊರ್ಪುನ ಕಿರಮ ಉಂಡು.ಮಂಚಿದ ಕುರಿಯಾಡಿದಾರೆಗ್ ಪರಂಪರಾಗತ ಗಡಿತಸಾರಾಳ ಕುಂಞಾಳ್ವಪುದರೇ ಗಡಿತ ಪುದರ್. ದೈವದ ನೇಮೊಡು ಗಡಿ ಪತ್ತುನಾರೆನ ಪುದರ್ ನ್ ಗಡಿ ಪತ್ತ್ ನಾರೆನ ಗಡಿತ ಪುದರ್ ನ್ ದೈವ ಪುರಪು ಲೆತ್ತಿ ಬೊಕ್ಕ ಅರೆನ ಕೈನ್ ಪತ್ತುದ್ ೩ ಸರ್ತಿ ಲೆತ್ತಿ ಬೊಕ್ಕ ಗಡಿ ಪತ್ತ್ ನಾರ್ ದೈವದ ಜೋಗದ ಮದಿಮಾಯಲೆಕಾಂಡ, ದೈವ ಮಾಯೆದ ಮದಿಮಾಲಾಪುಂಡು. ಗಡಿ ಪತ್ತ್ ನಾರ್ ದೈವದ ಕೈ ಪತ್ತಿ ಬೊಕ್ಕಧಾರೆ ಏರ್ ದ್ ಮದಿಮೆ ಆಯೆರೆ ಬಲ್ಲಿ. ಆಂಡ ಕೈ ಪತ್ತಾವೊಲಿಂದ್ ಕೆಲವೆರ್ ಪನ್ಪೆರ್. ಮಾತ ಊರುಡು ಈ ಕಿರಮ ಉಪ್ಪುಂದು ಪನೆರೆ ಸಾಧ್ಯ ಇಜ್ಜಿ. ಸಜಿಪಡ್ ಮದಿಮಲೈತದ ಉಲ್ಲಾಲ್ದಿನ್ ಗಡಿ ಪತ್ತ್ ನಾರ್ ನಡೆಮುಡಿಟ್ ದಲ್ಯದ ಮಿತ್ತ್ ಲೆತೊಂದು ಪೋಪುನ ಕಿರಮ ಉಂಡು. ಗಡಿ ಬೂಲ್ಯ ಆದ್ ನೇಮ ಪಿರಿ ಬೊಕ್ಕ ಸಂಸಾರೊಗು, ಊರ್ದಕ್ಲೆಗುಂದ್ ಗಡಿತಂದ್ ಒಂಜಿ ಒಣಸ್ ಪಾಡುನ ಕಿರಮ ಉಂಡು. ಉಂದೆನ್ ಗಡಿತ ಒಣಸುಂದ್ ಪನ್ಪೆರ್. ತರಕಾರಿದನಾ, ಕೋರಿ ಮೀನ್ ದನ, ಅಕ್ಲೆಗ್ ಅನುಕೂಲ ಇತ್ತ್ ಲೆಕ ಒಣಸ್ ಪಾಡ್ವೆರ್. ಅವು ಅಕ್ಲೆಗೊಂಜಿ ಮರ್ಯಾದಿ. ಅಪಗ ಇಂಚಿನಾರ್ ಇಂಚಿನ ದೈವೊಗು ಗಡಿ ಪತ್ಯೆರುಂದ್ ಊರುದಕ್ಲೆಗ್ ತೆರಿಯುಂಡು. ಅವೆರ್ದ್ ಬೊಕ್ಕ ಜನೊಕ್ಲೆಗ್ ಅರೆನ ಸುದ್ಧಾಚಾರದ ಬಗೆಟ್ ಎಚ್ಚರ್ಗೆ ಪುಟ್ಟುಂಡು. ಅರೆನ ನಾಲಯಿದ ಕೊಡಿಟ್ ದೈವ ಉಪ್ಪುಂಡು. ಅರೆಡ ಪಾತೆರ್ನಗ ಜಾಗ್ ರ್ತೆ ಉಪ್ಪಡುಂದ್ ಪನ್ಪ.
ಮದಿಮೆ ಆವಂದೆನೆ ಸಂಸಾರೊಡು ಬದುಕೊಡು ಪನ್ಪುನಾರೆಗ್ ಗಡಿ ಪತ್ತೊಲಿ. ಮದಿಮೆ ಆಪುನ ದುಂಬು ದೈವದ ಗಡಿ ಪತ್ಯೆರ್ಡ ಅರೆಗ್ ಧಾರೆದ ಮದಿಮೆ ಇಜ್ಜಿ. ಸುರುಕು ಧಾರೆದ ಮದಿಮೆಯಾದ್, ಸಂಸಾರ ನಡಪಾವೊಂದಿತ್ತುದ್ ಬೊಕ್ಕ ಗಡಿ ಪತ್ತೊಲಿ. ಬುಡೆದಿ ತೀರ್ನಕ್ಲೆಗ್ ಗಡಿ ಪತ್ತೆರೆ ಆಪುಜಿ. ಗಡಿಯಾಯಿನೆರ್ದ್ ಬೊಕ್ಕ ಬುಡೆದಿ ತೀರುಂಡ ಗಡಿಕ್ ತೊಂದರೆಯಾಪುಜಿ. ಕುಟುಮದಕ್ಲೆನ ಒಪ್ಪಿಗೆ ಇತ್ತುಂಡ ಜವನೆರೆಗ್ಲಾ ಗಡಿ ಕೊರ್ಪಾವೊಲಿ. ಗಡಿ ಪತ್ತ್ ನಾರ್ ದುಂಬೇ ಮದಿಮೆ ಆದಿತ್ತ್ ನಾರಾಂಡ ಅರೆಗ್ ಸಂಸಾರೊಡಿತ್ತುದ್ ಸಂಸಾರ ಮಲ್ಪೊಲಿ. ಗಡಿಯಾವೊಡಾಂಡಲ ಅಕ್ಲೆಗ್ ಕೆಲವೊಂಜಿ ಅರ್ಹತೆಲು ಉಪ್ಪೊಡು. ಒಟ್ಟಾರೆಂದ್ ಗಡಿಯಾಯೆರೆ ಆಪುಜಿ.