ChandraShekar K
ಚಂದ್ರಶೇಖರ್ ಕೆ
ಚಂದುನ ಬರವು
Recent Posts:
- ಅಡ್ಡೂರ ದೇಬೆ, ಕುತ್ತಿಪುನ್ಕೆ ಉಳ್ಳೇರಗುತ್ತು - ಪಾರ್ದನ
- ತುಳುವೆರೆ ಮರಣಡು ಬೊಜ್ಜದ ಕ್ರಮ
- ದೀಪದೆಣ್ಣೆ
- ಬೈದ್ಯರು ಮತ್ತು ತುಳುನಾಡ ದೈವಗಳು
- ಕೋಟಿ ಚೆನ್ನಯರು ಮತ್ತು ಅವರ ಕುಟುಂಬ ದೈವಗಳ ವಿಷಯದಲ್ಲಿರುವ ಗೊಂದಲ
- ಎಣ್ಮೂರ ಕ್ರಮದಲ್ಲಿ ಆಗುತ್ತಿರುವ ಬೈದೇರುಗಳ ನೇಮ
ತುಳುವೆರೆ ಮರಣಡು ಬೊಜ್ಜದ ಕ್ರಮ
ತುಳುನಾಡು ಪನ್ಪಿನವು ನಮ್ಮ ಈ ಪುಣ್ಯ ಭೂಮಿ ವಿಶಿಷ್ಠವಾಯಿನ ಸಂಸ್ಕ್ರತಿ ದಿಂಜಿನ ಪುಣ್ಯ ಬೂಡು. ಮೂಲು ಅನಾದಿಕಾಲಡು ಪುಟ್ಟುನಗಲಾ
ವೈದಿಕ ದಾಂತಿನ, ಇಡೀ ಭಾರತದಸನಾತನದ ಸಾರ ಸಂಸ್ಕ್ರತಿಲೆನ ಒಟ್ಟುದ ವಿಶಿಷ್ಠವಾಯಿನ ಒಂಜಿ ಕ್ರಮ ಇತ್ತುಂಡು,ಪುಟ್ಟುನಗಲಾ ಬೊಕ್ಕ ಸೈತಿನಗಲಾ ಇತ್ತೆದ ವೈದಿಕ ವಿಧಿ ವಿಧಾನ ದಾಂತಿನ ವಿಶಿಷ್ಟವಾಯಿನ ಕ್ರಮ ಪಿರಾಕುಡು ಮೂಲು ಇತ್ತುಂಡು. ಆಂಡ ಕಾಲದ ಪ್ರಭಾವ, ಜನಕ್ಕುಲು ಮುಂದುವರೆದು ಪೋಯಿಲೆಕ್ಕನೆ ಪಿರಾಕುದ ಸಂಪ್ರದಾಯ ಪೋದು ಇತ್ತೆ ವೈದಿಕ ಕ್ರಮೊಟ್ಟುಪಿಂಡ ಪ್ರದಾನಮಲ್ತುದು ಸಾವು(ಬೊಜ್ಜ) ಮಲ್ಪುನ ಕ್ರಮೊಟ್ಟು ನಮ ಉಲ್ಲ (ಆಂಡಲಾ ಪೂರ ಕ್ರಮೊಲಾ ಮಾಜಂದೇ ವೊರಿದುನ ಮಾತ್ರ ಸಂತೋಷದ ವಿಚಾರಂದು ಪನೊಲಿ). ಅಂಚಾದು ಹೆಚ್ಚಿನಕ್ಲೆಗು ಇತ್ತೆದ ಕಾಲೊಡು ದುಂಬುದ ಬೊಜ್ಜದ ಕ್ರಮ ಪೂರ ತೆರಿದಿಪ್ಪಂದು. ಆಂಡಲಾ ತೆರಿಯೊನೊಡಯಿನ ನಮ್ಮ ತುಳುವೆರ್ನ ಮುಖ್ಯ ಕರ್ತವ್ಯ. ಆಂಡಲಾ ಇತ್ತೆದ ಕಾಲೊಗು ಪೂರ ವಿಚಾರ ತೆರಿದಿಜ್ಜಿಂಡಲಾ ಒಂತೊಂತೆ ಕ್ರಮಕ್ಕುಲೆನು ತೆರಿಯೊನುಗ.
ಬೊಜ್ಜದ ಕ್ರಮೊಟ್ಟು ಪ್ರದೇಶವಾರುಗು ಪ್ರಾದೇಶಿಕವಾದು ವಂತೊಂತೆ ಬದಲಾವಣೆ ಉಂಡು ಅಂಚನೆ, ತುಳುನಾಡುಡು ಜಾತಿ ರೀವಾಜುದ ಕಟ್ಟು ಪ್ರಕಾರ ವೊಂತೊಂತೆ
ಬೊಜ್ಜದ ಕ್ರಮೊಟ್ಟು ಬದಲಾವಣೆ ಇಪ್ಪು. ಅಂಚಾದ್ ಯಾನೊರಿ ಬಿರುವೆ ಅಯಿನೆತತ್ರ ಬಿರುವೆರ್ನ ಕ್ರಮನು ಯೆನ್ನ ಅಮ್ಮಗು ತೆರಿನಾತು ತೆರಿಪವೆ.
ಪಿರಾಕುಡು ತುಳುವೆರು ಸೈತಿನಕ್ಲೆನು ಹೆಚ್ಚಾದು(ಕೆಲವೆರು ಪೊತ್ತವೆದೆರುಗೆ) ಪೊತ್ತವೆದುಜೆರುಗೆ,
ಮಣ್ಣುಡು ಪಾಡುನಿಪನ್ಪೆರು, ಅವುಲಾ ತೆಂಕಾಯಿ ಬಡಕಾಯಿ ದಿಕ್ಕುಗು ತರೆ ಮಂಡೆ ಮಲ್ತುದ್ ಪಾಡುಬೆರು.
ಕಾರಣ ಸಾರ ಇತ್ತುಂಡಲಾ ಅಯಿತ ವಿಚಾರನು ನಾಡೊಂದು ಪೊಂಡಲಾ ನಮಕ್ಕ್ ಕೆಲವೊಂಜಿ ಮುಖ್ಯ ವಿಚಾರ ತಿಕುಂಡು. ಬಡಪತ್ತುದ ಪೊರ್ತು, ಆ ಕಾಲೊಡು ಹೆಚ್ಚಾದು ಹೆಚ್ಚಿನಕ್ಲು ಅಪಮೃತ್ಯು ಆದ್ ಸೈಪೆದಿನಿ ಕಮ್ಮಿ, ಪ್ರಯೊದಕ್ಲು ಹೆಚ್ಚಾದು ಮರಿಯಾಲದ ಪೊರ್ತುಡು ಕಾಯಿಲೆ ಕಾಸಲೆ ಬತ್ತುದೇ ತೀರೆದುನ(ಸೈಪುನ).
ಮರಿಯಾಲ ಆಂಡ ಪೊತ್ತವರ ಸರಿಯಾಯಿನ ಇತ್ತೆದಲೆಕ ಟಾರ್ಪಲ್ ಪೂರ ಇಜ್ಜಂಡು ಅಂಚದು ಮಣ್ಣುಡು ಪಾಡುನ ಸಂಸ್ಕ್ರತಿ ಬತ್ತುದು ಇತ್ತುದು. ಮಹಾಮಾರಿ ರೋಗಲು ಬತ್ತುಂಡ ಅವು ಪಗರೊಂದು ಇತ್ತಿನೆರ್ದವರ, ಅಂಚನೆ ವೊಂಜಿ ಇಲ್ಲರ್ದು, ಬೊಕ್ಕೊಂಜಿ ಇಲ್ಲಗ್ ಅ ಪೊರ್ತುಡು ಯೆರ್ಲಾ ಪೋವಂದಿನನೆರ್ದವರ ಇಲ್ಲದಕ್ಲೆಗು ಕಾಟ ವೊಯಿಪರ ಕಷ್ಟ ಇತ್ತಿನ ಕಾಲೊಡು ಮೂಜಿ ನಾಲು ಜನ ಸೇರ್ದ್ ಮಣ್ಣುಡು ಪಾಡುನ ಕ್ರಮಲಾ ಮಂತಿಪ್ಪರ ಸಾಧ್ಯತೆ ಉಂಡು. ಬೊಕ್ಕ ಆ ಸೀಕ್ ಗಾಳಿ, ಪುಗ್ಯೆಟ್ಟು ಪಗರಿಯರ ಬಲ್ಲಿ ಪಂಡುದು ಮಣ್ಣುಡೆ ಪಾಡೆದುನ ಕ್ರಮ ಅದಿಪ್ಪು. ಒಟ್ಟಾರೆಯಾದು ಭೂಮಿ ಅಪ್ಪೆನ ಜೋಕ್ಲು, ಭೂಮಿ ಪೂಜೆ ಮಲ್ಪುನ ನಮ ಭೂಮಿಗೆ ಸೇರೊಡು ಪಂಡುದುಲಾ ಅದಿಪ್ಪು. ಇತ್ತೆಲಾ ಕೆಲವೊಂಜಿ ಜಾತಿಲೆಡು ಈ ಕ್ರಮ ವೊರಿದುಂಡು.
ಇಂಚಿನ ನಾನಾ ವಿಚಾರೊಲು ಇಪ್ಪ್ಯರ ಸಾಧ್ಯತೆ ಉಂಡು. ದಾದನೆ ಇಪ್ಪಡು…! ನಮ ಇತ್ತೆದ ಕಾಲೊಡು ಪುನ
ಪೊತ್ತವುನಕ್ರಮೊಟ್ಟು ಉಲ್ಲಾ. ಅಂಚಾದು ದುಂಬುದ ವಿಚಾರಗು ಪೊಯಿ. ತುಳುನಾಡುಡುವೈಧಿಕ ಕ್ರಮಬತ್ತಿನಂಚನೆ ತುಳುವೆರ್ನ ಇಲ್ಲದ ಎದುರು ತುಳಸಿ ದೈಯಿತ್ತ ರುಂದನ(ತುಳಸಿ) ಕಟ್ಟೆಲಾ ಬತ್ತುಂಡು. ಇಲ್ಲಡು ಮರಣ ಆಂಡ ಸುರುಕ್ಕು ನೀರು ಕೈಟ್ಟು ಬುಡ್ಯೆರುಂಡ, ಬೊಕ್ಕ ಪುನನು ಇಲ್ಲದ ಚಾವಡಿಡುತೆಂಕಾಯಿ ದಿಕ್ಕುಗು ತರೆ,ಬಡಕಾಯಿ ದಿಕ್ಕುಗು ಕಾರ್ಮಲ್ತುದು ಪಜೆಟ್ಟು ಜೆಪುಡವೆರು. ತರೆತ್ತ ಮಿತ್ತು, ಕಾರ ತೀರ್ತುಒಂಜಿ ತಾರಯಿದರ್ತುದು ಅಯಿಕ್ಕ್ಬೊಲ್ದು ಕುಂಟು ಬತ್ತಿದೀದು, ಎಣ್ಣೆ ಮೈತುದು ಪೊತ್ತಾದ್ ದೀಪೆರು.ಬಾರೆದ ದೈಯಿತ್ತ ಕಿನ್ಯ ದಂಡುಕಡ್ತುದು ಕೊನತುದು ಊದುಬತ್ತಿ ಪೊತ್ತಾದು ದೀಪೆರು. ತಾರೆರ್ದು ವೊಂಜಿ ಬೊಂಡ ದೆತ್ತುದು, (ಕೆಲವು ಕಡೆಟ್ ಅಯಿತ್ತ ನೀರುನು ಬಟ್ಟಲುಗ್ ಪಾಡುದು ದೀಪೆರು) ಅಯಿಕ್ಕ್ ಮೂಜಿ ತುಳಸಿ ಕೊಡಿ ಪಾಡುದು ಎಡತ್ತ ಕೈಯಿಟ್ಟು ನೀರು ಬುಡುಪುನಿ. ತುಳಸಿ ಪಂಡ ಶುದ್ದವಾಯಿನ, ನಮ ನಿತ್ಯ ಅರಾಧನೆ ಮಲ್ಪುನ, ಔಷಧಿಯ ಗುಣತ್ತ ಒಂಜಿ ಸಸ್ಯ.
ಇಂಚನೆ ಮೂಜಿ ಸರ್ತಿ ಮಾತೆರ್ಲಾ ತುಳಸಿ ಕೊಡಿಟ್ಟು ನೀರು ಬುಡುಪೆರು.
