K Mahendranath Salethoor
ಕೆ ಮಹೇಂದ್ರನಾಥ್ ಸಾಲೆತ್ತೂರ್
ತುಳು ಸಾಹಿತ್ಯ ರತ್ನ, ಜೋಗಿ ಸಾಹಿತ್ಯ ಶ್ರೀ ಪ್ರಶಸ್ತಿ ಪುರಸ್ಕೃತೆರ್. ತುಳು - ಕನ್ನಡ ಕವಿ, ಸಾಹಿತಿ, ವಾಗ್ಮಿ, ವಿಮರ್ಶಕೆರ್.
Recent Posts:
- ಅಡ್ಡೂರ ದೇಬೆ, ಕುತ್ತಿಪುನ್ಕೆ ಉಳ್ಳೇರಗುತ್ತು - ಪಾರ್ದನ
- ತುಳುವೆರೆ ಮರಣಡು ಬೊಜ್ಜದ ಕ್ರಮ
- ದೀಪದೆಣ್ಣೆ
- ಬೈದ್ಯರು ಮತ್ತು ತುಳುನಾಡ ದೈವಗಳು
- ಕೋಟಿ ಚೆನ್ನಯರು ಮತ್ತು ಅವರ ಕುಟುಂಬ ದೈವಗಳ ವಿಷಯದಲ್ಲಿರುವ ಗೊಂದಲ
- ಎಣ್ಮೂರ ಕ್ರಮದಲ್ಲಿ ಆಗುತ್ತಿರುವ ಬೈದೇರುಗಳ ನೇಮ
ತುಳುನಾಡ್ ಪರಶುರಾಮ ಸೃಷ್ಟಿ ಅತ್ತ್
ಉಂದೆನ್ ನಿಕುಲು ಇಷ್ಟ ಆಂಡ ತೂಲೆ. ಇಜ್ಜಿಂಡ ಬಡ್ದು ಬುಡ್ಲೆ. ಎನ್ನ ಅಭಿಪ್ರಾಯ ನಿಕ್ಲೆನಾವೊಡುಂದು ಇಜ್ಜಿ.
ರಡ್ಡ್ ಸಾರ ವರ್ಸೊರ್ದುಲ ಪಿರಾಕ್ ಇತ್ತಿನ ತುಳು ಭಾಷೆದ ತುಳು ಪಂಡ
"ಮೆತ್ತೆನ", ನೀರ್ಡ್ ಸುತ್ತುವರಿನ, ಸಮಶೀತೋಷ್ಣವಾಯಿನ, ದಿಂಜಿದುಪ್ಪುನ ಪನ್ಪಿ ಅರ್ಥ ಉಂಡು. ಈ ಇಸಯೊನು ಬೆದ್ರದ 1431ತ ಶಾಸನ ಪನ್ಪುಂಡು. ಸಿರಿನ ಪಾರ್ದನೊಡು ಲೋಕನಾಡುಲಂಕೆಪನ್ಪಿ ಸಾಲ್ದ ಅರ್ಥ ತುಳುನಾಡುಗ್ ಬೊಕ್ಕ ಲಂಕೆಗುಪ್ಪಿನ ಸಮ್ಮಂದೊನು ತೆರಿಪಾವುಂಡು. ಕ್ರಿಸ್ತಪೂರ್ವ 272-232 ಮುಟ್ಟ ಆಲ್ನ ಅಶೋಕ ಚಕ್ರವರ್ತಿನ ಶಾಸನೊಡು ಪ್ರಾಕೃತ ಭಾಷೆಡುಪ್ಪುನ"ಸತಿಯ ಪುತ"ಸಂಸ್ಕೃತೊಡು"ಸಹಿಯ ಪುತ್ರ"=ಸಹ್ಯಾದ್ರಿಯ ತಪ್ಪಲುಪಂಡ ಸಹ್ಯಾದ್ರಿದ ಮುದೆಲ್ನ್ಡ್ ತೆರಿಯುಂಡು. ಸಿರಿ ಪಾರ್ದನದ ಆಧಾರೊಡು ತುಳುನಾಡುನ್ಸತ್ಯನಾಪುರಪನ್ಪೆರ್. ಸಹ್ಯಾದ್ರಿ ಪರ್ವತೋರ್ದೆ ಉಂದು ಬತ್ತಿನವುಂದು ಪನ್ಪೆರ್. ಇಂಚ ತೂವೊಂದು ಪೋಂಡ ತುಳುನಾಡ್ ದ ಪಿರಾಕ್ ನನಲಾತ್ ತಿಕ್ಕುಂಡು.ತುಳು ಭಾಷೆಪಂಚ ದ್ರಾವಿಡ ಭಾಷೆಲೆಡ್ ಸುರುತ ಭಾಷೆ. ಅವೆಕೊಂಜಿ ಸ್ವತಂತ್ರ ಲಿಪಿ ಉಂಡು. ಆಂಡ ಮಾತಾ ಭಾಷೆಲೆಗ್ ಕಾವ್ಯ ಸಾಹಿತ್ಯ ಉಂಡುಂಡು ಅವೆನ್ ಸಂವಿಧಾನ 8ನೇ ಪರಿಚ್ಚೇದೊಗು ಸೇರ್ಸಾಯೆರ್. ಆಂಡ ಮಾತೆಟ್ಲಾ ಶ್ರೀಮಂತ ಆಯಿನ ಸಾಹಿತ್ತಿಕ ಆಧಾರ ಕಮ್ಮಿ ಇತ್ತಿನ ಮೌಖಿಕ ಸಾಹಿತ್ಯದ ಶ್ರೀಮಂತಿಕೆ ಇತ್ತಿನ ತುಳು ಭಾಷೆನ್ ಈತನೇಟ ಏತ್ ಹೋರಾಟ ಆಂಡಲಾ 8ನೇ ಪರಿಚ್ಛೇದೊಗು ಸೇರಾಯ್ಜೆರ್. ಪೊರಾಂಬಾಟ ಇತ್ತೆಲ ನಡತೊಂದೇ ಉಂಡು. ತುಳುನಾಡ್ ಪರಶುರಾಮ ಸೃಷ್ಟಿ ಪಂದ್ ತುಳುನಾಡ ಒವ್ವೆಸಂಧಿ ಪಾರ್ದನೊಲೆಡಾವಡ್,ಕಲ್ಲ ಬರಾವುಲೆಡಾವಡ್,ತಾರಿದೊಲಿಕ್ಲೆಡಾವಡ್ ಮಾಯಿತಿ ತಿಕ್ಕುಜಿ. ಈ ಕತೆಕುಲು ಪುರಾಣ ಸತ್ಯೊಲು. ಪುರಾಣೊಡುದಂಡಕಾರಣ್ಯಬರ್ಪುಂಡು. ಆಂಡ ತುಳುನಾಡ್ ಡ್ ಅವು ಇಜ್ಜಾಂಡಾ?. ಪರಶುರಾಮನ ಕಥೆಟ್ ತುಳುನಾಡ್ದ ಬಗ್ಗೆ ಇಸಯ ತಿಕ್ಕುಜಿ. ಕಡಲ್ ಭೂಮಿನ್ ನಿಂಗುಂಡು ವಿನಃ ಬುಡು ಕೊರ್ತ್ನ ವೈಜ್ಞಾನಿಕ ದಾಖಲೆ ಇಜ್ಜಿ. ಕಡಲ್ ಜಾರ್ದ್ ಭೂಮಿ ಮಿತ್ತ್ ಬರ್ರೆಲ ಸಾಧ್ಯ ಇಜ್ಜಿ. ಪುರಾಣೊನು ಪ್ರಶ್ನೆ ಮಲ್ಪೆರೆ ಬಲ್ಲಿ ಪನ್ಪೆರ್. ಆಂಡ ತವ್ಲಾನಿಕವಾದ್ ಖಂಡಿತ ತೂವೊಲಿ.
ತುಳುನಾಡ್ ಪಡ್ಡೆಯಿ ಘಟ್ಟದ ಮುದೆಲ್. ಅಂಚಾದ್ ಘಟ್ಟದ ತಲನಾಡ್ನ್
"ತುಳುನಾಡ್"ನ್ದ್ ಲೆತ್ತೆರ್. ತುಳುನಾಡ್ ದ ಮಣ್ಣ್ ಮೆತ್ತೆನದ ಮಣ್ಣ್. ಅವ್ಲ್ ಕಾಲ ಕಾಲೊಗು ಬರ್ಸ ಬೂರುನೆರ್ದಾತ್ರ ಕಾಡ್ ಏತ್ಲಾ ಬುಲೆದಿತ್ತ್ದ್ ನಾಗರ ಉಚ್ಚುದಂಚಿ ಇಸ ಸರ್ಪೋಲು, ಮುರ್ಗೊಲು ಇತ್ತ. ನಾಗರ ಉಚ್ಚುಲು ಬಾರ್ಯಾತ್ ಇತ್ತನೆರ್ದಾತ್ರ ತುಳುನಾಡುನ್ನಾಗರಖಂಡಪಂಪೆರ್.ತಾಳವಪಂಡ ತಾರಿಲು ಬಾರ್ಯಾತ್ ಇತ್ತ್ ನೆರ್ದಾತ್ರತಾಳವನಾಡುತುಳುನಾಡು ಆಂಡ್ ಗೆ. ಪಾತಾಲಡ್ ನಾಗೆರ್ ಉಪ್ಪುನಿ. ಪಾತಾಳ ಪಂಡ ಘಟ್ಟದ ಮುದೆಲ್. ಅಂಚಾದ್ ನಾಗರಖಂಡ ಪುದರ್ ಬತ್ತಿಪ್ಪೊಡು. ಮುಲ್ತ ಮೂಲ ಜನಾಂಗ ಕಾಡ ಬರಿಟ್ ಗುಡ್ಚಿಲ್ಡ್ ಬದ್ಕೊಂತ್ನ ಆದಿಮ ಜನಾಂಗ. ಇನಿಲಾ ತುಳುನಾಡ ಮೂಲ ನಿವಾಸಿಲ್ನ ತುಳು ಭಾಷೆ, ಅಕ್ಲ್ ನಮನ್ ಎದ್ಕೊನ್ನಗ ಪಾತೆರುನ ತುಳು ಭಾಷೆ ಇತ್ತೆದ ಜನೊಕ್ಲೆಡ ಬರ್ರೆ ಸಾಧ್ಯ ಇಜ್ಜಿ.
ಕಾಡಬೆದ್ರ್ ತಾರಿದ ಮಡಲ್ ಸೋಗೆಲೆಡ್ ಇಲ್ಲ್ ಕಟ್ಟೊಂಡೆರ್. ಮರಕಿರೆಂಗ್, ಕಾಡ ಕಂಡೆಲು, ಕಲಿ, ಇರೊಲು ತಿಂದ್ದ್ ಬದ್ಕೊಂಡೆರ್.