ಗಡಿಯಾಪುನರೆನ ಸರ್ ರೊದ ಒವ್ವೇ ಅಂಗ ಊನ ಆದಿಪ್ಪೆರೆ ಬಲ್ಲಿ. ಅರೆನ ಕೈಕಾರ್ ಗ್, ಸರ್ ರೊಗು ಕಡ್ತ್ ನ ಗಾಯ ಆದಿಪ್ಪೆರೆ ಬಲ್ಲಿ. ಅರೆಗ್ ಎರು ತಾಡ್ ದುಪ್ಪೆರೆ ಬಲ್ಲಿ, ನಾಯಿ ತುಚ್ಚಿದುಪ್ಪೆರೆ ಬಲ್ಲಿ, ಪೊಂಜನಕ್ಲೆ ಮೇಲ್ ಗ್ ಕೈ ಪಾಡ್ದ್ ಅತ್ಯಾಚಾರ ಮಲ್ತಿಪ್ಪೆರೆ ಬಲ್ಲಿ, ಕರ್ಪಿಲ್ಲ್ ಡ್ ಕುಲ್ಲುದುಪ್ಪೆರೆ ಬಲ್ಲಿ, ಅರಕ್ಷಕೆರ್ಡ ಪೆಟ್ಟ್ ತಿಂದುದುಪ್ಪೆರೆ ಬಲ್ಲಿ, ವೀರ್ಯ ಛೇದನ ಪಂಡ ಪುರುಷತ್ವ ನಾಶ ಆದಿಪ್ಪೆರೆ ಬಲ್ಲಿ. ಅಂಚಾದ್ ಸರ್ವಾಂಗಲ ಸುದ್ದ ಇತ್ತ್ ನಾರೆಗ್ ಮಾತ್ರ ಗಡಿಯಾಯರೆ ಆಪುನಿ.ಗಡಿ ಪತ್ತಿ ಬೊಕ್ಕ ಪೆದಂಬು ನೆರ್ಯೆರೆ ಬಲ್ಲಿ, ಪೊಂಜನಕ್ಲೆ ಮೇಲ್ ಗ್ ಕೈ ಪಾಡ್ದ್ ಅನಾಚಾರ ಮಲ್ಪೆರೆ ಬಲ್ಲಿ, ಸಾವುದ ಒಣಸ್ ಮಲ್ಪೆರೆ ಬಲ್ಲಿ, ಸೂತಕದ ಪೊಂಜನಕ್ಲು ಇಪ್ಪುನ ಜಾಗೆಡೆ ಪೋಯೆರೆ ಬಲ್ಲಿ, ಸುಡ್ಪುನ(ಪುಣ ಪೊತ್ತಾವುನ) ಕಂಡೊಗು ಜಪ್ಪೆರೆ ಬಲ್ಲಿ, ಪಾಳೆದ ತಟ್ಟೆಡ್ ಉನೆರೆ ಬಲ್ಲಿ, ಪೆಲಸ್ಟಿಕ್ ಲೋಟೆಡ್ ನೀರ್ ಪರ್ಯೆರೆ ಬಲ್ಲಿ, ತರೆಟ್ ಗೊಬ್ಬರ ತುಂಬೆರೆ ಬಲ್ಲಿ, ಬೇತೆ ದಾಲ ತರೆಟ್ ತುಂಬೆರೆ ಬಲ್ಲಿ, ತರೆಟ್ ಗೋಣಿ ತುಂಬೆರೆ ಬಲ್ಲಿ, ತರೆಕ್ ಮುಟ್ಟಲೆ ದೀಯೆರೆ ಬಲ್ಲಿ, ಮುಂಡಾಸ್ ಕಟ್ಟೊಲಿ. ದಾಯೆ ಪಂಡ ಗಡಿ ಪತ್ತ್ ನಾರೆನ ತರೆ ದೈವೊಗು ಸಮರ್ಪಣೆಯಾದಿಪ್ಪುಂಡು. ಸೈತ್ ನಕುಲು ತನ್ನ ಅಪ್ಪೆ ಅಮ್ಮೆ ಆಂಡಲಾ ಪುಣತ ಬಾಯಿಗ್ ನೀರ್ ಬುಡ್ರೆ ಬಲ್ಲಿ, ಪುಣೊಕು ಪುಗೆಲ್ ಕೊರ್ ರೆ ಬಲ್ಲಿ, ಪುಣ ಮೀಪಾಯೆರೆ ಬಲ್ಲಿ. ದಾಯೆ ಪಂಡ ಗಡಿಯಾನಗ ಪೂರ ಸಮ್ಮಂದೊನು ಕಡಿಪುನ ನಿರ್ಧಾರ ಮಲ್ತ್ ದೇ ಗಡಿಯಾಪುನಿ. ಅಮೆ ಕರ ಸೂತಕ 16 ದಿನ ಪಾಲಿತೆರ್ಡ ಪಿದಾಯಿದ ಸೂತಕದ ಪೊಂಜನಕುಲು ಇತ್ತ್ ನಡೆ 7 ದಿನ ಅಕುಲು ಬರೆರೆ ಬಲ್ಲಿ. ಗಡಿ ಪತ್ತ್ ನೆರ್ದ್ ಬೊಕ್ಕ ಅಕುಲು ದೈವದ ಕೈ ಪತ್ತ್ ನಕ್ಲ್, ಕುಟುಮದ ಕೈ ಪತ್ತ್ ನಕ್ಲತ್ತ್. ಗಡಿ ಪತ್ತ್ ನಕುಲು ಕೊಡಿ ಇರೆಟೇ ಉನೊಡು. ಇರ್ಲ್ ಉನ್ನಗ ಬೊಲ್ಪು ತೆಕ್ಕುಂಡ ಮನದಾನಿ ಇರ್ಲ್ ಆತೇ ಪೊರ್ತುಗು ಬೊಲ್ಪು ಪೊತ್ತಾದ್ ಉನೊಡು. ಲೇಸ್ ಕಟ್ಟಲೆಗ್ ಗಡಿ ಪತ್ತ್ ನಾರೆನ್ ಲೆತ್ತರ್ಡ ಅಕ್ಲೆನ ಅಟಿಲ್ ನ್ ಸುಡಾಚಾರೊಡು ಬೇತೆನೇ ಮಲ್ಪೊಡು. ಅಕುಲು ಉನ್ಪೆರ್ಡ ಅಕುಲೆಗ್ ಸುರುಕು ನುಪ್ಪು ಪಾಡೊಡು. ಅಕ್ಲೆರ್ದ್ ಬೊಕ್ಕ ಬಾಕಿದಕ್ಲೆಗ್ ಬಲಸೊಡು. ಮದಿಮೆದ ಪಂತ್ಯೊಡು ಕುಲ್ಲಯರ್ಡ ಸುರುಕು ಅಕ್ಲೆಗ್ ಬಲಸೊಡು. ಅಕ್ಲೆನ್ ಅವ್ಲು ಬೇತೆನೇ ಕುಲ್ಲದ್ ನುಪ್ಪು ಬಲಸ್ ದ್ ಸುದಾರ್ಪೊಡು. ಬೇತೆಕ್ಲೆಗ್ ಬಲಸಿ ಬೊಕ್ಕ ಮಡೆ ಆಯಿ ನುಪ್ಪುನು ಅಕ್ಲೆಗ್ ಬಲಸೆರೆ ಬಲ್ಲಿ, ಅಕುಲು ಉನೆರೆಲಾ ಬಲ್ಲಿ. ಆಂಡ ಇನಿ ಸುದ್ದಾಚಾರ ತತ್ತ್ ದುಂಡು. ಇಲ್ಲದುಲಯಿ ಅಮೆ ಸೂತಕ ಬತ್ತುಂಡ ಕಣ್ಣ್ ಮುಚ್ಚಿದ್ ಪೋಪುಂಡು.
ಕೆಲವೊಂಜಿ ಸರ್ತಿ ಅನಿವಾರ್ಯವಾದ್ ಮದಿಮೆ ಆವಂದೆ ಗಡಿ ಪಟ್ಟ ಆಪುನಲಾ ಉಂಡು. ಗಡಿ ಬೂಲ್ಯ ಆದ್ ಮುದ್ರೆ ದೀನಕ್ಲೆಗ್ ಇಂಚಿನವೇ ತುತ್ತೈದಂದ್ ದೈವದ ಕಟ್ಲೆಡುಂಡು. ದುಂಬು ಗಡಿಯಾಯಿನಕ್ಲೆಗ್ ಬೂಮಿ ತಿಕ್ಕೊಂದಿತ್ತುದ್ ಅಕುಲು ಆ ಬೂಮಿಡ್ ಬೆಂದ್ ಸೊಂದೊಂತೆರ್. ಕೆಲವೊಂಜಿ ಕುಟುಮೊಡು ಗಡಿ ಪತ್ತೆರೆ ಸರಿಯಾಯಿನ ವ್ಯಕ್ತಿ ತಿಕ್ಕಂದೆ ಆ ಚಾಕಿರಿ ಬೇತೆ ಕುಟುಮೊಗು ಪೋಯಿನಲಾ ಉಂಡು. ಅಂಚ ಚಾಕಿರಿ ಪೋಯಿನೆರ್ದಾತ್ರ ಅಕ್ಲೆಗ್ ಬೂಮಿ ತಿಕ್ಕಂದೆ ಪೋಂಡು. ಅಕುಲು ಅಪಗ ಬದ್ ಕೆರೆ ಅನಿವಾರ್ಯವಾದ್ ಬೇತೆ ಬೇಲೆಗ್ ಪೇಂಟೆಗ್ ಪೋದು ಬೆನೊಡಾಯಿನ ಪರಿಸ್ಥಿತಿ ಬತ್ತುಂಡ್. ಪೇಂಟೆಗ್ ಪೋಯಿನಕುಲು ಬಂಜಿದ ಪಾಡ್ ಗಾದ್ ಪೇಂಟೆದ ತುತ್ತೈತ ಪಾಡುನವು ಅಕ್ಲೆಗ್ ಅನಿವಾರ್ಯ ಆಂಡ್. ಅಪಗ ಅಕುಲ್ ಪಾಲಿಪುನ ಕೆಲವೊಂಜಿ ಸುದ್ದಾಚಾರೊಲು ತತ್ತುದ್ ಪೋಯ. ಕೆಲವೊಂಜಿ ದೈವೊಲೆಗ್ ಮಾತಾ ಜಾತಿದಕ್ಲೆನ ಪರಂಪರೆರ್ದ್ ಬತ್ತ್ ನ ಇಲ್ಲದಕ್ಲೆಗ್ ಗಡಿಪತ್ತುನ ಅವಕಾಶ ಉಂಡು. ಆ ನೇಮೊಗು ಈ ಇಲ್ಲಗ್ ಗಡಿಂದ್ ಉಂಡು. ಆ ನೇಮ ನಡಪಾಯೆರೆಂದ್ ಈ ಇಲ್ಲಗ್ ಮಲ್ತಿನ ಸೂತ್ರ ಕಟ್ಟ್ ದ ಚೌಕಟ್ಟೇ ಗಡಿಯಾದುಂಡು ಆತ್ ಇಲ್ಲದಕುಲು ಪೂರ ಸೇರ್ದ್ ಆ ನೇಮ ನಡಪಾವೆರ್.