ಈ ಕಾರ್ಯ ಅವೊಂದು ಇತ್ತಿಲೆಕ್ಕನೆ ಪಿದಾಯಿ ಕಾಟ ವೊಯಿಪುನ ಕಾರ್ಯಲಾ ದೂಪೆದೊಟ್ಟುಡು, ದೂಪೆದ ಕಂಡೊಡು ಅವೊಂದು ಇಪ್ಪುಂಡು. ದುಂಬು ಪ್ರತಿ ಕುಟುಂಬದ ಇಲ್ಲಡು ಒಂಜೆ ಕಡೆಟ್ಟು
ದೂಪೆದೊಟ್ಟುಪಂಡುದು ಸೈತಿನಕ್ಲೆನು ಮಣ್ಣುಡು ಪಾಡ್ಯರ, ಇಜಿಂಡ ಪೊತ್ತಾಯರ, ಅಕ್ಲೆಗು ದೂಪೆ ಕಟ್ಯರ ಒಂಜಿ ಜಾಗು ಬುಡುದು ಇಪ್ಪೆದುಂಡು. ಇತ್ತೆ ಕೂಡುಕುಟುಂಬ ಇಜ್ಜನೆರ್ದತ್ರ, ಜಾಗೆದ ಅಭಾವ ಅಯಿನೆತತ್ರ ದೂಪೆದೊಟ್ಟು ಇಜ್ಜಿ. ಅಂಚಿನ ಜಾಗುಲೆಡ್ ತೋಟ ಅತುಂಡು.(ಸಾಮೂಯಿಕ ದುಂಬು ಕಾಯಿಲೆ ಕಾಸಲೆ ಬತ್ತುದು ಮರಣ ಆಂಡ ದೂರೊದ ಗುಡ್ಡೆಡುಉಡ್ಕಿರಿಪನ್ಪಿ ಒಂಜಿ ಸ್ಮಶಾನ ಜಾಗು ಇಪ್ಪೆದುಂಡು ಅಲ್ಪ ಕೊನದುಲಾ ಮಣ್ಣುಡು ಪಾಡೆದೆರುಗೆ.) ಆ ದೂಪೆದೊಟ್ಟುಡು ತೆಂಕಾಯಿ ಬಡಕಾಯಿಗಾದು ನಾಲು ಗಟ್ಟಿಮರತ್ತ ಪಂಡ ಕೊರೆಜ್ಜಿ, ಸರೋಳಿ ಇಂಚಿನ ಮರತ್ತಅಜಡಿ ಉದ್ದ, ಮೂಜಡಿ ಅಗೆಲಾಉದ್ದೊಗು ಲೆಕ್ಕ ಪಾಡುದು ಚೌಕ ಗುಜ್ಜಿ ಪಾಡುದು,ಕುಕ್ಕುದ ಅಡಿಮರ ಪಾಡುದು ಕಾಟ ವೊಯಿಪುನ ಕ್ರಮ.
ಬಿರುವೆರೆಗು ಕಾಟಗು ಅಡಿಮರಕ್ಕು ದೀಪುನ
ಕುಕ್ಕುದ ಮರಕ್ಕು ಗಡಿ ದೀಪುನಕ್ಲು ಬೊಕ್ಕ ಅಡಿಮರ ವೊಯಿಪುನಕ್ಲು ಅ ಕೂಡು ಕುಟುಂಬದ ಇಲ್ಲದಮೂಲದಕ್ಲು. ಒಂಜಿ ಕುಟುಂಬದ ಇಲ್ಲಗು, ಬರ್ಕೆದ ಇಲ್ಲಗು, ಗುತ್ತುದ ಇಲ್ಲಗು, ಬೂಡುದು ಇಲ್ಲಗು ಮೂಲದಕ್ಲು ಪನ್ಪಿನಕ್ಲು ಇತ್ತೆರು. ಈ ಮೂಲದಕ್ಲು ಅವೊಡಂಡ ಮಸ್ತ್ ಕ್ರಮ ಉಂಡು. ಅಯಿನ್ ನನೊರ ತೆರಿಯೊನುಗ. ಅಂಚ ಆ ಮೂಲದಕ್ಲೆನು ಬೊಟ್ಟಿಯತ್ತನಕ್ಲು(ಹರಿಜನಟ್ಟು ಮನ್ಸ ಜನಾಂಗ ಹೆಚ್ಚಾದು,ಕೆಲವೊಂಜಿ ಕಡೆಟ್ಟು ಬಿನ್ನತೆಲಾ ಇಪ್ಪು) ಅಯಿರ್ದು ಬೊಕ್ಕ ಕುಟುಂಬದಕ್ಲು ಪೂರ ಸೇರ್ದು ಕಾಟ ವೊಯಿಪುವೆರು. ಅಂಚನೆ ಇಲ್ಲಡು ಪುನತ ತರೆತಲ್ಪ ವೊರ್ಲಾಅರಿ, ಕಾರುದಲ್ಪ ವೊರ್ಲಾಬಾರುನು ಬೊಲ್ದು ಕುಂಟುಡು ಕಟ್ಟುದು ದೀಪೆರು. ಉಂದು ಅಕ್ಲೆಗುಪಡಿಪನ್ಪೆರು. ಪಡಿ ಪಂಡ ಋಣ, ಸೇಜ ಪಂಡುದು ಪನೊಲಿ.
ಸೈತಿನಕ್ಲೆನ ಕ್ರಮಟ್ಟು ಎಡತ್ತ ಕೈಯಿಟ್ಟು ಬೆದಂಗು (ಉಲ್ಟ ಎಡತ್ತ ಕೈಯಿಟ್ಟು) ಬೇಲೆ ಮಲ್ಪುನೆನು ನಮ ತೂವೊಲಿ. ಮೂಲು
ಬೆದಂಗುಕಾರ್ಯ ಮಲ್ಪುನೆಕ್ಕ್ ಪ್ರಾಶಸ್ತ್ಯ. ಅಯಿರ್ದು ಬೊಕ್ಕಚಟ್ಟ ಕಟ್ಟುನ, (ದೂಪೆದೊಟ್ಟುಗು ಪುನ ಜೆಪುಡಾದು ಪತ್ತೊಂದು ಪೋಯರ ಅನುಕೂಲ ಅಯರಗು ರಡ್ಡು ಆಜಿ ಅಡಿ ಉದ್ದೊದ ಬೆದುರುನು ದೀದು, ಅಯಿತ್ತ ಉಲಾಯಿದ ಮೈಕ್ಕ್ ಪಡಿ ಕಟ್ಟುಲೆಕ್ಕ ಕಟ್ಟುದು ಪುಗ್ಗೆಲು ಕೊರ್ದು ಪತ್ತೊಂದು ಪೊಪಿಲೆಕ್ಕ ತಯಾರು ಮನ್ಪುನಿ. ನೆಕ್ಕು ನಾಲು ಜನ ಪುಗ್ಗೆಲು ಕೊರೊಂದುನಾರಾಯಣಪಂಡೊಂದು ಪೊಪೆರು.)ಸೂಕರ ಕಟ್ಟುನಿ, (ಮಣ್ಣುದ ಯೆಲ್ಯ ಕುಜಿಲಿಗು ಪಜ್ಜಿ ಕೊತ್ತಲಿಗೆದ ಕಡೆನು ಅರ್ಧ ರಡ್ಡು ಭಾಗ ಅರ್ಧ ಮುಟ್ಟ ಮಂತುದು ಅಯಿಕ್ಕು ಅಯಿತ್ತವೆ ಪಾಂದಳ ಬಲ್ಲುಡು ಕಟ್ಟುದು, ಅಯಿಕ್ಕ್ ಊದುಬತ್ತಿ, ಧೂಪ ಪಾಡುದು ಪುಗೆ ಲಕ್ಕಾದು ಪುನತ್ತ ಎದುರುಡು ಪತ್ತೊಂದು ಪೋಪುನ.)