ಆದಿಮ ಜನಾಂಗಕಾಡುಡ್ ವಾಸ ಮಲ್ಪೆರೆ ಸುರು ಮಲ್ತೆರ್. ಸುರುಕಾದ್ ತುಳುಕಾಡ್ ದ ಗುಡ್ಡೆ ಜೇರೊಲೆಡ್ ಕುಡುನು ಬಿತ್ಯೆರ್. ಇನಿಕ್ಲಾ ತುಳುನಾಡ ಮೂಲ ಆಲಡೆಲೆಡ್ ಸುರುತ ಮಾನಾದಿಗೆ ಇತ್ತಿನ ಬುಳೆಯಾಯಿನಕುಡುಸಮರ್ಪಣೆ ಮಲ್ಪುನ ಕಿರಮ ಉಂಡು. ನಾಗಾರಾಧನೆರ್ದ್ ಬೊಕ್ಕ ದೈವಾರಾಧನೆದ ಮೂಲದವುಆಲಡೆಲು. ಪ್ರಕೃತಿ ಆರಾಧಕೆರಾಯಿನ ಈ ಆದಿಮ ಜನಾಂಗದಕ್ಲ್ ಒಡಕೋಂಟು ಇತ್ತಿನ ಭೂಮಿನ್ ಕಟ್ಟ ಪುಣಿ ಕಡ್ತ್ದ್ ನೀರ್ ಸರಿಯಾದ್ ಪರತ್ ಪೋಪುಲೆಕ ಮಲ್ತೆರ್. ಅಂಚಿಂಚಿ ಗರ್ತ್ ದ್ ಬೈಲ್ ಕಂಡ ಮಲ್ದೆರ್. ಕಾಡ ಗೋಣನಕ್ಲೆನ್ ಪತ್ತ್ದ್ ಬುದ್ದಿ ಕಲ್ಪಾದ್ ಕುಡು ತಿಂರೆ ಕೊರ್ದು ದತ್ತೆರ್.ತುಳುನಾಡ ಭೂಮಿಡ್ ಮಲ್ತ್ನ ಬುಲೆನ್ಕುಮೆರಿ ಬುಳೆಪಂಪೆರ್. ಸುರುತ ಬಿತ್ತ್ಅತಿಕಾರೆಪನ್ಪಿ ಬಿತ್ತ್. ಉಂದೆತ ನೆಂಪುಗಾದ್ ಇನಿಲಾ ದೈವ ಭೂತದ ಕೋಲೊಡು ಮೈಸಂದಾಯಗ್ ಸುರುತ ಮಾನಾದಿಗೆ. ಆತೇ ಅತ್ತ್ ಅವೆಕ್ ಆವರಲಾ ಕುಡುವೇ. ಕಂಡಲೆಡ್ ಬಾರ್ ಬಿತ್ತ್ದ್ ಉಜ್ಜೆರ್ಡ್ ಎಡ್ತ್ದ್ ಅರಿ ಮಲ್ಪುವೆರ್. ಈ"ಕುಡು-ಅರಿ"ಡ್ದಾಯಿನ ತುಳು ಕಾಡೇ ತುಳುನಾಡ್. ಪರಶು ರಾಮನ ಕೈತ ಮಡು ಪಂಡ ಕುಡರಿ ದಕ್ಕ್ದ್ ಕಡಲ್ ಜಾರ್ದ್ ತುಳುನಾಡ್ ಆಯಿನತ್ತ್. ಅಂಚಾತುಂಡ ಈ ನಮುನೆ ಕಡಲ್ ಭೂಮಿನ್ ಕುರೆದ್ ತಿಂತಂದ್.
ಭೂಮಿ ದುಂಬೇ ಪುಟ್ಟಿನವು. ತುಳು ಕಾಡುಡ್ ಕುಡು ಅರಿ ಬಿತ್ತ್ದ್ ತುಳುನಾಡುನ್ ಸೃಷ್ಟಿ ಮಲ್ತನವು ಇಸೇಸನೆ. ಕುಡು ಅರಿರ್ದ್ ತುಳುನಾಡ್ ಸೃಷ್ಟಿ ಆಂಡ್,
ಕೆಡ್ಡಸಸುರುತ ಪರ್ಬೊ ಆಂಡ್. ಕಾಡ ವಾಸ ಕಾಡ್ವಾಸ ಆದ್ ಕೆಡ್ವಾಸ ಕೆಡ್ಡಸ ಆಂಡ್. ಬೋಂಟೆ ಸಂಸ್ಕೃತಿದ ಒರುವಾದ್ ಕೆಡ್ಡಸ ನಮಕ್ ತೋಜುಂಡು. ಕೆಡ್ಡಸದಪಗಕುಂಡಕೋರಿಗ್ಜರಗೆ. ಅಂಚ ಅವು ಸುಲಬೊಡು ಬೋಂಟೆಗ್ ತಿಕುಂಡುಗೆ. ಆನಿ ನನ್ನೆರಿ ಮಲ್ಪುವ. ಒಂಜಿ ಕಡೆಟ್ ಅರಸೊತ್ತಿಗೆದ ಅಕ್ರಮನೊಡು ತುಳುನಾಡ ಸಂಪೊತ್ತು ನಾಶ ಆಂಡ ಕುಡೊಂಜಿ ಕಡೆಟ್ ಭಾವನಾತ್ಮಕ ವಾದ್ ಭೂಮಿ ಪೋಂಡು. ಉಂದು ಧಾರ್ಮಿಕ ಸಂಘರ್ಷ. ಪರಶುರಾಮಗ್ ಬೆಳ್ತಂಗಡಿ ಉಜಿರೆ ಮುಂಡಾಜೆಡ್ ಪಂಡ ಘಟ್ಟದ ಮುದೆಲ್ಡೊಂಜಿ ದೇವಲ್ಯ ಬುಡುಂಡ ಬೇತೆ ತುಳುನಾಡ್ ಡ್ ಓಲ್ಲಾ ದೇವಲ್ಯ ಇಜ್ಜಿ. ಪರಶುರಾಮೆ ಕದಿರೆಡ್ ತಪಸ್ಸ್ ಮಲ್ತೆ ಪಂಡ ಕೆಲವೆರ್ ಕುಂಜಾರುಗಿರಿಟ್ ತಪಸ್ಸು ಮಲ್ತೆ ಪನ್ಪೆರ್. ಅಪಗ ತುಳುನಾಡ್ ಪರಶುರಾಮೆ ಬರ್ಪುನ ದುಂಬೇ ಇತ್ತ್ ಲೆಕಾಂಡ್. ಅಂಚನೆ ಕುಟಚಾದ್ರಿ ಕುಂಜಾರಗಿರಿ ಮಾರ್ಕಂಡೇಯ ಪುರಾನೊಡೇ ಉಂಡು. ವೇದ ಹರಿವಂಶದ ಕಾಳೋದೆ ಕಾಲೊಡೆ ತುಳುನಾಡ್ ಇತ್ತಿನಡನ್ದ್ ಗೋವಿಂದ ಪೈಕುಲು ಪನ್ತೇರ್.
ತುಳುನಾಡ ಭೂಮಿ ಪುತ್ರೆ
ಬಲಿಯೇಂದ್ರೆ. ಆಯಗ್ಲಾ ತುಳು ಮಣ್ಣ್ ಗ್ಲಾ ಸಮ್ಮಂದ ಉಂಡು.ಅಯನ್ ವರ್ಸೊಗು ಆಟಿದ ಅಮಾಸೆಗ್, ಸೋನದ ಸಂಕ್ರಾಂತಿಗ್, ಬೊಂತೆಲ್ದ ಕೊಡಿ ಪರ್ಬೊಗುಂದು ಮೂಜಿ ಸರ್ತಿ ಲೆಪ್ಪುವ.ಆಯೆ ಭೂಮಿ ಪುತ್ರೇ. ದ್ರಾವಿಡ ಅರಸೊತ್ತಿಗೆದಾಯೆ. ಅರಿಬಾರ್ ಸಂಸ್ಕೃತಿದ ಪೊಲಿ ಪುಲ್ಸು ಬಲಿಯೇಂದ್ರೆ. ದ್ರಾವಿಡ ಸಂಸ್ಕ್ರ್ ತಿನ್ ಆರ್ಯ ಸಂಸ್ಕೃತಿ ದೊಂಕಿ ನೆನ್ ಬಲಿ ವಾಮನ ಕಥೆಟ್ ತೂವೊಲಿ. ಬಲಿನ್ ತುಳುವೆರ್, ಮಲಯಾಳಿಲು, ತಮಿಳೆರ್ ಮಾನಿತೊನ್ವೆರ್. ಮಲಯಾಳಿಲು ಬಲಿನ್ವಲಿಯೆಟ್ಟನ್ಪಂಪೆರ್. ಸೊರ್ಗೊರ್ದು ಮಿತ್ತ ಸಿರಿಸಂಪೊತ್ತು ಆಯನವಾದಿತ್ತ್ನವೇ ಆಯಗ್ ಮುಲ್ಲಾಂಡ್. ಆಯನ ದಾನ ಧರ್ಮದ ಗುಣನೇ ಆಯನ್ ಪಾತಾಲೊಗು ಸೇರಾಂಡ್. ಬಲಿ ಚಕ್ರವರ್ತಿ ಜನೊಕ್ಲೆನ್, ಭೂಮಿನ್ ಮೋಕೆ ಮಲ್ತನೆರ್ದಾತ್ರ ಆಯನ್ ಇನಿಲಾ ತುಳುವೆರಾಯಿನ ನಮ ಪರ್ಬದಪಗ ಇಲ್ಲದ ಜಾಲ್ಗ್ ಅಂಬಿ ಅಡ್ತ್ದ್ ತುಡರ್ ಅರ್ಲಾದ್ ಇಲ್ಲಗ್ ಲೆಪ್ಪುವ. ಬಲೆಕಿ ಮರಟ್ ತುಡರ್ ಅರ್ಲಾದ್ ಬಜಿಲ್ ದೀದ್ ಬಲಿನ್ ಲೆಪ್ಪುವ. ಬಲಿ ಅರಸು ತುಳುನಾಡುಗ್ ಬನ್ನಗ ಓಲ್ಲಾ ಬೇನೆ ಬೇಜಾರ್ ಉಪ್ಪೆರೆ ಬಲ್ಲಿಗೆ. ಮಾತೆರ್ಲ ಕುಸಿಟುಪ್ಪೊಡುಗೆ. ನಮ ಬೇಜಾರ್ಡ್ ಇತ್ತಿನದ ಆಯಗ್ಲಾ ಬೇಜಾರಂದ್ ತೆರಿದ್ ನಮ ಆಯಗ್ ಕೊಸಿ ಆಯೆರೆ ಪರ್ಬ ಮಲ್ಪುವ. ಕಣಿ ದೀದ್ ಪೊಲಿ ಲೆಪ್ಪುವ. ನುಗ ನಾಯೆರ್ಗ್ ಬಂಧ ರಟ್ಟಾವ. ಉಂದೆನ್ ತೂನಗ ತುಳುನಾಡ್ ಇತ್ತೆಲ ಸಿರಿ ಸಂಪೊತ್ತುದ ನಾಡಾದುಂಡುಂಡು ಬಲಿಕ್ ಖುಷಿಯಾಪುಂಡು.