ನೇಮ ನೆರಿಉಂತೆರೆ ಬಲ್ಲಿಂದ್ ಅವ್ಲು ಜಾತಿ ಜಾತಿದ, ಧರ್ಮದ ಗಡಿಲೆನ್ ಮಲ್ತ್ ನೆರ್ದಾದ್ ಮಾತಾ ಜಾತಿದಕ್ಲೆಗ್ ದೈವದ ಕಲೊಟು ಮಾನಾದಿಗೆ ತಿಕ್ಕ್ ಲೆಕಲ ಆಂಡ್ ಗಡಿಂದ್ ಪಂಡ ಒಂಜಿ ಸಾಮಾಜಿಕ ನ್ಯಾಯ ವ್ಯವಸ್ಥೆದ ಜಬದಾರಿಕೆಲಾ ಅಂದ್. ಗಡಿಯಾಯಿ ಬೊಕ್ಕ ಅಕ್ಲೆಗ್ ಸಂಸಾರ ಊರುದಕ್ಲು ಪನ್ಪಿ ಏದ ಬೇದ ಉಪ್ಪೆರೆ ಬಲ್ಲಿ. ಅಕ್ಲ್ ದೈವದ ಕಲೊಟು, ನ್ಯಾಯ ತೀರ್ಮಾನೊಡು ಮಾತೆರೆಗ್ಲಾ ಒಪ್ಪಿತ ಆಪುನಂಚಿನ ನ್ಯಾಯ ತೀರ್ಮಾನೊನೇ ಮಲ್ಪೊಡು. ಗಡಿಟ್ ಕೆಲವೆಟ್ ಬಳೆಯಾಂಡ ಮಾನಿಯಾದಿಗೆಡ್ ಲ ಬಳೆಯಾಪುಂಡು. ಆಂಡ ಮಾನಿಯಾದಿಗೆನೇ ಬೇತೆ, ಗಡಿ ಪತ್ತುನವೇ ಬೇತೆ. ರಡ್ಡ್ ರೀತಿಗ್ಲಾ ಕಿರಮೊಲು ಒಂಜೇ ಲೆಕ್ಕ ಇತ್ತುಂಡಲ ಮಾನ್ಯಾದಿಗೆಗ್ಲಾ ನಿರ್ದಿಷ್ಟ ಜಾತಿಂದ್ ಇಜ್ಜಿ. ಕೆಲವೊಂಜಿ ದೈವೊಲು ಕೆಲವೊಂಜಿ ಜಾತಿದಕ್ಲೆನ್ ನಿಗಂಟ್ ಮಲ್ಪುಂಡು. ತುಳುನಾಡ ಮಾತಾ ಜಾತಿದಕ್ಲೆಗ್ಲಾ ಒಂಜೊಂಜಿ ದೈವದ ಮಾನಿಯಾದಿಗೆ ಉಂಡು. ಅವು ಜಾತಿಗ್ ಸೀಮಿತ ಆದಿಪ್ಪಂದೆ ತುಳುನಾಡುದ ಒಗ್ಗಟ್ಟ್ ನ್ ತೆರಿಪಾವುಂಡು. ನೇಮದ ಕಲ ಮಾತಾ ಜಾತಿ, ಧರ್ಮದಕ್ಲೆನ್ ಒಟ್ಟು ಸೇರವನ್ನೊಟ್ಟುಗು ಒಂಜಿ ಸಾಮಾಜಿಕ ವ್ಯವಸ್ಥೆನ್ ಪೊರ್ಲುಡೆ ನಡಪುಲೆಕ ಮಲ್ಪುಂಡು. ದುಂಬುದ ಕಾಲೊಡು ಗಡಿಪತ್ತುನಾರಾವಡ್, ಕಟ್ಟುನಕ್ಲಾವಡ್, ಚಾಕಿರಿದಕ್ಲಾವಡ್ ತಪ್ಪು ಮಲ್ತೆರ್ಡ ಅಕ್ಲೆಗ್ದೈವ ಸಿಗ್ಸೆಕೊರೊಂತುಂಡು. ಪೊಣ್ಣು ದೈವೊಗಾವಡ್, ಆಣ್ ದೈವೊಗಾವಡ್ ಕಟ್ಟುನಕ್ಲೆ ಕಾರ ಬಾಕಿಲ್ ಗ್ ಚಾಕಿರಿದಅಧಿಕಾರದ ಕಾರುಂಗಿಲದೀದುಪ್ಪುವೆರ್. ಅಂಚಾಂದ್ ಅಕ್ಲೆಗ್ ದೈವದೊಟ್ಟುಗು ಮದಿಮೆ ಆತುಂಡುಂದು ಅರ್ಥ ಅತ್ತ್. ದುಂಬುದ ಕಾಲೊಡು ಆತೊಂಜಿ ಸತ್ಯ ಚಿತ್ತೊಲೆ ಕಾರ್ನಿಕ ಇತ್ತುಂಡು.