ಪುನ ಮೀಪವುನ, (ಪಿದಾಯಿಡು ಒಂಜಿ ಬೆಂಚಿ ದೀದು, ಉದ್ದೊದ ಬಾರೆದ ಇರೆನು ಅಯಿತ್ತ ಮಿತ್ತು ದೀದು, ಅಯಿಟ್ಟ್ ಜೆಪುಡಾದು ಬೆಪ್ಪು ಬೆಂದುರು ಕಾಯಿತುದು,
ಸೀಗೆದ ಕಾಯಿದ ಪೊಡಿ,ಮಂಜಲುದ ಪೊಡಿಪುನಕ್ಕು ಪೂಜಿದು ಪುನನು ಮೀಪಾವುನಿ. ಇಂಚ ಮೀಪನಾಗ ಸುತ್ತ ಕುಂಟು ಅಡ್ಡ ಪತ್ತೊಡು. ಅಯಿರ್ದು ಬೊಕ್ಕ ಉಲಾಯಿ ಕೊನತುದು ಪುನನು ಕುರ್ಚಿಡು ಕುಲ್ಲಾದು ಐತ ಮಲ್ಪುನಿ, ಅಂಜೊವು ಆಂಡಕಚ್ಚೆ,ಮುಂಡಾಸು,ಜನಿವಾರ ಶಾಲು, ಮುಂಡೊಗುಗಂಧದ ಬೊಟ್ಟುಪಾಡೊಡು. ಪೊಂಜೊವು ಆಂಡ ಅಕ್ಲೆನ ಇಷ್ಟದಸೀರೆ, ತರೆಕ್ಕ್ ಪೂವುಪುರ್ಪ,ಮುಂಡೊಗು ಬೊಟ್ಟು, ಕೈಕ್ಕ್ ಕಾಜಿ ಇಂಚ ಸಿಂಗಾರ ಮನ್ಪೊಡು. ಕೆಲವೆರು ಬಂಗಾರುಲಾ ಪಾಡುವೆರು. ದಾಲ ಇಜ್ಜಿಂಡಲಾ ನಾಲಾಯಿದ ಅಡಿಕ್ಕು ಒಂಜಿ ತುಂಡು ಬಂಗಾರು ಪಾಡುವೆರು. ಇಂಚಿನ ಕೆಲವೊಂಜಿ ಕ್ರಮೊಕ್ಕುಲು ಉಲ್ಲ. ಅಲ್ತು ಮಾತೆರ್ಲಾ ಪುನತ್ತ ಬಾಯಿಗು ನೀರು ಬುಡುದು, ಕುಟುಂಬದ ಮಾತೆರ್ಲಾ ಒಟ್ಟುಗು ಮೂಜಿ ಸರ್ತಿಮುರಿಯಲೆತ್ತುದು, ಇಲ್ಲುದ ಉಲಾಯಿರ್ದು ಪುನ ದೆರ್ತುದು, ಕಾರು ಸುರುಕ್ಕು ಪಿದಾಯಿ ಕೊನತುದು, ಪುನನು ದೂಪೆದೊಟ್ಟುಗು ಕೊನತುದು, ತೆಂಕಾಯಿ ಬಡಕಾಯಿ ದಿಕ್ಕುಗು, ವೊಯಿತ್ತಿ ಕಾಟಗು ಬೆದಂಗು(ಉಲ್ಟಾ) ಸುತ್ತು ಬರ್ಪದು, ಕಾಟಡು ತೆಂಕಾಯಿ ದಿಕ್ಕುಗು ತರೆ, ಬಡಕಾಯಿ ದಿಕ್ಕುಗು ಕಾರು ಬರ್ಪಿಲೆಕ್ಕ ಜೆಪುಡದು, ಅಲ್ಪ ಇಪ್ಪುನ ಕುಟುಂಬದ ಕೆಲವೆರು ನೀರು ಬುಡುದು, ತರೆತ್ತಲ್ಪ ವೊರಿ, ಕಾರುದಲ್ಪ ವೊರಿ, ಇಂಚ ಇರ್ವೆರು, ಎಡತ್ತ ಕೈಟ್ಟ್ ಮಡಲು ತೂಟೆ ಪತ್ತುದು ಬೆದಂಗು ಸೂ ಕೊರ್ದು ಪುನ ಪೊತ್ತಾವುನಿ.(ಚುಟುಕು ಆದ್ ತೆರಿಪದೆ ಮಾಪು ಇಪ್ಪಡು)
ಅರ್ಧ ಪುನ ಪೊತ್ತುದು ಪುನತ್ತ
ನಡು ಕೂಡುನಾಗ ಮಡು ಇಜಿಂಡ ಕುಡರಿಗು ಒಂಜಿ ತಾರಾಯಿನು ತುಚ್ಚಾದು ಕಾಟದ ಅಂಚಿರ್ದು ಇಂಚಿಗು ಎಡತ್ತ ಕೈಟ್ಟು ದಕ್ಕುದು ಬೊಕ್ಕ ಇಲ್ಲಗು ಬರ್ಪುನ. ಮನದಾನಿ ಕಾಂಡೆ ಪೋದು ಪೊತ್ತಂದಿನ ಕೆಲವೊಂಜಿ ಮೂಳೆಲೆನ್ ಒಟ್ಟು ಮಲ್ತುದು ಅಯಿನ್ ಪೊತ್ತಾವೊಡು. ಕೆಲವೆರು ಸೈತಿನಾಯನ ಗೌರವಾರ್ಥವಾದು ಇಲ್ಲದ ಬೆಡಿ ಪುಡಪ್ಪುವೆರು. ತುಳುವೆರೆ ಮರಣಡು ಪೊಂಜೊನಕ್ಲು ತರೆ ಬಿರ್ಕುರ್ದು ಪಾಡುದು, ಅಂಜೊನಕ್ಲು ಲುಂಗಿ ತಿರ್ತು ಬುಡುದು ರಡ್ಡು ಕೈಯಿನು ತರೆತ್ತ ಪಿರಾವು ಪತ್ತುದುಮುರಿಯೊದೀಪಿನ ಪ್ರಧಾನ ಕ್ರಮ. ಈ ಕಾರ್ಯ ಆದ್ ಐನು ದೀನ ಕರಿದುಬೂದಿ ಮುಚ್ಚುನಕಾರ್ಯ ಪಂಡ ಬಡಕಾಯಿ ಭಾಷೆದದೂಲಪ್ಪ ಮಲ್ಪುನಿಪನ್ಪೆರು. ಐನೆಟ್ಟು ಶುದ್ದ ಕಾರ್ಯ ಪೂರ ಉಪ್ಪುಂಡು.