ಭಾಷಣ, ಬರವು, ಆಟ, ಸಿನೆಮೊಡು ಪರಶುರಾಮೆ ತೋಜಿದ್ ಬರ್ಪೆ. ಇಂಚಿಪ್ಪದ ಪತ್ತ್ ಪದಿನೈನ್ ವರ್ಷದ ದೈವದ ಪಾರಿಲೆಡ್, ಪೇಂಟೆದಕ್ಲೆ ಬಾಸನದ ಸುರುಟು ಪರಶುರಾಮೆ ತೋಜಿದ್ ಬರ್ಪೆ ಬೇತೆ ಸಂದಿ ಪಾರ್ದನೊಡು ಓಲ್ಲಾ ಪರಶುರಾಮನ ನೇರ್ಪು ತುಳುವೆರೆಗಾಪುಜಿ.ಬೆರ್ಮೆರೆ ಸಂದಿಡ್ ಬರ್ಪಿ ಪ್ರಕಾರ
"ಮಿತ್ತ ಮೇಗಿಮ ಲೋಕೊಡು ಸೂರ್ಯ ದೇವೆರ್ ಉಂಡಾನಗ, ತಿರ್ತ ಸಿರಿಬಾರಿ ಲೋಕ ಬೂಮಿ ಉಂಡಾಂಡ್.ಏಳ್ ಕಡಲ್ದ ನಡುಟು ಉಂಡಾಯಿನ ಬೆರ್ಮೆರ್ ತುಳುನಾಡುನ್ ಉಂಡು ಮಲ್ತೆರ್"ನ್ದ್ ಬರ್ಪುಂಡು. ನನಲ ದುಂಪೋದು ಈ ಪಾಡ್ದನ"ಇಂಚ ಉಂಡಾಯಿ ಬೆರ್ಮೆರ್ ತನ್ನ ಒಟ್ಟಿಗೆ ಬೂಮಿ ಉಂಡಾನಗ ಎಲ್ವೆರ್ ಸಿರಿಕುಲು, ಒರಿ ಕುಮಾರನ್, ಸರ್ಪ ಕುಲ, ನಾಗ ಕುಲ, ನಾಲ್ ಕಾರ ಮೈಸಂದಾಯನ್, ಬೂಮಿ ಬಾರಗೆ ಬಾಲೆ ಕನ್ಯಾವು ಲೆಕ್ಕೆಸಿರಿನ್ ಉಂಡು ಮಲ್ತ್ದ್ ಕದಿಕೆ ಉಂಡಾಪಿ ಕಾಲೊಡು ಪಂಜುರ್ಲಿ, ಪಿಲ್ಚಂಡಿ, ಜುಮಾದಿ, ಉಳ್ಳಾಯೆ, ಉಳ್ಳಾಲ್ದಿನ್ ಉಂಡು ಮಲ್ತೆರ್"ನ್ದ್ ಪುರಾಣ ದೇವೆರ್ ತುಳುನಾಡುಗ್ ಬರ್ಪುನ ದುಂಬುದ ದೈವೊಲ್ನ ಸಂದಿ ಪಾಡ್ದನ ಪನ್ಪಂಡು.
ಆಂಡ ಸಾರ ವರ್ಸ ದುಂಬುದ ಪಂಜುರ್ಲಿ ಪಾರ್ದನೊಡು ತುಳು ಭೂಮಿ ಎಂಚಾಂಡ್ ಪನ್ಪಿ ವಿವರ ಉಂಡು. ಪಿರಾಕ್ಡ್ ಜಾತಿ ಇಜ್ಜಾನ್ಡ್. ಪಿರಾಕ್ದ ಬಲಿ ಪಂಡ
"ಬರಿ", ಪಂಡ ವಂಶಾವಳಿ. ಒಂಜೇ ಬರಿ ಬೇತೆ ಬೇತೆ ಜಾತಿಡುಪ್ಪುಂಡು.ವಿಷ್ಣುನ ಅವತಾರ ಲೆಕ್ಕೊಡು ತೂಂಡಲ ವಾಮನಾವತಾರ 5ನೇ ಅವತಾರ.ಪರಶುರಾಮನವು 6ನೇ ಅವತಾರ.ಅಂಚಾದ್ ಬಲಿ ಚಕ್ರವರ್ತಿನ ಮೋಕೆದ ತುಳುನಾಡ್ ಪರಶುರಾಮರ್ದ್ ದುಂಬುದವು ಪನ್ಪುನವು ಸತ್ಯ.ವಾಮನೆ ಸುರುಕು ಬೊಕ್ಕ ಪರಶುರಾಮೆ ತುಳುನಾಡುನ್ ಉಲಕೈ ಮಳ್ತೊಂಡೆರ್.ಕಡಲ ರಾಜೆ ಪರಶುರಾಮಗ್ ದಾನ ಕೊರ್ನ ತುಳುನಾಡ್ ಪಂಡ ಬಲಿಚಕ್ರವರ್ತಿ ಕಡಲ ಬರಿತ ಅರಸುನ್ದು ತೆರಿಯು.ಆಯನ್ ವಾಮನೆ ಕದಲ್ಗ್ ನೂಕ್ಯೆ. ಇತ್ತಿನ ಭೂಮಿನೇ ಮರುಸೃಷ್ಟಿ ಮಲ್ತಿನಾಯೆ ಪರಶುರಾಮೆಂದ್"ತುಳುನಾಡ್ ಪರಶುರಾಮ ಸೃಷ್ಟಿ"ನ್ದ್ ಮುಗ್ದ ತುಳುವೆರೆನ್ ನಂಬಯೆರ್.ಬಲಿಯೇಂದ್ರ ಸಂದಿಡ್ ಅಕ್ಲೆ ಸೈನ್ಯದ ಒಟ್ಟುಗು ಕುಡರಿ ಗಲಸೊನ್ತೆರ್ನ್ದ್ ಇಚಾರೊ ಬರ್ಪುಂಡು. ಒಂಜಿ ವೇಳೆ ತುಳುನಾಡ್ ಪರಶುರಾಮ ಸೃಷ್ಠಿಯಂಡ ಸಂಧಿ ಸಂಧಿ ಪಾರ್ದನೊಲೆಡ್, ತಾರಿದೊಲಿ ಬರವುಲೆಡ್, ತಾಮ್ರ ಶಾಸನೊಲೆಡ್ ಉಪ್ಪೊಡಾಂಡ್. ಅಪಗ ಪಾರ್ದನದ ಬಿರ್ಮೆರೆ ಬದಲ್ ಪರಶುರಾಮೆ ಉಪ್ಪೊಡಾಂಡ್.
ಸುಮಾರ್ 1600 ವರ್ಸೊರ್ದು ದುಂಬು ಪಂಡ ಮೌರ್ಯ ಅರಸೊಳಿಗೆದ ಕಾಲೊಡು ಘಟ್ಟ ಜತ್ತ್ದ್ ತುಳುನಾಡುಗ್ ವೈದಿಕತೆ ಬರ್ಪುನ ದುಂಬು ತುಳುವೆರೆಗ್ ದೈವೊಲೆನ್ ಬುಡ್ದು ವಾ ದೇವೆರೆ ಪೊಲಬುಲ ಇಜ್ಜಾನ್ಡ್. ತುಳುವೆರ್ ಬಾನದ ಸೂರ್ಯ ದೇವೆರೆನ್ ಬೊಕ್ಕ ಪ್ರಕೃತಿ ಪಂಡ ಬೂಮಿನ್ ಬೊಕ್ಕ ದೈವಲ, ದೇವೆರ್ಲಾ ಆದ್ ನಂಬೊಂತ್ನಿ ಬೆರ್ಮೆರೆನ್. ಅಕ್ಲ್ ದೈವೊಗು ಮಾನಾದಿಗೆ ಕೊರ್ನಕುಲು.ಈ ಇಚಾರ
"ದೈವ ದೇವೆರ್ ದೀಲೆಕಾಪುಂಡು"ಪನ್ಪುನ ಸಾಲ್ಡೇ ನಂಕ್ ತೆರಿಯುಂಡು. ವೈದಿಕ ದೇವೆರ್ ತುಳುನಾಡುಗ್ ಬನ್ನಗ ಅವೈದಿಕ ತುಳುವೆರೆಗ್ ಅವು ಇಷ್ಟ ಆದ್ ವೇದ, ಶಾಸ್ತ್ರ, ಪುರಾಣ ಉಂದೆಕ್ ತುಳುವೆರ್ ಮಾನಾದಿಗೆ ಕೊರೊಂದು ಬತ್ತೆರ್.ಆಂಡ ಬತ್ತಿನ ಅಕುಲು ದೈವಾರಾಧನೆನ್ ದೇವೆರೆ ಒರುಟು ತೂದು ದೈವೊಲೆಗ್ ಮಂತ್ರ ತಂತ್ರ ಇಜ್ಜಾನ್ದಿ ದೈವೊಲೆಗ್ ಓಮ ಪೂಜೆ ಕಲಶ ಸುರು ಮಲ್ದೆರ್.ದೈವದ ಸಂಧಿ ಪಾಡ್ಡನೊಲು ಮಯಕಾದ್ ದೈವದ ನುಡಿತ ಮಿತ್ತ್ ತುಳುವೆರೆಗ್ ನಂಬೊಳಿಗೆ ದಾಂತೆ ಅಡೆ ಅಷ್ಟಮಂಗಲ ಇಂಚಿಪ್ಪಿ ಪ್ರಶ್ನೆ ಚಿಂತನೆಲು ಬತ್ತ್ದ್ ದೈವೊಲು ಕಲೊರ್ದು ಮಯಕಾದ್ ಪೋಯಿಲೆಕ ತೋಜುಂಡು. ಇಂಚಾದ್ ಬೆರ್ಮೆರ್ ಉಂಡು ಮಲ್ತಿ ತುಳುನಾಡುನ್ ಮೊಕ್ಲು ಪರಶುರಾಮೆ ಉಂಡುಮಲ್ತಿ ತುಳುನಾಡ್ ನ್ದ್ ಪನೊಂದು ಬತ್ತೆರ್.ತುಳುವೆರ್ ಅವೆನೆ ನಂಬ್ಯೆರ್. ಬೆರ್ಮೆರ್ ಉಂಡುಮಲ್ತಿ ತುಳುನಾಡ್ ತುಳುವೆರೆ ನೆಂಪುರ್ದು ಮಯಕಾದ್ ಪೋಂಡು.ಬೆರ್ಮೆರ್ ವೈದಿಕ ಚತುರ್ಮುಖ ಬ್ರಹ್ಮ ಆದ್ ಪೋಯೆರ್. ಬೆರ್ಮೆರೆ ಆಲಡೆಲು ಬ್ರಹ್ಮ ಸನ್ನಿದಿಲಾಯ. ಆತೇ ಅತ್ತ್ ಎರಿಯಾಕ್ಲು ದೀನ ದೈವದ ಪುದರ್ನ್ ಪೂರಾ ಬದಲ್ತ್ದ್ ದೀಪುನೊಟ್ಟುಗು ಆನ್ ದೈವೊಲೆನ್ ಪೂರ ಪೊಣ್ಣು ದೈವೊಲಾದ್ ಮಲ್ತೆರ್. ಕೊಲಗೊಡು ಪೊರುಮ್ಬುನ ಬೀರೆರ್ನ ಬೆದೆ ಕವಚ ಮೊಕ್ಲೆಗ್ ಬೆದೆ ಕಟ್ಟ/ಮಿರೆಕಟ್ಟಾದ್ ತೋಜಿಂಡ್.