ದುಂಬು ಪೂರ ಕಟ್ಟುನಾಯೆ ಕಲೊಟು ಸಂದಿ ತಪ್ಪು ಪಂಡೆಡ ಜನಮಂದೆ ದಾಯೆ ತಪ್ಪು ಪಂಡಂದ್ ಕೇನೊಂತೆರ್. ಕಟ್ಟುನಾಯೆ ಕಟ್ಲೆ ತತ್ತೆಡ ಕೈಟ್ ಪತ್ತುದ್ ಉಂತಾವುನ ತಾಕತ್ತ್ ದ ಗಡಿ ಪತ್ತ್ ನಕ್ಲಿತ್ತೆರ್. ಇನಿ ಎಲ್ಯ ಪ್ರಾಯೊಡು ಗಡಿ ಪತ್ತುನೆರ್ದಾದ್ ಗಡಿ ಪತ್ತುನವೇ ಗನಸ್ಥಿಕೆಂದೆನ್ನಿನಕುಲೆನ್, ಅಕ್ಲೆಗ್ ಕೆಲವೊಂಜಿ ಕಟ್ಲೆಲು ತೆರಿಯಂದಿನೆರ್ದಾತ್ರ ಕಟ್ಟುನಕುಲು ಬೋಡಾಯ್ಲೆಕ ನಲಿಪಾವೊಂದುಲ್ಲೆರ್. ರಾಜಂದೈವೊಲೆಗ್ಧರ್ಮ ನೇಮಕೊರ್ದು ತೂಂಕನದ ಉಜ್ಜಾಲ್ ಡ್ ದೈವದ ಮುಗ ಮೂರ್ತಿ ದೀದ್ ಎಂಚ ಪೊಸ ಗುತ್ತು ಉಂಡು ಮಲ್ಪುವೆರಾ, ಅಂಚನೆ ಗಡಿ ಪತ್ತುನ ಅಧಿಕಾರಲಾ ದೈವದ ಕಲತ ಒಂಜಿ ಮಲ್ಲ ಆಚರಣೆ. ದೈವ ಕಟ್ಟುನಾಯೆ ನುಡಿ ತತ್ತೆಂಡ ನಿಕ್ಕ್ ವಾ ದೈವೊಗು ಪಡಿಯರಿ ಕೊರ್ತಿನಿಂದ್ ಆಯನ ಕೈಟುಪ್ಪುನ ಕಡ್ಸಲೆನ್ ಪತ್ತುದ್ ಕೇನುನ ಗಡಿ ಪತ್ತ್ ನ ಹಿರಿಯಾಕ್ಲಿತ್ತೆರ್, ಗಡಿ ಪತ್ತ್ ನಾಕ್ಲಿತ್ತೆರ್. ಇನಿ ದೇಲ್ಯದ ಚಾಕಿರಿದ ನೂಲ್ ಪಾಲ್ ಸಂಸಾರಲ ದೈವದ ಚಾಕಿರಿಡ್ ಸೇರೊಂದೆರ್. ಗಡಿ ಪತ್ತ್ ನಾರ್ ಇತ್ತ್ ನ ಗ್ರಾಮೊದ ಸುತ್ತ ಮುತಲಿಗೆಡ್ ಒವ್ವಾಂಡಲ ನೇಮ ನೆರಿ ನಡಪುಂಡ ಅವ್ಲು ಗಡಿ ಪತ್ತ್ ನಾರ್ ಇತ್ತುಂಡ ಅರೆಡ ನಾಲ್ ಪಾತೆರ ದೈವದೆದುರು ಪನ್ಪಾವೊಡು, ಅಂಚನೇ ಕುಟುಮದ ಹಿರಿಯಾರ್ಡ ರಡ್ಡ್ ಪಾತೆರ ಪನ್ಪಾವೊಡು. ಇನಿ ಅಡೆಗ್ಮಧ್ಯಸ್ಥೆರ್ಬತ್ತಿ ಬೊಕ್ಕ ಗುತ್ತಿನಾರೆನ್, ಹಿರಿಯಾಕ್ಲೆನ್ ಜವನೆರ್ ಗೆನ್ಪಂದೆ ಅಕ್ಲೆ ಕೊಸ್ಯಿಸಿ ಮಲ್ಪೆರೆ ಪೋದು ದೈವಾರಾಧನೆ ಪರ ಬೇರ್ ನ್ ಕಡಿತೊಂದುಂಡು. ದೇವೆರೆ ಚಾಕಿರಿಡ್ ನೂಲು ಪಾಡಿ ಸಂಸಾರ ದೇವೆರ್ ಬೊಕ್ಕ ನಮ್ಮ ನಡುಟು ಒಂಜಿ ಪಾಂಪಾದಿತ್ತೆರ್ಡ ದೈವದ ಕಲೊಟು ನಮ್ಮ ಬೊಕ್ಕ ದೈವದ ನಡುಟು ಒಂಜಿ ಸಂಬಂದೊನು ಕನಪುನಾರ್ ಗಡಿ ಪತ್ತ್ ನಾರ್. ಅಂಚಿನ ಗಡಿ ಪತ್ತ್ ನಾರ್ ಕಲೊಕು ಬನ್ನಗ ಅರೆಗೊಂಜಿ ಕುರ್ಸಿ ಕೊರ್ಪುನ, ಬೊಂಡ ಕೊರ್ಪುನ ಬುಡ್ಲೆ ಅರೆನೆದುರೇ ಬೇತೆ ಕುರ್ಸಿಡ್ ಜವನೆರ್ ಕುಲ್ಲೊಂದೆರ್. ಉಂದೆಕ್ ಗಡಿ ಪತ್ತ್ ನಾರೆನ ಬಗೆಟ್ ತೆರಿಯಂದಿನ ಗೇನದ ಕೊರತೆಂದ್ ಪನೊಡಾತೆ. ಇನಿ ಜವನೆರೆಗ್ ಗಡಿ ಪಂಡ ದಾದಂದೆ ಗೊತ್ತುಜ್ಜಿ. ಕಟ್ಟ್ ಕಟ್ಲೆಲು ದಾದಂದ್ ಗೊತ್ತುಜ್ಜಿ. ದುಂಬುದಕುಲು ಗಡಿ ಪತ್ತ್ ನ ಅಕ್ಲೆ ಹಿರಿಯಾಕ್ಲೆನೊಟ್ಟುಗು ಪೋದು ದೈವೊಗು ಗಂಧ ತರೆತೊಂತೆರ್, ವರ್ಸಾನ್ ಕಟ್ಲೆ ಪೋದು ದೈವೊಗು ಪೂ ನೀರ್ ದೀಪುನಿ ಎಂಚಂದ್ ತೆರಿದ್ ದೀವೊಂತೆರ್, ದೈವೊಲೆಗ್ ವಾ ಪೂ ಪಾಡೊಡು, ತುಡರ್ ಎಂಚ ದೀವೊಡು, ಸಂಕ್ರಾಂತಿ ಎಂಚ ಕರಿಪೊಡು, ಜನ ಮಂದೆಗ್ ದೈವದ ಗಂಧ ದೆತೊನ್ನಗ ಎಂಚ ಅರಿಕೆ ಮಲ್ಪೊಡು ಪನ್ಪುನೆನ್ ಪೂರ ಅಕ್ಲೆ ಹಿರಿಯಾಕ್ಲೆನೊಟ್ಟುಗು ಪೋದಾ, ಕೇಂದಾ ತೆರಿಯೊಂಡೆರ್. ಆಂಡ ಇತ್ತೆದಕುಲು ಕೇನುನ್ಲಾ ಇಜ್ಜೆರ್, ಹಿರಿಯಾಕ್ಲು ಪಂಡುಂದ್ ಕೊರೊಂದ್ ಲ ಇಜ್ಜೆರ್.ದೈವದ ಬೂಲ್ಯಜನ ಮಂದೆಗ್ ದೆತ್ತ್ ಕೊರ್ನಗ ದೈವಡ ನಾಲ್ ಪಾತೆರ ಅರಿಕೆ ಮಲ್ತುದ್ ದೆತ್ತುದ್ ಕೊರ್ಯೆರ್ಡ ಗಡಿ ಪತ್ತ್ ನಾರೆನ ಮಿತ್ತ್ ಜನೊಕ್ಲೆಗ್ ನನಾತ್ ಗೌರವ ಬರ್ಪುಂಡು. ದಾಯೆ ಪಂಡ ದೈವದ ಕಲೊಟು ದುಂಬು ಎಚ್ಚಾದ್ ಗಡಿ ಪತ್ತ್ ನಾರೇ ಬೂಲ್ಯ ದೆತ್ತುದ್ ಕೊರೊಂತಿನಿ. ಕೆಲವು ಕೊಡಿಡ್ ಗಡಿ ಪತ್ತ್ ನಕ್ಲೆಡ ಪುರ್ಪ ಮುಟ್ಟಾದ್ ಬೊಕ್ಕ ಪೂಜಾರಿನಕುಲು ದೈವೊಗು ಪೂ ಪಾಡೊಂದು ಇತ್ತೆರ್. ನನ ದುಂಬುಗಾಂಡಲಾ ಪೊಸತಾದ್ ಗಡಿ ಪತ್ತುನಕುಲು ಗಡಿ ಪತ್ತ್ ನ ಅಕ್ಲೆನ ಎರಿಯಾಕ್ಲೆಡ ಕಟ್ಟ್ ಕಟ್ಲೆನ್ ತೆರಿದ್ ನಡತೆರ್ಡ ದೈವಾರಾಧನೆದ ಕಲ ಬೆಳಗು.
Share this post
ದೈವದ ಗಡಿತ ಕಟ್ಲೆಡ್ ಗಡಿ ಪತ್ತ್ ನಾರೆಗ್ ದೈವದ ಉಜ್ಜಾಲ್ ಗ್ ಪೂ ಪಾಡುನ, ಸಂಕ್ರಾಂತಿ ಕರಿಪುನ, ಕಿರುವಾಲ್ ಪತ್ತುನ, ಕಿರುವಾಲ್ ಉಲಯಿಡ್ದ್(ಗುಂಡ/ಸಾನದ) ಪಿದಯಿ ಮಡ್ಯೆಲೆರೆಡ ಕನತ್ ಕೊರ್ಪುನ, ದೈವ ಜೋಗೊಡಾನಗದ ಕೆಲವು ಕಟ್ಟ್ ಕಟ್ಲೆಲೆನ್ ನಡಪಾವುನ ಅಧಿಕಾರ ಉಪ್ಪುನಿ ಗಡಿ ಪತ್ತಿನಾರೆಗ್.