ಪೊತ್ತಾಯಿನ ಕಾಟದಡೆ ಪೋದು ಅ ಕಾಟನು ಮೂಜಿ ಪಾಲು ಮನ್ಪುನಿ. ತರೆತ್ತ ಭಾಗ, ಶರ್ರೊದ ಭಾಗ, ಕಾರುದ ಭಾಗ. ಈ ಮೂಜಿ ಭಾಗದ ವೊಂತೊಂತೆ
ಬೊಂಜ(ಬೂದಿ) ದೆತ್ತುದು ವೊಂಜಿ ಮಣ್ಣುದ ಅರಿಯಡು ಪಾಡುದು ದೀಪೆರು. (ದುಂಬುಗು ಪಿಂಡ ಪ್ರಧಾನ ಮನ್ಪರ) ಅಯಿರ್ದು ಬೊಕ್ಕ ಅಯಿಟ್ಟು ಕಾರುದ ಭಾಗದ ಬೊಂಜನು ಅಡಿಕ್ಕು, ಶರ್ರೊದ ಭಾಗದ ಬೊಂಜ ನಡುಕ್ಕು, ತರೆತ್ತ ಭಾಗೊದ ಬೊಂಜನು ಮೇಲುಗು ಪಾಡುದು ಗುಂಬಜುದಲೆಕ್ಕ ದೂಪೆ ಮೆತ್ತುನ. ನನ ಕೆಲವೆರು ಗೊರಿ ಕಟ್ಟವೆರು. ಇಂಚ ದೂಪೆ ಮಲ್ತುದು ಅಯಿತ್ತ ಸುತ್ತುಗುಸರೋಳಿದ ದೈಯಿತ ಇಜಿಂಡ ಅವ್ವೆ ಮರತ್ತ ಕನೆ ಕುತ್ತುವೆರು. ಎದುರುಚಿಟ್ಟೆಮಲ್ತುದು ತಿಬಿಲೆ ಪೊತ್ತಾದು ಬೊಂಡ ದೀದು ಪ್ರಾರ್ಥನೆ ಮಲ್ತುದು ಪೆದಂಬು(ಉಲ್ಟಾ) ಸುತ್ತು ಬರ್ಪೆರು.
ಅಪಗನೆ ಈ ಕಾರ್ಯ ಮಲ್ತಿನಾಯೆ ಬೊಕ್ಕ ಅಕ್ಲೆನ ಸಂಬಂಧದ ರಡ್ಡ್ ಮೂಜಿ ಜನ ಬತ್ತಿನ ಭಂಡಾರಿಲೆನ ಸಮ್ಮುಖಡು ಗಡ್ಡ ಮೀಸೆ ಕುಜಲು ಗೀಸಾದು ಮೀದ್ ಪೊಸ ಕುಂಟು ತುತ್ತುವೆರು. ಉಂದುಲಾ ಮಡ್ಯೆಲ್ಲಣ್ಣನ ಸಮ್ಮುಖಡು ಅಪುನಿ. ಅನಿಲಾ ಕೆಲವು ಬ್ಯಾಂಡ್ ಮನ್ಪುನಕ್ಲು ಉಲ್ಲೆರು.
ಇಂಚನೆ ಸೈತಿನೆರ್ದು ಬೊಜ್ಜದಡೆಮುಟ್ಟ ಸೈತಿನಯನ ಇಲ್ಲುಡು ಪುನ ದೀಡಿನಲ್ಪ ಒಂಜಿ ಮಣೆಟ್ಟು ನೀರು ದೀದು ರಾತ್ರೆಗು ಮಾತ ಕುಟುಂಬದ ಸದಸ್ಯೆರು ಪಿರಾತರೆಕ್ಕು ರಡ್ಡ್ ಕೈ ಪತ್ತುದು ಮುರಿಯೊ ಲೆಪ್ಪೊಡು. ಮೂಲು ಪೊಂಜೊನಕ್ಲು ತರೆ ಬಿರ್ಕೊಡು,ಅಂಜೊನಕ್ಲು ಲುಂಗಿ ಉದ್ದ ಬುಡೊಡು. ಈ ರೀತಿ ಬೊಜ್ಜದಾನಿ ಪುಲ್ಯಕಾಂಡೆ
ಬೊಜ್ಜಮಲ್ಪುನ ಕ್ರಮ ಶುರು ಅಪುಂಡು. ಪಂಡ ಸೈತಿನಾಯನಉಡಲುಗ್ ಅರಿ ಬಿರ್ಕುನಪನೊಲಿ. ಬೊಜ್ಜಗು ಉಂತಿನ ಮುಖ್ಯಸ್ಥೆ ಪಂಡ ಮಗೆ ಇತ್ತುಂಡ ಮಗೆ ಇಲ್ಲದ ಮೊಟ್ಟುದ ತಡ್ಯಡು ಕುಂಬುಡ ಬೊಕ್ಕ ಬಾರೆದ ಕಾಯಿನು ಕಡ್ಪುನ ಕ್ರಮ.ಮೂಲು ಬಾರೆದ ಕಾಯಿ ಬೂದಿ ಬಾರೆದ ಕಾಯಿ ಅವೊಡು.ಕುಂಬುಡ ಬೂದಿ ಕುಂಬುಡ ಅವೊಡು. ಕಡ್ತಿ‌ನ ಒಂಜಿ ತುಂಡು ಉಲಾಯಿ ಬುರೊಡು ಒಂಜಿ ತುಂಡು ಪಿದಾಯಿಗು ಬುರೊಡು. ಅಯಿರ್ದು ಬೊಕ್ಕ ಅಟಿಲುದಕ್ಲು ಅಟಿಲುದ ಬೇಲೆ ಸುರು ಮಲ್ಪುವೆರು.