ಘಟ್ಟದ ಮುದೆಲ್ಡ್ ಕಾಡ್ ಬುಲೆದಿತ್ತ್ದ್ ಆ ಕಾಡ್ ಕಡ್ಪೆರೆ ಒವ್ವಾ ಒಂಜಿ ಕರ್ಬೊದ ಆಯುಧೋನು ತುಳುವೆರ್ ನಾಡ್ ಪತ್ಯೆರ್. ಅವೆನ್
ಕುಡರಿಪಂದ್ ಲೆತ್ತೆರ್. ಕಾಡ್ ಕಡ್ ತೊಂದು ಬನ್ನಗ ಮರಿತಂಚಿನ ಇಸ ಜಂತುಲೆನ್ ತೂದು ಸಯ್ತ್ ನೆನ್ ನರಮನ್ಯನ್ ಕವುಂತಲೆಕ ಕವುಂತೆ. ಪೊರ್ಲ ಜಿಡೆತ ಮರಿ ಆಯಗ್ ಇಸೇಸ ಆದ್ ತೋಜಿನೆರ್ದಾತ್ರ ಅವೆನ್ ಒಂಜಿ ಶಕ್ತಿಯಾದ್ ನಂಬಿಯೆ. ಬುಲೆಕ್ಲೆಗ್ ತೊಂದರೆ ಮಲ್ತೊನ್ತನ ಪಿಲಿ, ಪಂಜಿ, ಕಾಟಿ ನ್ಪಿಲ್ಚಂಡಿಯಾದ್,ಪಂಜುರ್ಲಿಯಾದ್,ಮೈಸಂದಾಯೆಆದ್ ನಂಬಿಯೆ. ನೀರ್ದ ಮುದಲೆ ಅಪಾಯಂದ್ ತೆರಿನ ಆಯೆಲೆಕ್ಕೆಸಿರಿಯಾದ್ನಂಬಿಯೆ. ಬರೀ ಬೇಗ ಪಾರುನ ಬೊಲ್ ಕಂದ ಡಿನ್ಗುಳಿಗೆಆದ್ ತೂಯೆ. ಭೂಮಿದ ಅಡಿಟ್ ಇತ್ತಿನ ಕುಡು ಅರಿಟ್ ತುಳುನಾಡುನ್ ಸೃಷ್ಟಿ ಮಲ್ತಿನ ಹಿರಿಯೆರೆನ್ಬೂತೊಲಾದ್ತೂಯೆ. ಅಂಚ ಬೂತಾರಾಧನೆ ಸುರು ಆಂಡ್. ವೈಷ್ಣವೆರೆ ದೇವೆರ್ ತುಳುನಾಡುಗ್ ಬತ್ತಿ ಬೊಕ್ಕ ಬೂತೊಲು ದೈವೊಲಾಯ. ಅಕ್ಲ್ ನರಮಾನ್ಯನ್ ಪೊತ್ತಯಿಲೆಕ ಉಚ್ಚುನ್ಲಾ ಪೊತ್ತಾಯೆರೆ ಸುರು ಮಲ್ತೆರ್.
ಮೂಲ
ಸ್ಕಂದ ಪುರಾಣೊಡ್ಲಾಪರಶುರಾಮ ಸೃಷ್ಟಿ ತುಳುನಾಡ್ ನ್ದ್ ಉಲ್ಲೇಖ ಇಜ್ಜಿ. ತುಳುನಾಡುನ್ ಸೃಷ್ಟಿ ಮಲ್ತಿನವು ಪರಶುರಾಮೆ ಪಂದ್ದಾಂಡ ಭೂಮಿಗ್ ಏಳ್ ಸುತ್ತು ಬತ್ತ್ದ್ ಅರಸುನಕ್ಲೆನ್ ನಾಶ ಮಲ್ದಿನ ಕುಡರಿನ್ ಪರಶುರಾಮೆ ದಕ್ಕಂದೆ ಡೀತುವೆ. ಆತೇ ಅತ್ತ್ ಮಂತ್ರಸಿದ್ಧಿ ಇತ್ತಿನ ಪರಶುರಾಮಗ್ ಕುಡರಿ ದಕ್ಕ್ದ್ ಕಡಲ್ ಜಾರವುನ ಅನಿವಾರ್ಯತೆಲ ಇಜ್ಜಾನ್ಡ್. ಬೂಮೀಗ್ 24 ಸುತ್ತು ಬತ್ತ್ದ್ ಕ್ಷತ್ರಿಯ ಕುಲೊನೆ ನಾಶ ಮಲ್ತೆನ್ದ್ ಕಥೆ ಪಂಡ ಕ್ಷತ್ರಿಯ ಅರಸುಲು ಇಂಚಿಪ್ಪ ಮುಟ್ಟ ಎಂಚ ಅರಸೊಳಿಗೆ ಮಲ್ಪೆರೆ ಸಾಧ್ಯ ಆಯಿನಿ? ನನೊಂಜಿ ಕಥೇತ ಪ್ರಕಾರ ಗೋಕರ್ಣಡ್ ಉಂತುದು ಪರಶುರಾಮೆ ಕುಡರಿ ಬೀಜಾಯಿನಾತ್ ದೂರ ಕಡಲ್ ಜಾರ್ನ್ಡ್ ಪಂಡ ಗೋಕರ್ಣರ್ದಂಚಿ ಮುಟ್ಟಲ ತುಳುನಾಡ್ ಇತ್ತಿನಡ್ ಪಂಡ್ ದ್ ತೆರಿಯುಂಡು. ಪರಶುರಾಮೆನೆ ತುಳುನಾಡುನ್ ಉಂಡು ಮಲ್ತುದುಂಡ ನಾಗಬನೊಕ್ಲು [ಇನಿ ನಾಗಬನೊಕ್ಲು ನಾಶ ಆದ್ ಸಿಮೆಂಟ್ದ ನಾಗಕಟ್ಟೆಲು ಬೈದ], ಬೂತಸಾನೊಲು [ದೇವತಾರಾಧನೆರ್ದ್ ಬೊಕ್ಕ ದೇವೆರೆಗ್ ವಿರುದ್ದವಾದ್ ದೈವಸಾನೊಲು ], ಆಲಡೆಲು, ಗರೊಡಿಲು, ಬೆಮ್ಮೆರೆ ಸಾನೊಲು, ನಾಗನ ಕಲ್ಲುಲು, ಬೂತದ ಕಲ್ಲುಲು ಖಂಡಿತಾ ಇತ್ತುದಯ. ಪರಶುರಾಮನ ದೇವಸಾನೊಲು ಇತ್ತುದುವ.ತುಳುನಾಡ ಅರಸುಲು ಶೈವ, ವೈಷ್ಣವ, ಶಾಕ್ತ ದೇವಾಲ್ಯೊನು ಕಟ್ಟಾಯೆರ್ ವಿನಃ ಪರಶುರಾಮಗ್ ಸಾನ ಕಟ್ಟದ್ಜೆರ್. ತುಳುವೆರೆ ಕುಲದೈವ ಬೆರ್ಮೆರೆ ಆಲಡೆಡ್ ಪರಶುರಾಮನ್ ನಂಬುದಿಜೆರ್. ಬಲಿ ಚಕ್ರವರ್ತಿರ್ದ್ ದುಂಬೇ ತುಳುನಾಡ್ ಡ್ ಬೆಮ್ಮೆರೆ ಆರಾಧನೆ ಇತ್ತ್ ನ್ಡ್.ಆಚಾರ್ಯ ಮದ್ವೆರ್, ವಾದಿರಾಜೆರ್ವಿಷ್ಣುನ ನನೊಂಜಿ ಅವತಾರದ ಪರಶುರಾಮೆ ತುಳುನಾಡುನ್ ಉಂಡು ಮಲ್ತುದುಂಡ ಒಲಾಂಡ್ಲ ತೆರಿಪಾದುವೆರ್.ಕಾಶಿ ಧರ್ಮ ಸಂಸತ್ದ ಇತಿಹಾಸ ಪಂಡಿತೆರ್ ಪರಶುರಾಮ ಸೃಷ್ಟಿ ಸುಳ್ಳು ಪಂತೆರ್.ಒಡಿಪು ಬೊಕ್ಕ ಕುಕ್ಕೆದಇತಿಹಾಸಜ್ಞೆರ್ಲಾ ಪರಶುರಾಮ ಸೃಷ್ಟಿದ ಕತೆನ್ ಒತ್ತೊನುಜೆರ್. ತುಳುವೆರ್ ಕುಟುಮೊಡಾವಡ್, ಕುಟುಮೊದ ನಾಗನ ಕಟ್ಟೆಡಾವಡ್ ಪರಶುರಾಮನ್ ನಂಬಿಜೆರ್.
ತುಳುನಾಡ್ ಸಮುದ್ರ ಆದ್ ಇಪ್ಪೆದ್ನ್ಡ್. ಪರಶುರಾಮೆ ಘಟ್ಟದ ಮಿತ್ತ್ ಉಂತ್ದ್ ಕುಡರಿ ದಕ್ಕ್ದ್ ತುಳುನಾಡ್ ಉಂಡಾಂಡ್ ನ್ದ್ ಪಂಡೆರ್. ಆರ್ಯೆರ್ ದೇವೆರಂದ್ ತೆರಿನ ಶೂದ್ರೇರೆನ್ ತುಳು ಗೊತ್ತಿಜ್ಜಂದಿ ಆರ್ಯೆರ್
ಕುಡು ಅರಿನ್ಕೊಡಲಿದ ರೂಪೊಡು ಕುಡರಿಂದ್ ಪನ್ಪಾಯೆರ್. ದೈವ ಬೂತೊಲೆ ಆರಾಧಾನೆನ್ ತಗ್ಗಾದ್ ದೇವೆರೆ ಆರಾಧನೆ ಮಲ್ಪೆರೆ ತುಳುವೆರೆನ್ ಮೊಕ್ಲು ಇಂಚ ನಂಬಾಯೆರ್. ತುಳುವೆರ್ ತನ್ನ ಬದ್ಕ್ ಆಯಿನ ಕುಡು ಅರಿನ್ ಮದತೆರ್. ಪರಶುರಾಮನ ಕುಡರಿನ್ ನಂಬ್ಯೆರ್. ಇನಿಲಾ ಅಂಚನೆ ತುಳುನಾಡ್ ಪರಶುರಾಮ ಸೃಷ್ಟಿನ್ದೆ ಒರಿದ್ನ್ಡ್.ಪಂಜುರ್ಲಿನ ಸಿರಿನ ಬೆರ್ಮೆರ್ನ ಬೈದ್ಯೆರ್ನಪಾರ್ದನೊಲೆಡ್ ಪರಶುರಾಮನ ಉಲ್ಲೇಖ ಇಜ್ಜಿ. ದುಂಬುದ ಪರಬೆರ್ಡ ಕೇಂಡ ಅಕ್ಲೆಗ್ ಪರಶುರಾಮೆ ಏರ್ ಪಂಡ್ದೇ ಗೊತ್ತುಜ್ಜಿ.