ಗಡಿ ಪತ್ತ್ ನಾರೆಗ್ ಮಾತ್ರ ದೈವದ ಉಜ್ಜಾಲ್ ಗ್ ಕೈ ಪಾಡುನ, ಪೂ ಪೂಜನೆ ಮಲ್ಪುನ ಅಧಿಕಾರ ಇತ್ತ್ ನಿ. ಇನಿ ಗಡಿ ಪತ್ತ್ ನಾರೆನ ಬದಲ್ ಮುಕ್ಕಾಲ್ದಿನಕುಲು ಸಾನ ಗುಂಡೊಲೆಡ್ ದೈವದ ಚಾಕಿರಿನ್(ಉಜ್ಜಾಲ್ ಗ್ ಪೂ ನೀರ್, ಪನಿವಾರ, ಬೊಂಡ ಬಳಸುದ್) ಮಲ್ತೊಂದುಲ್ಲೆರ್. ಗುತ್ತುದ ಚಾವಡಿಲೆಡ್ ಗಡಿ ಪತ್ತ್ ನಾರೇ ಓಮ ದೀವೊಡು. ಸಾನ ಮಾಡೊಲೆಡ್ ಬೇತೆಕ್ಲೆಗ್ಲಾ ದೀವೊಲಿ. ಕುಟುಮೊಗು ಅಮೆ ಕರ ಸೂತಕ ಇತ್ತುಂಡಲ ಗಡಿ ಪತ್ತ್ ನಾರೆಗ್ ಆಮೆ ಕರ ಇಜ್ಜಂದಿನೆರ್ದಾದ್ ಆರ್ ಬೊಲ್ಪು ಬೊಕ್ಕ ಇರ್ಲ್ ತುಡರ್ ದೀವೊಲಿ. ವಾ ಕಾರಣೊಗ್ಲಾ ತುಡರ್ ದೀಪುನೆನ್ ಉಂತಾಯೆರೆ ಬಲ್ಲಿ. ದೈವದ ನೇಮದ ಕಲೊಟು ಒಂಜನೇ ಲೆಪ್ಪು, ರಡ್ಡನೇ ಲೆಪ್ಪು, ಮೂಜನೇ ಲೆಪ್ಪು, ನಾಲನೇ ಲೆಪ್ಪುಂದು ಗುತ್ತು ಬರ್ಕೆದ ಗಡಿ ಪತ್ತ್ ನಕ್ಲೆನ್ ಲೆಪ್ಪುಂಡು. ದೈವ ಆವಾರ ಗೆತೊನುನ ದುಂಬು ಇಂಚಿನ ಗಡಿತಕ್ಲೆನೆಂದ್ ಲೆತ್ತುದ್ ಬೊಕ್ಕ ಆವಾರ ಗೆತೊನುಂಡು. ಗಡಿತಕ್ಲೆನ ಗಡಿತ ಪುರಪು ಲೆತೊಂದು ಆವಾರ ಗೆತೊನ್ವೆಂದ್ ಎಚ್ಚಿನ ಮಾತಾ ಗಡಿತಕ್ಲೆಡ ಪಂಡುದ್ ಗಡಿ ಇಜ್ಜಂದಿ, ನುಡಿ ಇಜ್ಜಂದಿ, ಸುದ್ದ ಇಜ್ಜಂದಿ, ಹಕ್ಕ್ ಇಜ್ಜಂದಿ ತಂತಿರ್ ದಾರೆನ್ ಸುರುಕೇ ಲೆತ್ತುದ್ ಬೊಕ್ಕ ಗಡಿ ಪತ್ತುನಕ್ಲೆನ್ ಲೆತ್ತೊಂದುಂಡು. ಆಂಡ ಇನಿತ ದಿನಮಾನೊಡು ನೂಲು ಪಾಡಿ ಸಂಸಾರೊಡು ಗಡಿ ಆಯಿನಕುಲ್ಲಾ ಉಲ್ಲೆರ್. ದೈವ ತಂತಿರ್ ದಾರೇ ಪಂದ್ ಲೆಪ್ಪುನಗ ಅಕುಲು ಕುರ್ಸಿಡೇ ಕುಲೊಂದುಪ್ಪುವೆರ್. ಅಕ್ಲೆ ಕಾರ ಮುದೆಲ್ ಗ್ ನೇಮ ಸುರಾಪುನ ದುಂಬೇ ಬೊಂಡ, ಪುರ್ಪನ್ ಕೊಡಿ ಬಾರೆದಿರೆಟ್ ದೀಪುನಡೆ ಮುಟ್ಟ ದೈವಾರಾಧನೆ ಎತ್ತ್ ದುಂಡು. ಗಡಿ ಪತ್ತ್ ನಾರೆಗ್ ದೈವೊಗು ಮದಿಪುನ, ಆಯುಧ ಕೊರ್ಪುನ ಅಧಿಕಾರ ಉಂಡು. ಆಂಡ ಮುಕ್ಕಾಲ್ದಿಗ್ ಸಾನ ಮಾಡೊಡು ಸುತ್ತೆ ದೀಪುನ, ನುಡಿಯುನ, ವಸಾಯೊಗುಂತುನ, ಓಮ ದೀಪುನ, ಓಮೊಡು ವಸಾಯಾಪುನ, ಪೂ ಪುರ್ಸದ ದೈವದ ಕೈಟ್ ಕೊರ್ಪುನ ಚಾಕಿರಿ ಉಪ್ಪುಂಡು. ಆಂಡ ಇನಿ ಮುಕ್ಕಾಲ್ದನಕುಲ್ಲಾ ಮದಿಪುನ ಕೆಲಸ ಮಲ್ತೊಂದುಲ್ಲೆರ್. ಬಳೆಸರಪೊಳಿ ಮುಕ್ಕಾಲ್ದಿಗಿತ್ತುದ್ ಪೂ ಪೂಜನೆ ಮಲ್ಪುನ, ಆಯುಧ ಕೊರ್ಪುನ ಅಧಿಕಾರ ಉಂಡು. ಮುಕ್ಕಾಲ್ದಿನ ಗಡಿ ಸರಪೊಳಿಗ್ ಮುತ್ತೇಸನ ಪನ್ಪೆರ್.