ಅಂಚನೆ ನನ
ಬೊಜ್ಜದ ಕ್ರಮ. ತುಳುವೆರೆನ ಬೊಜ್ಜಡುನೀರ ನೆರೆಳು ಕಟ್ಟುನಪನ್ಪಿ ಪ್ರಮುಖವಾಯಿನ ಕ್ರಮ. ಒಂಜಿ ವೊಂತೆ ತೋರದ ಕೊಡಿ ಬೆದುರುನು ಕಡ್ತುದು, ಅವು ಇಲ್ಲದ ಅಟ್ಟೊಗು ಸರಿಯಾದು ಐನ್ ಇಜಿಂಡ ಏಳ್ ಕೋಲು ಉದ್ದ ಇಪ್ಪೊಡು. ಅಯಿನ್ ಮೂಜಿ ಸಿಗಿತ್ತೆ ಮಲ್ತುದು ತ್ರಿಕೊಣಕಾರ ಪಿರಾಮಿಡಲೆಕ್ಕ ಮಲ್ತುದು ಅಯಿತ್ತ ಕೊಡಿಕ್ಕು ಪಿಂಗಾರ ಪೂ ಸಿಂಗಾರ ಮಲ್ತುದು, ಬೊಲ್ದು ಮಡಿ ಕುಂಟು ಕೊಡಿರ್ದೆ ಸುತ್ತೊಂದು ಬರ್ಪಿನ. ಅವು ತೂನಗ ಪಿರಾಮಿಡುದಲೆಕ್ಕ ತೋಜುಂಡು. ಅಯಿತ್ತ ಉಲಾಯಿದ ನಡುಟ್ಟು ನೆಲಟ್ಟು ಒಂಜಿ ಮಣೆಟ್ಟು ಕಂಚಿದ ಬಟ್ಟಲುಡು ಕುರ್ದಿ ನೀರು ದೀಪೆರು. ಅಯಿರ್ದ್ ಬೊಕ್ಕ ಅಯಿತ್ತ ಉಲಾಯಿ ಮೈಯಿರ್ದು, ಅಟ್ಟೊಗು ತಾಗಿನ ಬೆದುರುದ ಕೊಡಿರ್ದ್ ಒಂಜಿ ನೂಲು ಸರಿಯಾದು ಕಂಚಿದ ಬಟ್ಟಲುಗು ಜಪುಡಾದು, ಅಯಿತ್ತ ನಡುಕ್ಕು ಸೈತಿನಕ್ಲೆನ ಯಾ ಇತ್ತಿನಕ್ಲೆನ ಒಂಜಿಬಂಗಾರುನು ಬೊಕ್ಕಮಂಜಲುದ ತುಂಡುನು ನಡುಕ್ಕ್ ಕಟ್ಟುವೆರು. ಉಂದು ಪೂರ ಊರುದ ಮಡ್ಡೆಲೆರ್ ಮನ್ಪುನಿ. (ಆಂಡ ಕೆಲವೊಂಜಿ ಕಡೆಟ್ ಮಡ್ಯೆಲೆರು ಬತ್ತುಜಿಂಡ ಊರುದ ಜಾತಿದ ಗುರ್ಕಾರೆನೇ ಮಲ್ಪೆದೆರುಗೆ)
ಪೊಂಜೊನಕ್ಲು ಒಂಜಿ ಮೆಯಿರ್ದ್ ಮಡಿ ಬೊಲ್ದು ಕುಂಟು ತುತ್ತುದು, ತರೆಕುಜಲು ಬಿರ್ಕುರುದು ಪಾಡುದು ಸಾಲು ಉಂತೊಡು, ಅಂಜೊನಕ್ಲು ಒಂಜಿ ಮೈಯಿರ್ದು ಉಂತುವೆರು. ಇತ್ತೆ ಊರ ಗುರ್ಕಾರೆ ಪ್ರತಿಯೊರಿರ್ಯಗುಲಾ ಒಂಜಿ ತುಂಡು ಕುಂಬುಡ, ಒಂಜಿ ತುಂಡು
ಬಾರೆ ಕಾಯಿಕೊರ್ಪೆರು. ಸೈತಿನಯನ ಲೆಕ್ಕೊಡು ಪಿರಾತನೆ(ಪ್ರಾರ್ಥನೆ) ಮಲ್ತುದು ಅಯಿತ್ತ (ಕಟ್ಟುದಿನ ಪಿರಾಮಿಡು ಅಕಾರದ ನೀರ ನೆರೆಳುದ) ಸುತ್ತು ಮಾತೆರ್ಲಾ ದೀವೊಡು. ದೀಡುದು ಅಯಿ ಬೊಕ್ಕ ಮೂಜಿ ಸುತ್ತು ಮುರಿಯೊ ಲೆಪ್ಪುವೆರು. ಪಿದಾಯಿಡುಕೊರಗ ಕೊಲ,ಕುದುರೆ ಕೊಲಪೂರ ತಯಾರು ಅದಿಪ್ಪುಂಡು.ಕೆಲವು ಕಡೆಟ್ಟು ಬ್ಯಾಂಡು ಮಲ್ಪವುನಕುಲಾ ಉಲ್ಲೆರುಗೆ. ಅಯಿರ್ದು ಬೊಕ್ಕಬೊಂಡುರ್ವೆ(ಬೊಂಡುದ ಕುರುವೆ ಪನ್ಪಿ ಅರ್ಥ) ಪಂಡುದು ಬೈರ ಪನ್ಪಿ ಜನಾಂಗದಕ್ಲು ಮುಡೆಪೆದುನ ಪಂಚಕುರುವೆಂದು ಉದ್ದೊದ ವೊಂಟೆ ಬೆದುರುದ ಬೊಂಡುದ ಕುರುವೆ ಬರ್ಪೆದುಂಡು. ತಡ್ಪೆಗು ಒಂಜಿ ಸೇರು ಅರಿ ಪಾಡುದು ದೀಡುದಿಪ್ಪುವೆರು. ಅಯಿನು ಸೇರುದ ಕಡೆಟ್ಟು ಬರ್ಪಿನ ಕಟ್ಟಡು ಮೂಜಿ ಸರ್ತಿ ಬೆದಂಗುಡು ಕುರ್ವೆದ ಉಲಾಯಿ ಪಾಡುವೆರು. ಅಯಿನು ಗುವ್ವೆಲುದಡೆಗು ನಾಲು ಐನ್ ಪೊಂಜೊನಕ್ಲು ಯಾ ಅಂಜೊನಕ್ಲು ಪತೊ ಪೊನಾಗ, ಊರುದಕ್ಲು ಉಗ್ಗೆಲುರ್ದು ನೀರು ದೆತ್ತು ಕೊರೊಡು ಅಯಿಕ್ಕು ಅಕ್ಲ್ ನೀರು ಪಾಡುನಗ ಮೂಜಿ ಸರ್ತಿ ಕುರ್ಕುದುಮೂರಿಯೊಲೆಪ್ಪುವೆರು.