ಕುಡು ಅರಿನ್ ಧಾನ್ಯ ಆದ್ ಬುಳೆಯಿನ ಮೊಕ್ಲು ಕೆಡ್ಡಸದ ದಿನತಾನಿ ಕುಡು ಅರಿನ್ ನನ್ನೆರಿಯಾದ್ ಭೂಮ್ಯಪ್ಪೆಗ್ ಕೊರ್ಪೆರ್. ನಮ ಅರಿಬಾರ್ನ್
ಲಚುಮಿಪಂಪ.ಪೋಲಿ ಪುಲ್ಸುಪನ್ಪ. ಆತೇ ಅತ್ತ್ ಅರಿಕ್ ಸುರುತ ಮರ್ಯಾದಿ ಕೊರ್ದುಅರಿಬಾರ್, ಅರಿತಾರಾಯಿಪಂದ್ ಆರಿಕ್ ಸುರುತ ಬಿಲೆ ಕೊರ್ಪ. ಕೆಡ್ಡಸದಾನಿ ಭೂಮ್ಯಪ್ಪೆನ್ ಫಲವಂತಿಕೆದ ರೂಪ ಆದ್ ನಮ ತೂಪ. ಆಲ್ ಪಿದಯಾಪು ನಿ ದುಂಬುದ ಸೃಷ್ಟಿಗ್ ತಯಾರಾಪುನಿ ಪಂದ್ ಎನ್ನಿವ. ಆನಿ ಬೂಮ್ಯಪ್ಪೆಗ್ ಮಂಜಲ್ ಕುಂಕುಮ ಎಣ್ಣೆ ನೊರೆಕಾಯಿ ಕಾಡ ಪೂ ದೀಪ. ಧೂಪ ಪತ್ತುವ. ಕುಡು ಅರಿ ಪ್ರಧಾನವಾದ್ 9 ಬಗೆತ ಧಾನ್ಯೋಲೆನ್ ದೀಪ. ಆನಿ ಭೂಮಿಗ್ ಆಯುಧ ಮುಟ್ಟಾವುಜ.ಕೆಡ್ಡಸದಾನಿ ಕುಡು ಅರಿನ್ ಪೊದ್ ತ್ ದ್ ತಿಂಪೆರ್. ತುಳುವೆರೆಗ್ ಕೆಡ್ಡಸ ಸುರುತ ಪರ್ಬ. ಭೂಮಿ ಸೂರ್ಯೆ ಚಂದ್ರೆ ಕಡಲ್ ಬರ್ಸ ಗಾಳಿ ನಾಗೆ ಬೂತೊಲು ಅಕ್ಕಸ ನಚ್ಚತ್ರ ಸೇರೊಂದು ಪ್ರಕೃತಿ ಆರಾಧಕೆರಾಯಿನ ತುಳುವೆರೆಗ್ ಕಾಲಾಂತರೊಡುಸೀತೆ ಪುಟ್ನ ದಿನಕೆಡ್ಡಸ ಆಂಡ್. ಕುಡು ಅರಿನ್ ನಮ ಅರಿ ಕುಡುಂದು ಪನ್ಪುಜ. ಅರಿ ತಾರಾಯಿನ್ ನಮ ತಾರಾಯಿ ಅರಿಂದ್ ಪನ್ಪುಜ. ಕಾಡ್ ಕಡ್ತ್ದ್ ನಾಡ್ ಮಲ್ಪೆರೆ ಕುಡರಿ ಸಕಾಯ ಆಂಡಲಾ ಆಯುಧೋಡು ತುಳುನಾಡ್ ಉದಿತ್ನತ್ತ್, ಬಡವು ಕಳೆದ್ ಬದ್ಕ್ ಕೊರ್ನ ಬುಳೆ ಭಾಗ್ಯೊಡು ತುಳುನಾಡ್ ಉದಿತ್ನ್ಡ್ ಪಂಡ್ ದ್ ಎನ್ಯೊಲಿ.
ಪರಶುರಾಮೆ ತುಳುನಾಡುನ್
ಕಡಲ್ಜಾರದ್ ಉಂಡು ಮಲ್ತೆ ಪನ್ಪೆರ್. ಅಪಗ ದಾಯೆ ಕಡಲ್ ಈ ನಮುನೆ ಇತ್ತ್ ನ ಬೂಮಿನ್ ನಿಂಗೊಂದುಂಡು?. ದೇವೆರೆ ನೆಲದ್ವಾರಕೆದಾಯೆ ಅಪಗ ಕಡಲ್ದ ಅಡಿಟೇ ಒರಿದುಂಡ್? ಒಂಜಿ ವೇಳೆ ಪರಶುರಾಮೆ ತುಳುನಾಡುನ್ ಉಂಡು ಮಲ್ತುದುಂಡ ದೈವದ ಪ್ರತಿನುಡಿಟ್ಲಾ``, ಸಂಧಿ ಪಾಡ್ದನೊಡ್ಲಾಪರಶುರಾಮನ ಇಚಾರ ಬೈದು. ಕೆಲವೊರ ಕಟ್ಟುನಕ್ಲೆ ಬಾಯಿಡ್ ಪರಶುರಾಮೆ ಉಂಡು ಮಲ್ತಿ ತುಳುನಾಡುಂದ್ ಬರ್ಪುಂಡು ವಿನಃ, ಸಿನೆಮಲೆಡ್ ಪದೊಟು ಬೈದುಂಡು ವಿನಃ ನಿಜವಾದ್ ಬೇತೆ ಓಲ್ಲಾ ಅಂಚಿನ ದಾಖಲೆ ತಿಕ್ಕುಜಿ. ಪರಶುರಾಮನ ಇಚಾರ ದಶಾವತಾರದ ಕಲ್ಪನೆಡುಪ್ಪುನಗ ವಿಷ್ಣುನ ಅವತಾರ ಎಂಕಟರಮಣ ದೇವೆರ್ ದಾಯೆ ಬೈಜೆರ್?. ಮಹಾ ಬಾರತೊದ ಪದಿನೆಣ್ಮ ಅದ್ಯಾಯೊಡು ಓಲ್ಲಾ ಪರಶುರಾಮೆ ತುಳು ನಾಡ್ ನ್ ಉಂಡು ಮಲ್ತೆಂದ್ ದಾಯೆ ಬಯ್ಜಿ?. ತುಳುನಾಡ ಮಹಾ ದಾನಿ ತುಳುನಾಡಬಲಿಯೇಂದ್ರನ್ಪಾತಾಳೊಗು ನೂಕ್ ನವಾಮನೆದಶಾವತಾರ ಕಲ್ಪನೆಡ್ ಬನ್ನಗ, ಬಸ್ಮಾಸುರನ್ ಕೆರ್ನ, ಕಡಲ ತುಲಿಪುಡು ಅಮುರ್ತೊನು ಸುರೆರೆಗ್ ಕೊರ್ನ, ಕಲಿಯುಗೊಟು ಅಯ್ಯಪ್ಪನ್ ಪೆದ್ದ್ ನ ಮೋಹಿನಿ ದಾಯೆ ದಶಾವತಾರದ ವರ್ಣನೆಡ್ ಬರಂದೆಬುದ್ಧ,ಕಲ್ಕಿಬತ್ತುಂಡುಂದ್ ತೆರಿಯುಜಿ. ಬುದ್ಧನ್, ಕಲ್ಕಿನ್ ಕನಯೆರೆ ಬೋಡಾದ್ ಎಂಕಟನ್, ಮೋಹಿನಿನ್ ಬುಡುದುಪ್ಪೆರಾ?. ವಾಮನ ದೇವೆರ್ ಬಲಿನ್ ಪಾತಾಳೊಗ್ ನೂಕುನಗ ತುಳುನಾಡ್ ಲ ಸಮುದ್ರದ ಅಡಿಕ್ ಪೋಯಿನಿಗೆ. ಅವೆರ್ದ್ ಬೊಕ್ಕ ಬತ್ತ್ ನ ಪರಶುರಾಮೆ ಸಮುದ್ರದ ಅಡಿಟ್ ಇತ್ತ್ ನ ಬೂಮಿನ್ ಮಿತ್ತ್ ದೆರ್ತ್ ದ್ ಮರು ಸೃಷ್ಟಿ ಮಲ್ತೆಂಡ, ದ್ವಾರಕೆ ಎಂಚಲ ಕಡಲ್ ದ ಅಡಿಟ್ ಒರಿಂಡಲ ಬೂಮಿನ್ ದೆರ್ಪುನಗ ಬೂಮಿ ಪುತ್ರೆ ಬಲಿನ್ ದಾಯೆ ಮಿತ್ತ್ ಕನದುಜೆ?. ಪರಶುರಾಮೆ ತುಳುನಾಡುನ್ ಬೇತೆನೇ ಸೃಷ್ಟಿ ಮಲ್ತುದುಂಡ ಅವುದ್ವೀಪಆವೊಡಾಂಡ್. ಭಾರತದ ನಕ್ಷೆಗೆಂಚ ಸೇರುಂಡ್? ಪರಶುರಾಮರ್ದ್ ಬೊಕ್ಕ ಬತ್ತ್ ನ ದ್ವಾರಕೆ ನನಲಾ ಕಡಲಡಿಟ್ ಉಪ್ಪುನಗ ಅವೆರ್ದ್ ದುಂಬು ಪರಶುರಾಮೆ ಉಂಡು ಮಲ್ತಿನ ತುಳುನಾಡ್ ಎಂಚ ಉಪ್ಪುನಿ? ಅಂಚನೆ ಪರಶುರಾಮನ ಕತೆಟ್ ಓಲ್ಲಾ ತುಳುನಾಡುನ್ ಉಂಡು ಮಲ್ತಿನ ಇಚಾರ ಬರ್ಪುಜಿ.ವಾದಿರಾಜೆರ್ನ,ಆಚಾರ್ಯ ಮದ್ವೆರೆಗ್ರಂಥೊಡ್ಲಾ ಈ ಇಚಾರ ಬರ್ಪುಜಿ/ಉಲೇಖ ಇಜ್ಜಿ. ಇನಿ ಸಿನಿಮಾಗ್ರಾಫಿಕ್ಸ್ಲೆಡ್ ಪರಶುರಾಮೆ ಕುಡರಿ ದಕ್ಕುನಲ್ತೇ ತೋಜಾವೆರ್. ಟಿವಿಡ್ಲಾ ಅವ್ವೇ ಬರೊಂದುಂಡು. ಪರಶುರಾಮೆ ಕುಡರಿದಕ್ಕ್ ದ್ ಕಡಲ್ ಅಂಚಿ ಪೋಂಡು ಪಂಡಕನ್ಯಾಕುಮಾರಿಮುಟ್ಟ ತುಳುನಾಡಿತ್ತುದು. ಅಪಗಂಡ ಉಂದೆತ ನಡುಟುಮಲಬಾರ್(ಕೇರಳ),ತಮಿಲ್ನಾಡ್ಪೂರ ಎಂಚ ಬತ್ತುಂಡ್? ಅಕುಲು ಪೂರ ದಾಯೆ ಕಡಲ ಬರಿತ ಈ ಜಾಗೆಲೆನ್ ಪರಶುರಾಮ ಸೃಷ್ಟಿ ಪಂದ್ ಪನ್ಪುಜೆರ್?. ಆಂಡ ಅಕುಲು ಮಾತ್ರಬಲಿನ/ವಲಿಯೆಟ್ಟಾನ್ಆರಾಧನೆ ಮಲ್ಪುವೆರ್. ಪರಶುರಾಮೆ ತುಳುನಾಡ್ ಗ್ ಬರ್ಪುನ ದುಂಬೇ ತುಳುನಾಡ ಮಣ್ಣ್ ಫಲವತ್ತಾಡಿತ್ತುಂಡ್. ಈ ಬೂಮಿ ಉಪ್ಪಾದಿತ್ತ್ಂಡ ಬುಳೆ ಬಾಗ್ಯ ಇತ್ತುದುವ?. ಕಡಲ ಬರಿತ ಗುವೆಲ್ದ ನೀರ್ ಅಪಗ ಎಂಚ ಉಪ್ಪು ಉಪ್ಪುನಿ? ಚಪ್ಪೆ ಆವೊಡಿತ್ತುಂಡ್.