ಬಂಟ ಜನಾಂಗದ ಕೊಡಮಂದಾಯೆ, ಕಾಂತೇರಿ ಜುಮಾದಿ, ಬಲಾಂಡಿ, ಮಾಡ್ಲಾಯೆ, ಅರಸು ಪಟ್ಟದ ಪಂಜುರ್ಲಿ, ಕೆಲವು ಜುಮಾದಿ ದೈವದ ಮುಕ್ಕಾಲ್ದಿಗ್ ಬಳೆ ಬೊಕ್ಕ ಕಂಟೆಲ್ ಗ್ ಸರಪೊಳಿ ಉಪ್ಪುಂಡು. ಮುಕ್ಕಾಲ್ದಿನವು ಪೂಜಾರ್ಮೆದ ಗಡಿಯಾಂಡ ದೈವದ ಗಡಿ ಪಂಡ ಕುಲ್ದಿ ಪಟ್ಟ ಪಂಡ ಅರಸಾದಿಗೆ ಪಟ್ಟಂದ್ ಎರಿಯಾಕ್ಲು ಪನೊಂತೆರ್. ಕುಟುಮದ ಒವ್ವೇ ಎಡ್ಡೆ ಲೇಸ್ ಕಟ್ಟ್ ನಡಪುನಗಲ ಕುಟುಮದ ಜಬದಾರಿಕೆದ ಯಜಮಾನಿಕೆದ ಗಡಿ ಪತ್ತ್ ನಾರೆಗ್ ಅರೆನವೇ ಆಯಿನ ಕೆಲವೊಂಜಿ ಕಟ್ಟ್ ಕಟ್ಲೆಲು ಇತ್ತ. ತೊಟಿಲ್ ಪಾಡ್ನಗಾವಡ್, ನಿಚ್ಚಯ, ಮದಿಮೆದಪಗಾವಡ್ ಅರೆಗ್ ಒಂಜಿ ಕುಟುಮದ ಯಜಮಾನಿಕೆದ ಮರ್ಯಾದಿ, ಬೊಕ್ಕೊಂಜಿ ಗಡಿ ಪಟ್ಟದ ಮರ್ಯಾದಿ ಇತ್ತುಂಡ್. ಮದಿಮೆದ ಕಲೊಟು ಮೂಲ ತುಳುವ ಕಟ್ಲೆದ ಧಾರೆ ಏರುನ ಕಿರಮ ತೆರಿದಿತ್ತುದ್ ಆರ್ ಪಂಡಿಲೆಕ ಕುಟುಮದಕುಲು ನಡತೊಂತೆರ್. ಅಳಿಯ ಕಟ್ಟ್ ದ ಮದಿಮೆದ ಕಟ್ಲೆ ಅರೆಗ್ ಸರಿಯಾದ್ ತೆರಿದಿತ್ತುದ್ ಮಡ್ಡೆಲೆರೆನ ಪೌರೋಹಿತ್ಯೊಡು ಧಾರೆ ಏರಾದ್ ಕೊರೊಂತೆರ್. ನೂಲು ಪಾಡಿ ಸಂಸಾರ ಧಾರೆದ ಮಂಟಮೆಗ್ ಬರ್ಪಿನ ದುಂಬು ಈ ಕಿರಮೊಲು ನಡತೊಂತುಂಡು. ಬೊಲ್ದು ಕುಂಟುದ ದಲ್ಯ ಪಾಡುದ್ ಮದಿಮಾಯೆ ಮದಿಮಾಲ್ ಮೂಜಿ ಸುತ್ತು ಆ ದಲ್ಯದ ಮಿತ್ತ್ ಸುತ್ತು ಬತ್ತುದ್ ರಡ್ಡ್ ಜನತ ಕೈ ನೆಲಕ್ ಮುಟ್ಟುಲೆಕ (ಕಂಡನಿ ಬುಡೆದಿನ ಕೈ ಮಿತ್ತ್ ದೀನ ಕೈಕುಲು) ಧಾರೆ ಏರಾವೊಂತೆರ್. ನನ ದುಂಬುಗಾಂಡಲಾ ಗಡಿ ಪತ್ತ್ ನಕ್ಲು ಅಕ್ಲೆ ಸ್ಥಾನ ಮಾನ ತೆರಿದ್, ಜನ ಮಂದೆಲು ಗಡಿ ಪತ್ತ್ ನಕ್ಲೆಗ್ ಮಾನಾದಿಗೆ ಕೊರ್ದು, ಕಟ್ಲೆಲು ಪೊಳಿಯಂದಿಲೆಕ ದೈವಾರಾಧನೆನ್ ಮಲ್ತೆರ್ಡ ಕಾಲ ಕಾಲೊಗು ಬರ್ಸ, ಬುಳೆ ಬತ್ತುದ್ ತುಳುನಾಡ್ ಬೆಳಗೆರೆ ಸಾಧ್ಯ.
ಕೆ.ಮಹೇಂದ್ರ ನಾಥ್.ಸಾಲೆತ್ತೂರು. ಎಂ.ಎ.