ಅಯಿರ್ದ್ ಬೊಕ್ಕ ಅಯಿನ್ ಒಂಜಿ ಕಂಚಿದ ಬಟ್ಟಲುಗು ಪಾಡುವೆರು. ಅಯಿತ ಸುತ್ತ ಕುಲ್ಲುದು ಅಯಿಕ್ಕು ಮಂಜಲು ಬೊಕ್ಕ
ಸುಣ್ಣಪಾಡುದು, ನನೊಂಜಿ ಕಂಚಿದ ಬಟ್ಟಲುಗು ಯೆಡ್ಡೆ ಅರಿ ಪಾಡುದು ಮುರಿಯೊ ಲೆತ್ತೊಂದು ಮುರೆಪುವೆರು. ಈ ಮೊರೆತ್ತಿನ ಅರಿಯೆಸೈತಿನಾಯನ ಉಡಲುಗು ಬಿರ್ಕುನ ಅರಿ. ಅಯಿರ್ದು ಬೊಕ್ಕ ಸೈತಿನಯನ ಕುಟುಂಬದಕ್ಲು ಯೆತ್ ಜನ ಅಂಜೊನಕ್ಲು ಉಂತುದಿಪ್ಪುವೆರ ಅಕ್ಲೆಗ್ ಮಾತ ಗ್ರಾಮೊದಕ್ಲು ಕುಂಬುಡದ ತುಂಡುಲಾ, ವೊಂಜೊಂಜಿ ಬಾರೆದ ಕಾಯಿಲಾ ಕೊರ್ಪೆರು. (ಅನುಲೆಗ್ ಮಾತ್ರ ಪೊಂಜೊನಕ್ಲೆಗು ಇಜ್ಜಿ) ಅಯಿನು ಪತ್ತೊಂದು ದೂಪೆದೊಟ್ಟುಗು ಸೈತಿನಾಯನ ದೂಪೆದಡೆ ಶುರುಕ್ಕು ಅಂಜೊನಕ್ಲು ಪಿದಾಡುವೆರು. ಇಲ್ಲದ ಜಾಲುಡು ಕುದುರೆ ಕೊಲ, ಕೊರಗ ಕೊಲ ನಲಿತೊಂದು ಅ ಪೊರ್ತುಡು ಇಪ್ಪುಂಡು. ಅಕ್ಲೆನ ಪಿರಾವು ಮಲ್ಲ ಮಗೆ, ಯೆಲ್ಯಾ ಮಗೆ, ಕುಟುಂಬ ಸಂಬಂಧಿಲು, ಮಂಜಲು ಅರಿತ್ತ ಬಟ್ಟಲುನುಲಾ ಬೊಕ್ಕೊಂಜಿ ಅರಿತ್ತ ಕಂಚಿದ ಬಟ್ಟಲುನು ಪತ್ತೊಂದು ಬರ್ಪೆರು. ಜೊಕ್ಲು ಮಲ್ಲಕುಲು ಕೊರ್ನ ಕುಂಬುಡದ ತುಂಡುನು, ಬಾರೆದ ಕಾಯಿನು ದೂಪೆದ ಸುತ್ತುಲಾ ದೀಪೆರು. ಇತ್ತಿನತು ಬೊಂಡ ದೀಪೆರು. ಒಂಜಿ, ಮೂಜಿ, ಐನ್ ಇಂಚ. (ಈ ಕಾರ್ಯಕ್ರಮಕ್ಕುಲು ಅವೊಂದು ಇಪ್ಪುನ ದುಂಬೆ ಮೂಲು ದೂಪೆದಲ್ಪಲಾ ಊರುದ ಮಡ್ಯೆಲಾಣ್ಣೆ ಕಂಗುದ ನಾಲು ಗುರ್ಜಿ ಪಾಡುದು, (ದೂಪೆನು ಪೊರ್ಲು ಅಲಂಕಾರ ಮಲ್ತಿಪ್ಪುವೆರು.
ಈ ಅಲಂಕಾರಗುಲಾ ಪುದರ್ ಕೆಲವು ಉಂಡು
ದೆಲಗೂಡು,ನಿಲೆಗೂಡುಇಂಚ ಮಾತ.) ಅಯಿಕ್ಕ್ ಪೊರ್ಲು ಕುಂಟು ಸುತ್ತು ಸುಂದುದು, ಅಯಿಕ್ಕ್ ಮಿತ್ತು ಬೊಲ್ದು ಕುಂಟು ತಿರ್ತು ದಾರೆ ಸೀರೆ ಪೂರ ಸುತ್ತುನ. ಇಂಚ ಮಲ್ತುದು ಬಾರಿ ಪೊರ್ಲು ಪೂಕರೆ ಮಲ್ಪುವೆರುಗೆ. (ನೆಕ್ಕು ಪೂರ ಮಸ್ತ್ ಕ್ರಮ ಉಂಡುಗೆ). ಉಡಲೆಗ್(ದೂಪೆ) ಕುಟುಂಬ ಸಂಬಂಧಿಕೆರು ಅರಿ ಬಿರ್ಕುನಗಕುದುರೆ ಕೋಲ,ಕೊರಗ ಕೋಲ(ಕಾಲೆ ಕೋಲ) ನಲಿಪುವೆರುಗೆ. ಇಂಚ ಅಕ್ಲು ಉಡಲೆಗ್ (ಸೈತಿನಕ್ಲೆನ ದೂಪೆ ಪಂಡ ಸೈತಿನಕ್ಲೆನ ಉಡಲು) ಅರಿ ಬಿರ್ಕುದು ಬನ್ನಗ ಅಕ್ಲೆನ ಕೋಲಲಾ ಅಲ್ಪನೆ ಬಿರಿಯುಂಡುಗೆ. ಅಲ್ಪನೆ ಸೀರಿ, ಏಸ ಬಿಚ್ಚಾದು ಬರ್ಪುನಿಗೆ.
ಅಯಿರ್ದು ಬೊಕ್ಕ ಮಾತೆರ್ಲಾ ಇಲ್ಲಗು ಬರ್ಪೆರು. ಕುಟುಂಬದಕ್ಲು ಪಿದಾಯಿ ಜಾಲುಡು ಮೀದು ಉಂತೊಡು. ಗ್ರಾಮೊದಕ್ಲು ಬಾರೆದ
ಚೀತ್ ಇರೆಕೊರ್ಪೆರು. ಇರೆನ್ ಪಿಂಕಾದಡಿಟ್ಟು ದೀದು ಕುಲ್ಲೊಡು. (ಅಯಿಕ್ಕಾತ್ರ ಇತ್ತೆಲಾ ಪನ್ಪೆರು, ಪಿಂಕಾದಡಿಟ್ಟ್ ಬಾರೆದ ಇರೆ ಪಾಡುದ್ ಕುಲ್ಯರ ಬಲ್ಲಿಂದು, ಅವು ಬೊಜ್ಜದಾನಿ ಮಾತ್ರ ಕುಲ್ಲುನಿ) ಬೊಕ್ಕೊಂಜಿ ಬಾರೆದ ಚೀತ್ ಇರೆ ಕೊರ್ಪೆರು ಅಯಿನ್ ಕೈಟ್ ಪತೊಂದು ಕುಲ್ಲುವೆರು. ಆತ್ ಪೊರ್ತುಗು ಮಡ್ಯೆಲಣ್ಣೆರು ಶುದ್ದ ನೀರು ತಲಿಪು ಮಲ್ತೊಂದು ಬರ್ಪೆರ್. ವೊರ ಅಲಿಪು(ತಲಿಪು) ದೆತ್ತೊನಗ ಪಿಜಿರುದ್ ತಿರ್ಗೊಡು, ವೊರ ಎದುರು ತಿರ್ಗೊಡು. ಅಯಿರ್ದು ಬೊಕ್ಕ ಕೈಟ್ಟ್ ಇತ್ತಿನ ಚೀತ್ ಇರೆಕ್ಕ್ ಕುಂಬುಡದ ಕಜಿಪು, ಬಾರೆದ ಕಾಯಿದ ಕಜಿಪು ಚೂರು ಚೂರು ಪಾಡೊಂದು ಪೋಪೆರು.ಅಯಿನು ಮೂಜಿ ಸರ್ತಿಮಿಯಗಂಜಿ ಉನ್ಪ(ಬೊಜ್ಜದ ಗಂಜಿ) ಪಂಡುದು ಮೂಜಿ ಸರ್ತಿ ಪಂಡುದು ಉಂಡುದು, ಮೀದ್ ಬತ್ತುದು, ಅಯಿರ್ದು ಬೊಕ್ಕ ಇಲ್ಲುದ ಉಲಾಯಿ ಪೊಗ್ಗುನಿ.