ಬಲಿತುಳುನಾಡ ಬೆನ್ನಿ ಸಾಗೊಳಿದ ಮಲ್ಲ ಯಜಮಾನಿ. ನಮ ವರ್ಸೊಗು ಮೂಜಿ ಸರ್ತಿ ಲೆಪ್ಪುನಿ ಬಲಿನ್ ವಿನಃ ಪರಶುರಾಮನತ್ತ್, ಬಲಿನ ಕಾಲೊಡೇ “ತಗ್ಗಿ ಕಂಡೊಡು ಮೂಜಿ ಬುಳೆ, ಏರಿ ಕಂಡೊಡು ಒಂಜೆ ಬುಳೆ” ಆವೊಂದಿತ್ತುಂಡುಂದುಂಡು. ಸುಗ್ಗಿದ ಕಂಡದ ನೇಜಿಗ್ ಬೊಲ್ಪು ತೋಜುನಗ ಆ ಬಲಿ ಇನಿಲ ಬರೊಂದುಲ್ಲೆ ಪನ್ಪಿ ನಂಬೊಳಿಗೆ ಉಂಡು. ಇನಿ ಪೂರ ಸುಗ್ಗಿದ ಬುಳೆಲ ಮಯಕಾತುಂಡ್. ಪರಶುರಾಮೆ ಕೇರಳೊಡು32 ಗ್ರಾಮ, ತುಳುನಾಡುಡ್ 32 ಗ್ರಾಮ ವೈದಿಕೆರೆಗ್ ದಾನ ಕೊರ್ಯೆಂದ್ ಬರ್ಪುನ ಇಚಾರ 14ನೇ ಶತಮಾನೊರ್ದ್ ಬೊಕ್ಕ ಬತ್ತ್ ನವುಂದು ಪೆರಿಯಾಕ್ಲು ಪನ್ಪೆರ್. ನಂಬೂದರಿನಕುಲು ಈ ಕಟ್ಟುಕತೆತ ಸೃಷ್ಟಿ ಮಲ್ತೆರುಂದುಲ ಪನ್ಪೆರ್. ಇನಿ ನಮ್ಮ ತುಳುನಾಡುಗ್ ಪ್ರಶ್ನೆ ಚಿಂತನೆಗ್ ಬರ್ಪುನ್ಲಾ ಅಕುಲೆ .ಪರಶುರಾಮಕುಡರಿಬೀಜಾದ್ ಮಲ್ತ್ ನ ದೇಲ್ಯ ಶಿಮೊಗ್ಗೆದ ಶಿಖಾರಿ ಪುರೊಟುಂಡು.ಮುಂಡಾಜೆದ ಕೈತಲ್(ಬೆಳ್ತಂಗಡಿ ತಾಲೂಕು) ಅಂಚನೆ ಗಟ್ಟದ ಮಿತ್ತುದ ಕೆಲವು ಊರುಲೆಡ್ ಪರಶುರಾಮನ ದೇವಾಲ್ಯೊಲು ಉಲ್ಲ.ಕುಂಜಾರ ಗಿರಿಟ್ ಪರಶುರಾಮನ ಪುದರ್ ದ ಕೆದು ಉಂಡು.
ನನ ದುಂಬುಗು
ಡಾ ಇಂದಿರಾ ಹೆಗ್ಡೆರ್ನಅಂಚನೆಪ್ರವೀಣ್ ಶೆಟ್ಟಿ ಯನ್ ಕುಡ್ಲ,ರಾಧಾಕೃಷ್ಣ ಮೂಲ್ಯಮೊಕ್ಲೆನ ಲೇಖನದ ಆಧಾರೊನು ದೆತೊಂದು ವಿವರ ಕೊರೊಂದುಲ್ಲೆ.
ಬೇತೆ ಬೇತೆ ವಿದ್ವಾಂಸೆರ್ ಬರೆಯಿ ಇಚಾರೋನು ತೂಪುನಾಂಡ ತುಳುನಾಡ್ದ ಆಳವಾಯಿನ ಇತಿಹಾಸ ಸಂಶೋಧನೆ ಮಲ್ತಿ ವಿದ್ವಾಂಸೆರ್ ಪರಶುರಾಮನ ಕಥೆಕ್ಲಾ ತುಳುನಾಡ್ ಗ್ಲಾ ವಾ ಸಮ್ಮಂದಲ ಇಜ್ಜಿ ಪನ್ಪೆರ್. ಪರಶು ರಾಮನ ಕಥೆ ಕೇರಳೊಡು ಒಂಜಿ ಜನಪದ ಕಥೆಯಾದಿತ್ತ್ದ್ ಪ್ರಚಾರೊಡು ಇತ್ತಿನಡ.
"ಕೇರಳೋತ್ಪತ್ತಿ"ಪನ್ಪಿ 16 ನೇ ಶತಮಾನದ ಬೂಕೊಂಜಿ ಬುಡುಂಡ ಬೇತೆ ಓಲ್ಲಾ, ತುಳುನಾಡ್ ಮಹಾರಾಷ್ಟ್ರದ ವಾ ಪ್ರಾಚೀನ ಗ್ರಂಥೊಡ್ಲಾ ಈ ವಿವರ ಇಜ್ಜಿ. 200 ವರ್ಸೊರ್ದು ದುಂಬು ಉತ್ತರ ಭಾರತದ ವೈಶ್ಯ ಬೇರದಾಕ್ಲೆ ಇಲ್ಲಲ್ ಪುಟ್ಟೋನ್ನ"ಸತ್ಯನಾರಾಯಣ ವ್ರತ"ಪನ್ಪಿ ಕಾಲ್ಪನಿಕ ಕಥೆ ಇನಿ ಇಡೀ ದೇಶೊಡು ಎಂಚ ಮಾತಾ ತಿಕ್ಡ್ ಉಂಡಾ ಅಂಚನೆ ೨೦೦ ವರ್ಸೊರ್ದು ದುಂಬು ಕೇರಳೋಗು ಪೋದು ಬತ್ತಿನ ವೈದಿಕ ತಂತ್ರಿಲೆರ್ದ್ ಈ ಪರಶುರಾಮನ ಕತೆ ಪ್ರಚಾರ ತುಳುನಾಡ್ ಡ್ ಆಂಡ್. ಬೂತಾಳ ಪಾಂಡ್ಯನ ಚರಿತ್ರೆಡಾವಡ್, ತುಳು ಪಾರ್ದನೊಲೆಡ್ ಆವಡ್ ಪರಶುರಾಮನ ಕತೆ ಇಜ್ಜಿ. ದ್ವಾಪರ ಯುಗೋಟು ಕಶ್ಯಪ ಗೋತ್ರದ ಬಿರನೆರೆಗ್ ಆಯೆ ತುಳುನಾಡುನ್ ದಾನ ಮಲ್ತೆನ್ದ್ ಕಥೆ ಪಂಡ ಆ ಕಾಲೊಡು ತುಳುನಾಡ್ ಡ್ ಒವ್ವೆ ಗೋತ್ರದ ವೈದಿಕೆರ್ ಇಜ್ಜಾನ್ಡ್. ತುಳುನಾಡುಗ್ ಮೊಕ್ಲು ಸುಮಾರ್ 1600 ವರ್ಸೊದ ದುಂಬುಕದಂಬೆರ್ನಕಾಲೊಡು ಬತ್ತೆರ್. ಪರಶುರಾಮ ಸೃಷ್ಟಿ ತುಳುನಾಡ್ ನ್ದ್ ಸ್ಕಂದ ಪುರಾಣೊಡು ಬರೆತಿನವು ನಿಜನೇ ಆತುಂಡ ಆಚಾರ್ಯ ಮದ್ವೆರವಾಡ್, ವಾದಿರಾಜಾಚಾರ್ರಾವಡ್ ಆರಾಧ್ಯ ದೈವ ವಿಷ್ಣುನ 6ನೇ ಅವತಾರದ ಈ ಘನ ಕಾರ್ಯೋನು ದಾಯೆ ಗ್ರಂಥೊಲೆಡ್ ಬರೆದ್ ತೆರಿಪಾಯ್ಜೆರ್ ?. ಏರಾ ಬೊಕ್ಕ ಅವೆನ್ ಪುರಾಣೊಗು ಸೇರದಿಪ್ಪೆರ್. ಆ ಇಚಾರ ಮೂಲ ಸ್ಕಂದ ಪುರಾಣೊಡೆ ಇಜ್ಜಿನ್ದ್ ಕಾಶಿದಧರ್ಮ ಸಂಸತ್ತುದ ಪಂಡಿತೆರ್ ಏಪನೇ ಘೋಷಣೆ ಮಲ್ದೆರ್ ನ್ದ್ ಕುಕ್ಕೆ ಬೊಕ್ಕ ಉಡುಪಿ ದೇವಾಲಯದ ಇತಿಹಾಸ ಸಂಶೋಧಕೆಡಾ ಅಚ್ಚುತ ಶರ್ಮೆರ್ತೆರಿಪಾದೇರ್. ಪರಶುರಾಮೆ ಬರ್ಪುನ ದುಂಬೇ ತುಳುನಾಡುನ್ ಬಲಿಚಕ್ರವರ್ತಿ ಆಲೊಂದಿತ್ತ್ದ್ 5ನೇ ಅವತಾರದ ವಾಮನೆ ಆಯನ್ ಪಾತಾಲೊಗು ನೂಕ್ಯೆ. ಅಪಗ ಪರಶುರಾಮರ್ದ್ ದುಂಬೇ ಪಡ್ಡೆಯಿ ಕರಾವಳಿ ತುಳುನಾಡ್ ಅಸ್ತಿತ್ವೊಡು ಇತ್ತಿನವು ಸತ್ಯನ್ದ್ ಪುರಾಣಕಾರೆರೆ ಒಪ್ಪಿಲಿಕಾಯ್ಜೆ?. ಅಪಗವಾಮನೆ ಪಜ್ಜೆ ದೀನಗನೆ ಇತ್ತಿನ ತುಳುನಾಡುನ್ ಪಿರೋರ ಪರಶುರಾಮೆ ಸೃಷ್ಟಿ ಮಲ್ಪುನಿ ಎಂಚ?. ಅಪಗ ಪಡ್ಡೆಯಿ ಘಟ್ಟದ ಮುದೆಲ್ದ ತುಳುನಾಡ್ ಪರಶುರಾಮೆ ಉಂಡು ಮಲ್ತಿನವತ್ತ್ ಪಂಡ್ ದ್ ವಿಷ್ಣು ಪುರಾಣ ಬರೆಯಿನಕ್ಲ್ ಒತ್ತೊಂಲೆಕ ಆಯ್ಜೆ?.