ಅಯಿರ್ದು ಬೊಕ್ಕ ವೊರಿನ ಕ್ರಮ ಪೂರ
ಮಡಪಜೆಬಳಸುನಿ. (ಮಡಪಜೆ ಕ್ರಮ ಪೂರ ಇತ್ತೆಲಾ ಉಂಡು.ಅಯಿನ್ ವಿವರಣೆ ಮಲ್ಪುನ ಅಗತ್ಯ ಇಜ್ಜಿ ತೋಜುಂಡು. ಪತ್ತೊಂಜನೆ ಸಾವುದ ದಿನ ನೆಲಟ್ಟು ಪಜೆ ಪಾಡುದು, ಒಂಜಿ ಕೋರಿದ ಕಜಿಪು, ಪುಂಡಿ, ಪೂರ ಮಂತುದು ಅಗೆಲು ಪಾಡುದು ಪತ್ತೊಂಜಿ ಸೇರವುನೆ ಪನ್ಪೆರ್). ಅಂಚನೆ ಪದಿನಾಜನೆ ದಿನ ಪದಿನಾಜಿ ಪಾಡುನಿ. ಒಟ್ಟುಡ್ ಅಗೆಲುಗು ಪುಂಡಿ ಕೊರಿದ ಕಜಿಪು ಪ್ರಧಾನ ತೊಜುಂಡು.
ಒಟ್ಟುಡು ತೂಪುನಿ ಪಂಡ
ತುಳುವೆರೆ ಬೊಜ್ಜದ ಕ್ರಮ ವಿಶಿಷ್ಟವಾಯಿನ ಒಂಜಿ ಅಚರಣೆ ಪಂಡ ತಪ್ಪಾವಂದು.ಮುರಿಯೊ ಲೆಪ್ಪುನ,ನೀರನೆರೆಲು ಕಟ್ಟುನಿ,ದೆಲಗೂಡುಇಜಿಂಡನಿಲಗೂಡುಕಟ್ಟುನಿ,ಉಡಲುಗು ಅರಿ ಬಿರ್ಕುನವುತುಳುವೆರೆ ಬೊಜ್ಜಡು ನೆಗೆತ್ತುದು ತೋಜುನ ಕ್ರಮೊನು ನಮ ತೂವೊಲಿ. ಅಂಚನೆ ಸೈತಿನ ಇಲ್ಲಗು ಸಂಬಂಧದ ಇಲ್ಲರ್ದು,ಬೂದಿ ಬಾರೆದ ಕೈಲ್,ಬೂದಿ ಕುಂಬುಡದೊಟ್ಟು,ಇರೆ,ಅರಿಮುಡಿಸೇರುದು ನನತ್ ಸೊತ್ತುಲೆನ ಸರಕ್ಕು ಕೊರ್ಪಿನ,ಸರಕ್ಕ್ ತುಂಬುನಕ್ರಮ ಇತ್ತೆ ಇಜ್ಜಿ. ದಾಯೆ ಪಂಡ ಬಡತನ ಪನ್ಪಿನ ಯೆರೆಗುಲಾ ಇತ್ತೆ ಅತೊಂಜಿ ಇಜ್ಜಿ.ಅ ಪೊರ್ತುಡು ಹೊಂದಾಣಿಕೆ ಬೊಕ್ಕ ಸಹಬಾಳ್ವೆದ ಪ್ರತೀಕ ಈ ಸರಕ್ಕ್ ಕೊರ್ಪುನ.
ಬಡಕಾಯಿದ ಮರ್ಗಿಲುಡು
ಸುಡಾಲೆಗು ನುಪ್ಪು ದೀಯೆರುಂಡ, ತೆಂಕಾಯಿ ಭಾಗೊಡುಉಡಲೆಗು ಅರಿ ಬಿರ್ಕುನ ಕ್ರಮ. ಅಂಚದು ತುಳುನಾಡುದ ಬೊಜ್ಜದ ಕ್ರಮೊಟ್ಟುಲಾ ಊರು ಊರುಗು ಬದಲಾವಣೆ ಉಂಡು. ಈ ಬೊಜ್ಜದ ಕ್ರಮೊಟ್ಟುಕಕ್ಕೆಗ್ ನುಪ್ಪು ದೀಪುನ ಕ್ರಮಬಾರಿ ವಿರಳವಾದು ತೋಜುಂಡು. ಹೆಚ್ಚಾದು ಪಿರಾಕುಡು ತುಳುವೆರೆ ಕ್ರಮೊಟ್ಟು ಪತ್ತೊಂಜನೆ ದಿನೊಟ್ಟು ಬೊಜ್ಜ ಮಲ್ತುದು, ಅನಿಯೆ ಮಧ್ಯಾಹ್ನ ಇಜಿಂಡ ರಾತ್ರೆ ಪತ್ತೊಂಜಿ ಕೂಡಾದ್, ಪದಿನಾಜನೆ ದಿನೊ ಪದಿನಾಜಿ ಸೇರವುನ ಕ್ರಮ ಇತ್ತುಂಡು. ಬದಲಾವಣೆದ ಕಾಲೊಡು ಇತ್ತೆ ಪೂರಲಾ ಬದಲಾವೊಂದು ಬೈದುಂಡು. ನನ ಕೆಲವೆರು ಸೈತಿನಕ್ಲೆನ ಇಷ್ಟದ ವೊವ್ವು ಉಂಡು ಅಯಿನ್ ಅಕ್ಲೆನ ಪುದರುಡು ಮಲ್ಪುವೆರು, ಕೊರ್ದಟ್ಟ, ಬೊಂಟೆ ಇಂಚಿನ ಪೂರ. ಇಂಚತುಳುವೆರೆ ಬೊಜ್ಜ ಯಾ ಸಾವುದ ಕ್ರಮನಡಪುಂಡು. ಯಾನ್ ಆಯಿನತ್ ಕಿನ್ಯ ಮಲ್ತುದು ವಿಚಾರ ತೆರಿಪಾದೆ.ತಪ್ಪು ಇತ್ತುಂಡ ಮಾಪು ಇಪ್ಪಡು.
Share this postಸೊಲ್ಮೆಲು …
ಬರವು:
ಚಂದು