ಬಾರ್ಯಾತ್ ವರ್ಸ ತುಳುನಾಡುನ್ ಆಲ್ನ
ಅಲುಪೆರ್ಶೈವ, ವೈಷ್ಣವ, ಶಾಕ್ತೇಯ ದೇವಾಲಯೋನು ಕಟ್ಟಾಯೆರ್ ಆಂಡ ಒಂಜೇ ಒಂಜಿ ಪರಶುರಾಮನ ದೇವಾಲಯ ಕಟ್ಟಾಯಿಜೆರ್. ರಾಮ, ಸೀತೆ, ಲಕ್ಷ್ಮಣ, ಕೃಷ್ಣ, ದ್ರೌಪತಿ, ಪಾಂಡವೆರ್ ಮೊಕ್ಲೆನ ತಪಸ್ಸ್ದ ಜಾಗೆ ತುಳುನಾಡ್ ಡ್ ಪವಿತ್ರವಾದುಂಡು. ಆಂಡ ದಾಯೆ ಪರಶುರಾಮೆ ಕುಡರಿ ದಕ್ಕಿ ಜಾಗೆ ಪವಿತ್ರ ಆಯ್ಜಿ ?. ಸಹ್ಯಾದ್ರಿ ಪಂಡ ಮೂಡಾಯಿದ ಪಡ್ಡೆಯಿ ಘಟ್ಟ ಕೇರಳದ ತ್ರಿವೇಂದ್ರಮುರ್ದು ಬಡಕಾಯಿ ಗುಜರಾತ್ ಮುಟ್ಟ ವ್ಯಾಪ್ತಿಡ್ ಉಂಡು. ಗೋವಾ ಮಹಾರಾಷ್ಟ್ರ ಗುಜರಾತ್ದಕ್ಲ್ ಈ ಕತೆ ನಂಬುನ್ನೇ ಇಜ್ಜೆರ್. ಅಕ್ಲೆಗ್ ಅವೆರ್ದ್ ವಾ ದೋಸಲ ಆತ್ ಜಿ. ಆರ್ಯ ಪುರಾಣದ ಪ್ರಕಾರ ಪರಶುರಾಮೆ 3000 ವರ್ಸೊರ್ದು ದುಂಬು ಇತ್ತಿನ. ಅವೆರ್ದ್ ದುಂಬೇ ತುಳುವೆರ್ ನಾಗಾರಾಧಕೆರಾದಿತ್ತೆರ್. ಸಮುದ್ರೊರ್ದು ಬೂಮಿ ಲಕ್ಕ್ನಗ ಸರ್ಪೊಲೇ ಇತ್ತಿನಿಗೆ. ಆ ಉಚ್ಚುಲು ಉಪ್ಪಿನೀರ್ಡ್ ಬದ್ಕ್ ದ್ ಉಪ್ಪುನೆನ್ ಉರಗ ತಜ್ಞೆರ್ ಒಪ್ಪುಜೆರ್. ಅಂಚಾದ್ ನಾಗಾರಾಧನೆಗ್ಲಾ ಪರಶುರಾಮಗ್ಲಾ ವಾ ಸಮ್ಮಂದೊಲ ಇಜ್ಜಿ.
ಪುರಾಣದ ಅಂಶೊಲೆನ್ ಅಧ್ಯಯನ ಮಲ್ತಿ ಸಂಶೋಧಕೆರ್ನ ಪ್ರಕಾರ ಸಹ್ಯಾದ್ರಿಗ್ ತಾಗೊಂದು ಇತ್ತಿನ ಕರಾವಳಿಡ್ ಮಲ್ಲ ಮಲ್ಲ ಕಾಡುಲು ಇತ್ತ. ಉತ್ತರೊರ್ದು ಬತ್ತ್ನ ಆರ್ಯನ್ನರ್ ಕಾಡ್ನ್ ಕಡ್ತ್ದ್ ನಾಶ ಮಲ್ತಿನೇತ ಸಂಕೇತನೇ
"ಕುಡರಿ ದೆರ್ತ್ ಪತ್ನ ಪರಶುರಾಮೆ", ಅರಣ್ಯ ನಾಶೋನು ವಿರೋಧಿಸಯಿನ ಪ್ರಕೃತಿ ಪ್ರಿಯೆರಾಯಿನ ದ್ರಾವಿಡ ತುಳುವೆರೆನ್ ಕೆರ್ದ್ ಪಾಡ್ನ ಸಂಕೇತನೇ"ಪರಶುರಾಮರ್ದ್ ಕ್ಷತ್ರಿಯ ಶತ್ರು ಸಂಹಾರ", ಅರ್ಯನ್ನೆರ್ ದ್ರಾವಿಡ ಆದಿವಾಸಿಲ್ನ ಬೂಮಿನ್ ಆಕ್ರಮಣ ಮಲ್ತ್ದ್ ಬಲತ್ಕಾರೊಡು ಉಲಕೈ ಮಲ್ತೊನ್ನವೇ"ಪರಶುರಾಮ ಸೃಷ್ಟಿದ ಕಥೆ".
ಪುರಾಣ ಪ್ರಕಾರ ಪರಶುರಾಮೆ ಬಡಕಾಯಿದ
ವೈತರಣೀಯಕಡಲ ದಂಡೆಗ್ ಬನ್ನಗ ಅಲ್ತ ಮೂಲ ನಿವಾಸಿಲೆನ್ ತೂಯೆ ಪನ್ಪುನವ್ಲು ಪರಶುರಾಮೆ ಬರ್ಪುನ ದುಂಬೇ ತುಳುನಾಡ್ ಇಪ್ಪೆದ್ನ್ಡ್ ಪನ್ಪುನವು ತೆರಿಯು. ಸ್ಕಂದ ಪುರಾಣದ ಆಧಾರ ದೆತೊಂಡಲಮೂಲು ಬಿರನೆರ್ ಇಜ್ಜಾನ್ಡ್ ಪನ್ಪುನವು ತೆರಿಯು. ಆಂಡ ನರಮಾನ್ಯೇರ್ ಇಜ್ಜೆರ್ ನ್ದ್ ಪನೆರೆ ಅಪುಜಿಂದ್ ಇತಿಹಾಸಜ್ಞೆಎ.ಡಿ. ಪುಸಾಲ್ಕರ್ಪಂತೆರ್.[ ಡಾ. ಇಂದಿರಾ ಹೆಗ್ಡೆರ್ನ 'ಬಲಿ ವಾಮನ ಮತ್ತು ಪರಶುರಾಮ -ಬ್ಲಾಗ್ನ ಲೇಖನದ ಆಧಾರ.]
ತುಳುನಾಡ್ ಪರಶುರಾಮ ಸೃಷ್ಟಿ ಪನ್ಪುನೆಕ್ ವೈಜ್ಞಾನಿಕ, ಪೌರಾಣಿಕ, ಚಾರಿತ್ರಿಕ ದಾಖಲೆಲು ಇಜ್ಜ. ಕಜ್ಜಕೊಟ್ಯಲೆಡ್, ಆಟೋಲೆಡ್ ತೂಯೆರೆ ತಿಕ್ಕುನಿಯಾತೆ. ಕೇರಳದ ತಿರುವನಂತಪುರಮುರ್ದು ಗುಜರಾತದ ಉಮರ್ಗಾಮ್ ಮುಟ್ಟದ ಪಡ್ಡೆಯಿ ಘಟ್ಟ ಉಂಡಾದ್ 4 ರ್ದ್ 6 ಕೋಟಿ ವರ್ಸಾದಿಪ್ಪು, ಆಫ್ರಿಕಾ ಖಂಡರ್ದ್ ತುಂಡಾದ್ ಜಾರ್ದ್ ಬತ್ತ್ನ ಭೂಭಾಗ ಉಂದು. ಕೇರಳ, ಮಹಾರಾಷ್ಟ್ರ, ಗುಜರಾತ್ ಗಡಿಮುಟ್ಟ ಉಪ್ಪುನ ಸಹ್ಯಾದ್ರಿ ಪರ್ವತ ಶ್ರೇಣಿ ಪುಟ್ಟುದ್ನಿ ಅಪಗ ನಡತ್ನ ಭೂಭಾಗದ ಘರ್ಷಣೆರ್ದ್ ನ್ದ್ ವೈಜ್ಞಾನಿಕವಾದ್ ಸಾಬೀತಾತ್ ನ್ಡ್. ಗೂಗಲ್ ಇಂಟರ್ನೆಟ್ ಡ್
"ಗೊಂಡ್ವಾನ ಲ್ಯಾಂಡ್"ಇಜ್ಜಾ"ಕಾಂಟಿನೆಂಟಲ್ ಡ್ರಿಫ್ಟ್"ನ್ದ್ ನಾಡಿಯರ್ಡ ಪೂರ್ತಿ ಮಾಯಿತಿ ತಿಕ್ಕುಂಡು. ಭಾರತದ ಪಡ್ಡೆಯಿ ಕರಾವಳಿಡ್ ತಿಕ್ಕ್ದಿನ ಜುರಾಸಿಕ್ ಯುಗತ ದೈಕುಲ್ನ ಕಲ್ಲಾಯಿನ ಪರ ಒರಿಕೆದ ಆಧಾರೊಡುಈ ನಮ್ಮ ಕರಾವಳಿ ತುಳುನಾಡ್ 4 ಕೋಟಿ ವರ್ಸದ ಪಿರವಿತ್ತ್ ನ್ಡ್ ಪನ್ಪುನವು ಸ್ಪಷ್ಟವಾದ್ ತೋಜುಂಡು.ಅಪಗ ಪರಶುರಾಮೆ ಬುಡ್ಲೆ ವಾ ಒಂಜಿ ವರ್ಗೊದ ಸಸ್ತನಿಲೆ ಇಜ್ಜಾನ್ಡ್. ಆಂಡ ಅಪಗ ತೆತ್ತಿ ದೀಪುನ ಶೀತರಕ್ತ ಪ್ರಾಣಿ ಡೈನೋಸಾರ್ ರೂಪದ ಪ್ರಾಣಿಲು, ಪಕ್ಕಿಲು ಮಾತ್ರ ಇಪ್ಪೆದ. ಅಂಚನೆ ಕೂಳೂರು ಪೊಸ ಸಂಕ ನಿರ್ಮಾಣ ಆನಗ ೨೫ ಅಡಿತಾತ್ ತರ್ತ್ ಡ್ ಮಜಿತಲೆಕ ಆದಿತ್ತ್ನ ಮರತ ತುಂಡೊಂಜಿ ತಿಕ್ಕ್ದ್ ಅವೆನ್ ತುಳುನಾಡ ಭೂರಚನೆದ ಅಧ್ಯಯನಕಾರೆರಾಯಿನಪ್ರೊ ಗುರಪ್ಪೆರ್ಬೊಂಬಯ್ದ ಟಾಟಾ ಸಂಶೋಧನಾ ಸಂಸ್ಥೆಗ್ ಕಡಪುಡ್ದ್ ಅಲ್ತ ವಿಜ್ಞಾನಿಲು ಅವೆನ್ 60, 800 ವರ್ಸ ಪಿರಾಕ್ದಂದ್ ಪನ್ತೇರ್. ಮಲ್ಲ ಮಲ್ಲ ಕಾಡುಲು ಜೇರೊಲು ಇತ್ತ್ದ್ ಅವ್ವೆತೋ ದುಂಬುಡೇ ಗುಡ್ಡೆ ಜಾರ್ದ್ ಕಡಲ್ ಪಿರ ಪೋದು ಭೂಮಿ ಪಂಡ ತುಳುನಾಡ್ ದ ನೆಲಸಮ ಇತ್ತಿನ ಭೂಮಿ ಉಂಡಾದಿಪ್ಪು.
ಪುರಾಣದ ಪ್ರಕಾರ ಪನ್ಪುಂಡ ಶುದ್ಧ ಜಾತೀವಾದಿ ಪರಶುರಾಮೆ. ಅವ್ವೆನ್ಚ ಪಂಡ ಆಯನ ಪ್ರಿಯ ಶಿಷ್ಯೆ
ಕರ್ಣೆಕ್ಷತ್ರಿಯೆನ್ದ್ ತೆರಿನಗ'ಯಾನ್ ಕಲ್ಪಾಯಿ ಇದ್ಯೆ ನಿಕ್ಕ್ ಯುದ್ಧ ರಂಗೊಡು ಮದತ್ ಪೋವಡ್'ಪನ್ಪಿ ಶಾಪ ಕೊರ್ನವು ಕರ್ಣನ ಸಾವುಗು ಕಾರಣ ಆಂಡ್. ಭೀಷ್ಮನೊಟ್ಟುಗು ಲಡಾಯಿ ಮಲ್ತ್ದ್ ಜಮದಗ್ನಿರ್ದಾದ್ ಜೀವ ಒರಿನ್ಡ್. ಬಾಲೆ ಗಣಪತಿಡ ಆಂಕಾರೊಡು ಲಡಾಯಿ ಮಲ್ತ್ದ್ ಪಾರ್ವತಿನ ಶಾಪ ಪಡೆಪೆ. ಬಂಟ ಬಿಲ್ಲವ ಮೊಗವೀರೆರ್ ಅಕ್ಕ ಮೆಗ್ದಿನಕ್ಲೆಗ್ ಪುಟ್ಟ್ನ ಒಂಜೇ ಮೂಲದ ಕ್ಷತ್ರಿಯೆರಾದಿತ್ತ್ದ್ 60% ಈ ಮೂಜಿ ಜಾತಿದಕ್ಲ್ ತುಳುನಾಡ್ ಡ್ ಇತ್ತೆರ್. ಕ್ಷತ್ರಿಯ ದ್ವೇಷಿ ಪರಶುರಾಮೆ ತಾನ್ ಉಂಡುಮಲ್ತಿ ನೆಲಟ್ 60% ಕ್ಷತ್ರಿಯೆರೆಗ್ ನಿಲೆ ಮಲ್ತ್ ಕೊರ್ಯೇನ್ದ್ ಪಂಡ ಅರ್ಥ ಉಂಡೆ?. ದಾಯೆ ನಮ ತೆರಿದ್ಲಾ ವೈದಿಕ ಕಾಲ್ಪನಿಕ ಕತೆಕ್ ನೀರ್ ಗೊಬ್ಬರ ಪಾಡ್ ದ್ ಬುಲೆಪಾವೊಂದುಲ್ಲನ್ದ್ ಅರ್ಥ ಅವೊಂದಿಜ್ಜಿ.
Share this postಅಮ್ಮೆ ಜಮದಗ್ನಿ ನ ಸಾವುದ ಪ್ರತೀಕಾರ ಆದ್ ಪರಶುರಾಮೆ ಯುದ್ದೊಡು ರಾಜೆರೆನ್ ಸೋಪಾದ್ ಬೂಮಿನ್ ಬಿರನೆರೆಗ್ ದಾನ ಮಲ್ತೆ. ಅಕ್ಲೆ ಜಾತಿಗ್ ಬುಡ್ ದು ಬೇತೆ ಜಾತಿದಕ್ಲೆಗ್ ವಿದ್ಯೆನೇ ಕಲ್ಪವಂದಿ ಪರಶುರಾಮೆ ಕ್ಷತ್ರಿಯ, ವೈಶ್ಯ, ಶೂದ್ರೇರೆಗ್ ಬೂಮಿ ಸೃಷ್ಟಿ ಮಲ್ತ್ದ್ ದಾನ ಮಲ್ತೆ ಪಂಡ ನಂಬೆರೆ ಸಾಧ್ಯನೇ?. ಒಂಜಿ ವೇಳೆ ಬಿರನೆರೆಗೆ ಕೊರ್ಯೆನ್ದ್ ನೆನ್ತ್ ನ್ಡಲ ಈ ಸಂಶಯೊಲು ಎದುರಾಪ. ಪರಶುರಾಮೆ ಸೃಷ್ಟಿ ಮಲ್ತಿ ಕಡಲ ಬರಿತ ಬೂಮಿ ಪೊಯ್ಯೆಡೆ ದಿಂಜಿದಿತ್ತ್ದ್ ಆ ಕಾಲೊಡು
ನುಗ, ನಾಯೆರ್, ಕೊಟ್ಟು, ಪಿಕ್ಕಾಸ್ಪತ್ತೆರೆ ತೆರಿಯಂದಿ ಬಿರನೆರೆಗ್ ಆ ಬೂಮಿ ಕೊರ್ದ್ ದಾದ ಪ್ರಯೋಜನ?. ಬೂಮಿನ್ ಬಿರನೆರೆಗ್ ದಾನ ಕೊರ್ದು ನಾಗ ಲೋಕೊರ್ದು ಸರ್ಪೋಲೆನ್ ತರ್ಪುಡ್ದು ಬೂಮಿಡ್ ಉತ್ತು ಬಿತ್ತುದುವೆರ್ಡ ನಾಗ ಪೂಜೆ ನಾಗಾರಾಧನೆ ಮೊಕ್ಲೆರ್ದೆ ನಡಪೊಡಿತ್ತ್ ನ್ಡ್. ಸೂದ್ರೆರೆಗ್ ಅಂಚನೆ ತುಳುವ ನಿವಾಸಿಲೆಗ್ ಆಯೆ ಬೂಮಿ ದಾನ ಕೊರ್ತ್ ನ್ಡ ತನ್ಕುಲೆಗಾದ್ ಪ್ರತ್ಯೇಕ ಬೂಮಿ ಕೊರಿ ಪರಷುರಾಮ ದೇವೆರೆನ್ ದಿನಂಪ್ರತಿ ಪೂಜೆ ಮಲ್ತುದುವೆರ್. ತುಳುನಾಡ್ ದ ಹೆಚ್ಚಿನ ಭಾಗಕೆಂಪು ಕಡ್ಪ ಕಲ್ಲ್ಪಂಡ ನಮ ಇಲ್ಲ ಗೋಡೆ ಕಟ್ಟುನ ಮುರಕಲ್ಲ್ ಇತ್ತ್ದ್ ಉಪ್ಪು ನೀರ್ ತಾಗ್ ನ್ಡ ಅವು ಕರವುಂಡು. ಅಂಚಾದ್ ತುಳುನಾಡ್ ಸಮುದ್ರದ ಅಡಿಟ್ ಇತ್ತುದುಂಡ ಮುರಕಲ್ಲ್ ಕಡಲ್ದ ನೀರ್ಡ್ ಕರವೊಡಿತ್ತ್ ನ್ಡ್. ಕಡಲ್ ದೂರ ಪೋದು ಬೂಮಿ ಉಂಡಾತುಂಡ ಎತ್ತರದ ಗುಡ್ಡೆ ಜೇರೊಲು ಎಂಚಾದಿಪ್ಪು.?. ಗುಡ್ಡೆ ಜಾರೊಂದು ಪೋದು ಬೈಲಾತ್ ನ್ಡ್ ಪಂಡ ನಂಬುದೊಲಿ.
ಕೆ.ಮಹೇಂದ್ರ ನಾಥ್.ಸಾಲೆತ್ತೂರು. ಎಂ.ಎ.
ಈ ಲೇಖನೊಗು ಪೂರಕ ಮಾಯಿತಿ :ಡಾ ಇಂದಿರಾ ಹೆಗ್ಡೆ,ಪ್ರವೀಣ್ ಶೆಟ್ಟಿ ಯನ್ ಕುಡ್ಲ,ರಾಧಾಕೃಷ್ಣ ಮೂಲ್ಯ